គណៈប្រតិភូអ្នកកាសែតខេត្តឈៀងម៉ៃជួបធ្វើការជាមួយកាសែតសន្តិសុខរដ្ឋធានី។

អស់រយៈពេលជិត ១៥ ឆ្នាំកន្លងមក ចាប់តាំងពីសមាគមអ្នកកាសែតទីក្រុងហាណូយ និងសមាគមអ្នកកាសែតខេត្តឈៀងម៉ៃ ចុះហត្ថលេខាលើអនុស្សរណៈយោគយល់គ្នាស្ដីពីកិច្ចសហប្រតិបត្តិការ ភាគីទាំងពីរនៅតែរក្សាសកម្មភាពជាប្រចាំតាមរយៈការរៀបចំដំណើរទស្សនកិច្ចការងារទៅវិញទៅមក។ ជាពិសេស ភាគីទាំងពីរបានរៀបចំដំណើរទស្សនកិច្ចស្វែងយល់ពីបទពិសោធន៍របស់គ្នាទៅវិញទៅមកនៅប្រទេសថៃ និងទីក្រុងហាណូយ។ ចែករំលែកអំពីកិច្ចសហប្រតិបត្តិការរវាងសមាគមទាំងពីរ លោក Kieu Thanh Hung អនុប្រធានអចិន្ត្រៃយ៍នៃសមាគមអ្នកកាសែតទីក្រុងហាណូយបានឲ្យដឹងថា៖

“ចំណុចសំខាន់មួយនៃកិច្ចសហប្រតិបត្តិការរវាងសមាគមអ្នកកាសែតទីក្រុងហាណូយ និងសមាគមអ្នកកាសែតខេត្តឈៀងម៉ៃ គឺកាលពីជិត ១៥ ឆ្នាំមុន ប្រធានសមាគមអ្នកកាសែតថៃបានបំពេញដំណើរទស្សនកិច្ចនិងធ្វើការជាមួយសមាគមអ្នកកាសែតវៀតណាម។ អមដំណើរលោកប្រធាន មានប្រតិភូ ១-២ នាក់មកពីខេត្តឈៀងម៉ៃ។ តាមរយៈការជួបប្រាស្រ័យជាមួយសមាគមអ្នកកាសែតទីក្រុងហាណូយ យើងខ្ញុំមានសុឆន្ទៈជាមួយគ្នាទៅវិញទៅមក។ ហើយភាគីឈៀងម៉ៃបានលើកសំណើរចង់សហប្រតិបត្តិការជាមួយសមាគមអ្នកកាសែតហាណូយ ដូច្នេះយើងខ្ញុំបានយល់ស្របភ្លាមៗ។ នារដូវក្តៅឆ្នាំ ២០១០ ក្នុងឱកាសរំលឹកខួប ១០០០ ឆ្នាំនៃរាជធានី Thang Long-Hanoi រដ្ឋធានីហាណូយមានកម្មវិធីសហប្រតិបត្តិការ ធ្វើសមាហរណកម្មអន្តរជាតិជាច្រើន។ ហើយសមាគមអ្នកកាសែតទីក្រុងហាណូយបានចាប់ផ្តើមដាក់ពង្រាយនិងចុះហត្ថលេខាលើកិច្ចព្រមព្រៀងសហប្រតិបត្តិការជាមួយសមាគមអ្នកកាសែតខេត្តឈៀងម៉ៃចាប់តាំងពីពេលនោះមក”។

