ອາກາດແດດຮ້ອນອົບເອົ້າ ໄດ້ເຮັດໃຫ້ບໍ່ວ່າຜູ້ໃດ ກໍຫວັງຢາກໄປທ່ຽວທະເລເພື່ອອາບນ້ຳທີ່ຂຽວເຢັນ. ແລະ ຟູ້ກ໋ວກແມ່ນສະຖານທີ່ທ່ອງທ່ຽວທີ່ຈັບອົກຈັບໃຈສຳລັບແຂກທ່ອງທ່ຽວໃນຍາມລະດູຮ້ອນ. ຢູ່ຟູ້ກ໋ວກມີບັນດາຫາດຊາຍທະເລຂາວຍາວຢຽດຈົນສຸດສາຍຕາ, ມີນ້ຳທະເລຂຽວ ແລະ ໃສເຢັນພ້ອມກັບອາຫານທະເລທີ່ແຊບນົວ.
ເກາະຟູ້ກ໋ວກ, ສະຖານທີ່ທ່ອງທ່ຽວທີ່ຈັບໃຈໃນຍາມລະດູຮ້ອນ |
ເກາະຟູ້ກ໋ວກ ຂຶ້ນກັບແຂວງກຽນຢາງ ແມ່ນເກາະໃຫຍ່ກວ່າໝູ່ຂອງຫວຽດນາມ ໂດຍທຳມະຊາດໄດ້ດົນບັນດານດ້ວຍທິວທັດທຳມະຊາດທີ່ສວຍສົດງົດງາມ ແລະ ຊັບພະຍາກອນທຳມະຊາດທີ່ອຸດົມສົມບູນ. ມາຢ້ຽມຢາມເກາະຟູ້ກ໋ວກ, ແຂກທ່ອງທ່ຽວທັງຫຼາຍຈະມີຊີວິດໃນທ່າມກາງຄວາມສະຫງົບງຽບ. ໂດຍມີຄວາມແຕກຕ່າງກັບບັນດາສະຖານທີ່ທ່ອງທ່ຽວທີ່ຟົດຟື້ນອື່ນໆດ້ວຍການບໍລິການລະຫຼິ້ນບັນເທິງຫຼາຍຢ່າງເຊັ່ນ: ຍາຈາງ, ດານັ້ງ, ເກາະຟູ້ກ໋ວກດ້ວຍບັນດາຫາດຊາຍທະເລທີ່ສວຍງາມດັ່ງໃນຝັນ, ມີບັນຍາກາດມິດງຽບ ຊຶ່ງເປັນການສ້າງຄວາມແຕກຕ່າງກັບເຂດອື່ນຢ່າງຈະແຈ້ງ. ນາງ Bella ແຂກທ່ອງທ່ຽວຊາວສະວິດ ໃຫ້ຮູ້ວ່າ :
“ ຂ້າພະເຈົ້າມັກເກາະຟູ້ກ໋ວກທີ່ສຸດ ເພາະຄວາມສະໜິດສະໜົມ ແລະ ຈິດໃຈຮັກແພງແຂກຂອງປະຊາຊົນຢູ່ແຫ່ງນີ້. ເກາະແຫ່ງນີ້ ສວຍງາມທີ່ສຸດ ແລະ ເປັນໜ້າຈັບອົກຈັບໃຈແທ້”
ບັນດາໂຮງແຮມໃນເກາະຟູ້ກ໋ວກສ່ວນຫຼວງຫຼາຍຖືກປຸກສ້າງຢູ່ຫາດຊາຍຢາຍ ຊຶ່ງແມ່ນຫາດຊາຍທີ່ກ້ວາງໃຫຍ່ກວ່າໝູ່ໃນເກາະ. ຫາດຊາຍຢາຍມີນ້ຳທະເລໃສ ແລະ ຂຽວເຢັນ. ຫາດຊາຍຢາຍຂອງເກາະຟູ້ກ໋ວກມີທ່າໄດ້ປຽບແມ່ນສະຖານທີ່ທ່ອງທ່ຽວທຳມະຊາດທີ່ຮົກເຮື້ອຍັງບໍ່ທັນຖືກຜົນສະທ້ອນຫຼາຍຈາກຂະແໜງອຸດສາຫະກຳບໍ່ມີຄວັນ. ຍ້ອນເຫດນີ້ເອງ, ໄດ້ສ້າງຄວາມເປັນເອກະລັກສະເພາະ ດຶງດູດແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດຢ່າງຫຼວງຫຼາຍ. ຫາດຊາຍຢາຍຢູ່ເມືອງເກາະຟູ້ກ໋ວກ ແມ່ນເຄີຍໄດ້ຮັບການເລືອກເຟັ້ນຈາກສຳນັກຂ່າວສານ ABC News ແມ່ນຢືນອັນດັບໜຶ່ງໃນຈຳນວນຫາດຊາຍ 5 ແຫ່ງທີ່ສວຍງາມ ແລະ ສະອາດກວ່າໝູ່ໃນໂລກ. ນອກຈາກຫາດຊາຍຢາຍແລ້ວ, ຫາດຊາຍຊາວແມ່ນນອນຢູ່ທາງທິດໃຕ້ຂອງເກາະ. ຫາດຊາຍຊາວຫ່າງຈາກໃຈກາງເທດສະບານເມືອງເຢືອງດົງ, ຟູ້ກ໋ວກ, ກຽນຢາງປະມານ 