ບັນດາການນຳກຸ່ມ BRICS ເຂົ້າຮ່ວມກອງປະຊຸມ ໂຕະມົນ
(ພາບ: AFP/TTXVN)
(vovworld) – ທີ່ກອງປະຊຸມສຸດຍອດຄັ້ງທີ 6 ໃນວັນທີ 15/7, ຢຸ່ນະຄອນ Fortaleza, ປະເທດ ບຣາຊີນ, ບັນດາປະເທດກຸ່ມພື້ນຖານເສດຖະກິດຫາກໍ່ພົ້ນເດັ່ນຂຶ້ນອັນດັບໜຶ່ງຂອງໂລກ (BRICS) ເຊິ່ງລວມມີ 5 ປະເທດ: ບຣາຊີນ, ລັດເຊຍ, ອີນເດຍ, ຈີນ ແລະ ອາບຟຣີກາ ໃຕ້ ໄດ້ເຊັນຂໍ້ຕົກລົງສ້າງຕັ້ງທະນາຄານລວມ, ເພື່ອແນໃສ່ປຸກລະດົມແຫຼ່ງທຶນໃຫ້ບັນດາໂຄງການພື້ນຖານໂຄງລ່າງ ແລະ ພັດທະນາຢູ່ບັນດາປະເທດສະມາຊິກ ແລະ ບັນດາພື້ນຖານເສດຖະກິດຫາກໍ່ພົ້ນເດັ່ນຂຶ້ນ ແລະ ພວມພັດທະນາອື່ນ. ທະນາຄານຂອງ BRICS ມີຊື່ວ່າ: ທະນາຄານພັດທະນາໃໝ່ (NDB), ໄດ້ຮັບການກຳເນີດໃນສະພາບການບັນດາປະເທດສະມາຊິກ ກໍ່ຄືບັນດາພື້ນຖານເສດຖະກິດຫາກໍ່ພົ້ນເດັ່ນຂຶ້ນ ແລະ ບັນດາປະເທດພວມພັດທະນາອື່ນສືບຕໍ່ປະສົບກັບຄວາມຫຍຸງຍາກໃນເລື່ອງສຳພັດກັບແຫຼ່ງທຶນຈາກບັນດາອົງການການເງິນສາກົນເພື່ອປະຕິບັດໂຄງການພື້ນຖານໂຄງລ່າງ ແລະ ພັດທະນາແບບຍືນຍົງຕ່າງໆ. ເລື່ອງສ້າງຕັ້ງທະນາຄານແຫ່ງນີ້ໄດ້ຮັບການຮັບຮອງເອົາທີ່ກອງປະຊຸມສຸດຍອດ BRICS ຢູ່ ອາບຟຣີກາ ໃຕ້ ໃນເດືອນ 3/2013. ທະນາຄານຈະຕັ້ງສຳນັກງານຢູ່ ຊຽງໄຮ່ ປະເທດ ຈີນ, ມີຍອດຈຳນວນເງິນໃນເບື້ອງຕົ້ນແມ່ນ 100 ຕື້ USD, ໃນນັ້ນທຶນຂອງທະນາຄານແມ່ນ 50 ຕື້ USD, ແບ່ງສະເໜີໃຫ້ບັນດາປະເທດສ້າງຕັ້ງ. ຂໍ້ຕົກລົງສ້າງຕັ້ງ NDB ມີຜົນສັກສິດພາຍຫຼັງໄດ້ຮັບການໃຫ້ສັດຕະຍາບັນຈາກສະພາແຫ່ງຊາດບັນດາປະເທດສະມາຊິກ.