នៅក្នុងសិក្ខាសាលាតាមអនឡាញ ក្រោមប្រធានបទ “កិច្ចសហប្រតិបត្តិការវិនិយោគឆ្លងសមុទ្រប៉ាស៊ីហ្វិក” ដែលរៀបចំឡើងដោយ The Asia Group នាពេលថ្មីៗនេះ អគ្គនាយក The Asia Group លោក Nirav Patel និងតំណាងនៃអង្គភាពអាជីវកម្មជាច្រើនបានចាត់ទុកថា វៀតណាមនៅតែជាទិសដៅគួរឲ្យចាប់អារម្មណ៍របស់វិនិយោគិនអាមេរិកនៅក្នុងតំបន់មហាសមុទ្រឥណ្ឌាប៉ាស៊ីហ្វិក។

តំណាងជាច្រើនបានសម្តែងការជឿជាក់ចំពោះការប្តេជ្ញាចិត្ត ការខិតខំប្រឹងប្រែងនិងលទ្ធផលរបស់វៀតណាមក្នុងការប្រយុទ្ធប្រឆាំងនឹងជំងឺរាតត្បាតកូវីដ -១៩ ដោយបញ្ជាក់ថា នឹងបន្តគាំទ្រក៏ដូចជា រួមដំណើរជាមួយវៀតណាមក្នុងកិច្ចខិតខំប្រឹងប្រែងរួមគ្នានេះ។

សិក្ខាសាលានេះ បានទាក់ទាញការចូលរួមពីថ្នាក់ដឹកនាំនិងតំណាងជាង ៤០ នាក់នៃសម្ព័ន្ធក្រុមហ៊ុននិងអង្គភាពអាជីវកម្មអាមេរិក ដែលកំពុងវិនិយោគឬចាប់អារម្មណ៍វិនិយោគនៅវៀតណាម ដូចជាក្រុមហ៊ុន Blackstone Group, Google, Facebook, Ford, UPS, Walmart ។ល។

ថ្លែងមតិនៅសិក្ខាសាលា ឯកអគ្គរដ្ឋទូតវៀតណាមប្រចាំនៅអាមេរិកលោក Ha Kim Ngoc បានចែករំលែកអំពីគោលនយោបាយ កិច្ចខិតខំប្រឹងប្រែងនិងសមិទ្ធផលរបស់វៀតណាមក្នុងការអភិវឌ្ឍសេដ្ឋកិច្ច ធ្វើបច្ចុប្បន្នភាព គោលនយោបាយអនុគ្រោះនិងទិសដៅថ្មីក្នុងការទាក់ទាញ វិនិយោគបរទេស។ លោកឯកអគ្គរដ្ឋទូតបានបញ្ជាក់ថា វៀតណាមត្រៀមខ្លួនជាស្រេចសម្រាប់ការសន្ទនាក្នុងន័យស្ថាបនា ដោះស្រាយបញ្ហាជំពាក់ជំពិននិងការលំបាក ធានាបរិយាកាសវិនិយោគប្រកបដោយស្ថិរភាពសម្រាប់អង្ភាពអាជីវកម្មអាមេរិក៕