គណៈប្រតិភូអ្នកកាសែតខេត្តឈៀងមៃមកទស្សនាភូមិសិប្បកម្មសូត្រ Van Phuc។

ដំណើរទស្សនកិច្ចថ្មីបំផុតមកកាន់ទីក្រុងហាណូយរបស់សមាគមអ្នកកាសែតខេត្តឈៀងម៉ៃ ដែលប្រព្រឹត្តទៅចាប់ពីថ្ងៃទី ២០-២៦ ខែធ្នូ ឆ្នាំ ២០២៣ ក៏បានបន្សល់ទុកនូវចំណាប់អារម្មណ៍ល្អប្រសើរជាច្រើន។ គណៈប្រតិភូមានសមាជិកចំនួន ១២ នាក់ ដឹកនាំដោយលោក Amnat Jongyotying - ប្រធានសមាគមវិទ្យុ ទូរទស្សន៍ និងប្រព័ន្ធផ្សព្វផ្សាយព័ត៌មានខេត្តឈៀងម៉ៃ និងជាប្រធានសមាគមអ្នកកាសែតខេត្តឈៀងម៉ៃ បានមកធ្វើការនៅទីភ្នាក់ងារសារព័ត៌មានមួយចំនួននៅទីក្រុងហាណូយ។ គណៈប្រតិភូក៏បានទៅទស្សនាកេរ្តិ៍ដំណែលប្រវត្តិសាស្ត្រ និងគោលដៅទេសចរណ៍ល្បីល្បាញនៃទីក្រុងហាណូយ ដូចជា មណ្ឌលកេរ្តិ៍ដំណែល Van Mieu - Quoc Tu Giam ព្រះបរមរាជវាំងថាំងឡុង ភូមិសិប្បកម្មសូត្រ Van Phuc - Ha Dong និងភូមិសិប្បកម្មសេរ៉ាមិក Bat Trang។ លោក Amnat Jongyotying ប្រធានសមាគមអ្នកកាសែតខេត្តឈៀងម៉ៃបានឲ្យដឹងថា៖

“ទំនាក់ទំនងរវាងសមាគមអ្នកកាសែតខេត្តឈៀងម៉ៃ និងសមាគមអ្នកកាសែតទីក្រុងហាណូយគឺល្អណាស់។ មុនវិបត្តិកូវីដ-១៩ សមាគមអ្នកកាសែតហាណូយបានបំពេញទស្សនកិច្ចការងារនៅរាជធានីបាងកក និងខេត្តឈៀងម៉ៃ។ បន្ទាប់ពីជំងឺកូវីដ-១៩បានគ្រប់គ្រង សកម្មភាពទ្វេភាគីបានបន្តឡើងវិញ។ បន្ទាប់ពីដំណើរទស្សនកិច្ចនៅវៀតណាមម្តងៗ ហើយត្រឡប់មកប្រទេសវិញ យើងខ្ញុំសុទ្ធតែផ្សព្វផ្សាយព័ត៌មានតាមប្រព័ន្ធផ្សព្វផ្សាយរបស់ថៃ ដូចជាកាសែតក្រដាស់ និងកាសែតអនឡាញ។ កាលពីមុន នៅពេលដែលកាសែតក្រដាស់នៅតែមានប្រជាប្រិយភាព យើងខ្ញុំតែងតែបោះពុម្ពលើកាសែតក្រដាស ប៉ុន្តែឥឡូវនេះ ភាគច្រើនបង្ហោះលើកាសែតអនឡាញ”។

តាមរយៈដំណើរទស្សនកិច្ចផ្លាស់ប្តូរបទពិសោធន៍គ្នាទៅវិញទៅមក ភាគីទាំងពីរកំពុងឆ្ពោះទៅរកការកសាង និងអនុវត្តកម្មវិធីកិច្ចសហប្រតិបត្តិការកាន់តែជិតស្និទ្ធ និងមានប្រសិទ្ធភាពជាងមុន។ លោក Kieu Thanh Hung អនុប្រធានអចិន្ត្រៃយ៍នៃសមាគមអ្នកកាសែតទីក្រុងហាណូយបានឲ្យដឹងថា៖

“ក្នុងនិន្នាការសារព័ត៌មានទំនើបនាពេលបច្ចុប្បន្ន ប្រទេសថៃជាមួយនឹងនិន្នាការសារព័ត៌មានឯកជន និងការប្រើប្រាស់បច្ចេកវិទ្យាប្រកបដោយប្រសិទ្ធភាពនោះ ក៏បង្កើតឱកាសដ៏ល្អសម្រាប់សមាគមអ្នកកាសែតហាណូយដោយមានសមាជិក អ្នកសារព័ត៌មានជាង ៩០០ នាក់ ដើម្បីផ្លាស់ប្ដូរ សិក្សាពីគ្នាទៅវិញទៅមក។ ក្រៅពីការផ្លាស់ប្តូរជំនាញវិជ្ជាជីវៈ ភាគីទាំងពីរក៏បង្កើតលក្ខខណ្ឌសម្រាប់សមាជិក និងអ្នកសារព័ត៌មានទៅទស្សនាកេរ្តិ៍ដំណែលប្រវត្តិសាស្ត្រ កន្លែងទេសចរណ៍ប្រពៃណី ក៏ដូចជាគំរូសេដ្ឋកិច្ចធំៗ និងមជ្ឈមណ្ឌលនវានុវត្តន៍នៃប្រទេសនីមួយៗ ដើម្បីឲ្យមហាជន អ្នកសារព័ត៌មាននៃប្រទេសទាំងពីរ និងមិត្តភក្តិអន្តរជាតិជាទូទៅក៏អាចដឹងថា ទីក្រុងហាណូយ និងខេត្តឈៀងម៉ៃបានអភិវឌ្ឍន៍ ក្នុងនិន្នាការសមាហរណកម្មអន្តរជាតិបច្ចុប្បន្នយ៉ាងដូចម្ដ៉េច”។

