ຍີ່ປຸ່ນ ຕົກລົງເຊື່ອມຕໍ່ການເຈລະຈາ 2 ຝ່າຍກັບ ສປປ ເກົາຫຼີ
ຍີ່ປຸ່ນ ຫາກໍ່ຢັ້ງຢືນວ່າ ຈະກັບຄືນສູ່ຮອບເຈລະຈາ 2 ຝ່າຍກັບ ສປປ ເກົາຫຼີ ຢ່າງເປັນທາງການ, ເຊິ່ງເຄີຍຖືກຢຸດສະງັກໃນຕະຫຼອດ 4 ປີຜ່ານມາ
ການນຳ ສປປ ເກົາຫຼີ Kim Jong Un
(vovworld) – ຍີ່ປຸ່ນ ຫາກໍ່ຢັ້ງຢືນວ່າ ຈະກັບຄືນສູ່ຮອບເຈລະຈາ 2 ຝ່າຍກັບ ສປປ ເກົາຫຼີ ຢ່າງເປັນທາງການ, ເຊິ່ງເຄີຍຖືກຢຸດສະງັກໃນຕະຫຼອດ 4 ປີຜ່ານມາ. ໄດ້ມີການແຈ້ງຂ່າວດັ່ງກ່າວກ່ອນທີ່ຄະນະປະຕິບັດງານຂອງສະພາກາແດງ 2 ປະເທດພົບປະກັນຢູ່ນະຄອນຫຼວງ ປັກກິ່ງ ໃນທ້າຍອາທິດຜ່ານມາ. ກອງປະຊຸມໄດ້ເຫັນດີເປັນເອກະພາບກັນຈະສະເໜີໃຫ້ລັດຖະບານ 2 ປະເທດເຊື່ອມຕໍ່ການເຈລະຈາ ເພື່ອປຶກສາຫາລືກ່ຽວກັບບັນຫາຊອກຫາອັດຖິທະຫານ ຍີ່ປຸ່ນ ເສຍຊີວິດຢູ່ ສປປ ເກົາຫຼີ ໃນໄລຍະສົງຄາມໂລກຄັ້ງທີ 2. ເລື່ອງເຊື່ອມຕໍ່ການເຈລະຈາ 2 ຝ່າຍກໍຈະຊ່ວຍໃຫ້ ຍີ່ປຸ່ນຫຼຸດຜ່ອນການຂຶ້ນກັບ ອາເມລິກາ ແລະ ສ ເກົາຫຼີ ໃນນະໂຍບາຍຕໍ່ກັບ ສປປ ເກົາຫຼີ. ກ່ຽວກັບປະຕິກິລິຍາພາຍຫຼັງຂໍ້ຕົກລົງຂອງ ຍີ່ປຸ່ນ, ໂຄສົກກະຊວງການຕ່າງປະເທດ ອາເມລິກາ Victoria Nuland ໄດ້ຢືນຢັນວ່າ: ອາເມລິກາ ຈະຕິດຕາມກວດກາໝາກຜົນແຫ່ງການພົບປະຄັ້ງນີ້, ຖືວ່າ ແຕ່ລະປະເທດທີ່ເຂົ້າຮ່ວມການເຈລະຈາ 6 ຝ່າຍ ລ້ວນແຕ່ສາມາດຕິດຕໍ່ກັບ ສປປ ເກົາຫຼີ ຢ່າງເສລີ ເພື່ອຮັບໃຊ້ໃຫ້ແກ່ຈຸດປະສົງລວມ. ເລື່ອງ ຍີ່ປຸ່ນ ຕົກລົງເຊື່ອມຕໍ່ການເຈລະຈາ 2 ຝ່າຍແມ່ນເລີ່ມມາຈາກຄວາມຕ້ອງການພົວພັນພາຍໃນ ແລະ ຕ່າງປະເທດ. ໃນຂະນະທີ່ ສປປ ເກົາຫຼີ ພວມຕັ້ງຄວາມຫວັງຕໍ່ການເຈລະຈາເຊິ່ງລວມມີການໜູນຊ່ວຍທັງດ້ານເສດຖະກິດຈາກ ຍີ່ປຸ່ນ.