សម្រាប់សមាជិកនៃគណៈប្រតិភូអ្នកកាសែតខេត្តឈៀងម៉ៃ ដំណើរទស្សនកិច្ចនៅទីក្រុងហាណូយម្ដងៗ សុទ្ធតែបន្សល់ទុកនូវចំណាប់អារម្មណ៍ដ៏ល្អប្រសើរអំពីទឹកដីនិងមនុស្សវៀតណាម។ ហើយនៅពេលត្រឡប់មកខេត្តឈៀងម៉ៃវិញ ពួកគេអះអាងថា នឹងឧទ្ទេសនាមអំពីលក្ខណៈពិសេសរបស់ហាណូយ និងវៀតណាមដល់ប្រជាជនថៃ។ លោកស្រី Ubolnapa Kengkrak ij បានចែករំលែកថា៖

“នេះជាលើកដំបូងដែលខ្ញុំមកវៀតណាម ហើយខ្ញុំចាប់អារម្មណ៍យ៉ាងខ្លាំងចំពោះការអភិវឌ្ឍយ៉ាងឆាប់រហ័សរបស់វៀតណាម និងវិស័យអប់រំ ក៏ដូចជាសេចក្ដីស្នេហាជាតិរបស់ជំនាន់វ័យក្មេង។ ពេលចូលគោរពវិញ្ញាណក្ខ័ន្ធលោកប្រធានហូជីមិញ ខ្ញុំបានមើលឃើញការរៀបចំប្រកបដោយរបៀបរៀបរយនិងសណ្ដាប់ធ្នាប់ ពេលមនុស្សទាំងអស់តម្រង់ជាជួរចូលទីនេះ។ ខ្ញុំបានអានឯកសារប្រវត្តិសាស្ត្រ ទស្សនាវដ្ដី ក៏ដូចជាមើលភាពយន្តអនឡាញអំពីវៀតណាម ហើយពេលមកដល់ទីនេះ ខ្ញុំយល់ឃើញថា ទីក្រុងហាណូយពិតជាទីក្រុងវប្បធម៌ដ៏ស្រស់ស្អាត។ ខ្ញុំក៏មានការចាប់អារម្មណ៍យ៉ាងខ្លាំងចំពោះទឹកចិត្តរបស់ប្រជាជនវៀតណាម ក៏ដូចជាទីភ្នាក់ងារសារព័ត៌មាននានាដែលបានទទួលស្វាគមន៍គណៈប្រតិភូអ្នកកាសែតឈៀងម៉ៃយ៉ាងយកចិត្តទុកដាក់ ហើយខ្ញុំពិតជានឹងចងចាំជារៀងរហូត។ ពេលអ្នកមកដល់ឈៀងម៉ៃ យើងខ្ញុំក៏ទទួលស្វាគមន៍អ្នកយ៉ាងល្អបែបនេះដែរ”។

ក្នុងផែនការអនុវត្តន៍កិច្ចសហប្រតិបត្តិការ សមាគមអ្នកកាសែតទីក្រុងហាណូយ និងសមាគមអ្នកកាសែតខេត្តឈៀងម៉ៃ នឹងផ្តោតសំខាន់លើការលើកកម្ពស់ប្រសិទ្ធភាពនៃយន្តការសហប្រតិបត្តិការដែលមានស្រាប់ ហើយបើកចេញនូវតម្រូវការសហប្រតិបត្តិការថ្មី ស្របតាមនិន្នាការនៃប្រទេសទាំងពីរ ក៏ដូចជាសមាគមអ្នកសារព័ត៌មានវៀតណាម-ថៃទាំងពីរក្នុងនិន្នាការសមាហរណកម្មអន្តរជាតិផងដែរ៕