25 ກິໂລແມັດ. ມາຢ້ຽມຢາມຫາດຊາຍຊາວ ແຂກທ່ອງທ່ຽວຈະຫຼົງໄຫຼກັບຄວາມງາມແບບຮົກເຮື້ອຂອງທະເລດ້ວຍ ຫາດຊາຍຂາວຍາວຢຽດຈົນສຸດສາຍຕາ, ນ້ຳທະເລໃສ ແລະ ຂຽວງາມຕະຫຼອດປີ. ຫາດຊາຍຊາວກໍແມ່ນສະຖານທີ່ທ່ອງທ່ຽວທີ່ດູດດື່ມສຳລັບແຂກທ່ອງທ່ຽວເມື່ອມາຢ້ຽມຢາມ ເກາະຟູ້ກ໋ວກໃນຍາມຮ້ອນ. ມາແຫ່ງນີ້, ແຂກທ່ອງທ່ຽວຈະມີໂອກາດສູບເອົາອາກາດທີ່ປອດໂປ່ງໃນເຂດທະເລ ແລະ ປ່າໄມ້ທີ່ກ້ວາງໃຫຍ່ໄພສານ. ນາງ Lilian ແຂກທ່ອງທ່ຽວຊາວໂຮນລັງ ໃຫ້ຮູ້ວ່າ :
“ ຈາກນະຄອນໂຮ່ຈິມິນ, ພວກຂ້າພະເຈົ້າຂີ່ເຮືອບິນໄປຍັງເກາະຟູ້ກ໋ວກ, ຄວາມປະທັບໃຈທຳອິດຂອງຂ້າພະເຈົ້າແມ່ນເກາະມີຫາດຊາຍຂາວ. ພວກຂ້າພະເຈົ້າໄດ້ເລີ່ມຢ່ອນອາລົມດ້ວຍການໄປອາບນ້ຳທະເລ ແລະ ຕາກອາກາດເພື່ອຮູ້ສຶກເຖິງອາກາດທີ່ດີຢູ່ແຫ່ງນີ້. ຂ້າພະເຈົ້າມັກໄປທ່ອງທ່ຽວຢູ່ແຫ່ງນີ້ທີ່ສຸດ ”
ປີ 2016, ແຂວງກຽນຢາງໄດ້ຮັບເລືອກເປັນຫົວໜ່ວຍເປັນເຈົ້າພາບຈັດຕັ້ງປີທ່ອງທ່ຽວແຫ່ງຊາດ 2016 - ຟູ້ກ໋ວກ - ເຂດທົ່ງພຽງແມ່ນ້ຳຂອງຕອນພາກໃຕ້ຫວຽດນາມດ້ວຍຫົວເລື່ອງ : “ ຄົ້ນຫາດິນແດນພາກໃຕ້ ” ແລະ ຟູ້ກ໋ວກແມ່ນແຫ່ງດຳເນີນບັນດາການເຄື່ອນໄຫວຈຸດສຸມ. ແລະ ກໍໃນປີນີ້, ຟູ້ກ໋ວກສືບຕໍ່ຢັ້ງຢືນທີ່ຕັ້ງແມ່ນສະຖານທີ່ທ່ອງທ່ຽວ, ພັກຜ່ອນບຳລຸງສຸຂະພາບລະດັບຊາດ, ພາກພື້ນ ແລະ ສາກົນຂະນະທີ່ມີສາຍການບິນຢູ່ພາຍໃນປະເທດ ແລະ ສາກົນຫຼາຍສາຍໄດ້ ເຄື່ອນໄຫວຢ່າງຕໍ່ເນື່ອງ. ທ່ານຮີ່ງກວາງຮຶງ ຮອງປະທານຄະນະກຳມະການປະຊາຊົນເມືອງ ເກາະຟູ້ກ໋ວກໃຫ້ຮູ້ວ່າ :
“ ໃນປະຈຸບັນ, ດ້ວຍສາຍການບິນພາຍໃນປະເທດບາງສາຍເຊັ່ນ: ຮ່າໂນ້ຍ- ຟູ້ກ໋ວກ, ນະຄອນໂຮ່ຈິມິນ - ຟູ້ກ໋ວກ, ເກີນເທີ - ຟູ້ກ໋ວກ, ສະເລ່ຍໃນແຕ່ລະວັນມີ 20 ຫາ 22 ຖ້ຽວບິນ. ປະຈຸບັນ, ພວມພະຍາຍາມເຊື່ອມຕໍ່ກັບສາຍການບິນສາກົນຄື : ຟູ້ກ໋ວກ - ສິງກະໂປ, ຟູ້ກ໋ວກ - ກຳປູເຈຍ, ຟູ້ກ໋ວກ - ຈີນ, ຟູ້ກ໋ວກ - ລັດເຊຍ. ໃນປີ 2016 ມີບໍລິສັດການບິນສາກົນຫຼາຍບໍລິສັດໄດ້ຈົດທະບຽນ ແລະ ເປີດສາຍການບິນໃໝ່ ”
ເກາະຟູ້ກ໋ວກ ມີສະພາບແວດລ້ອມທີ່ໃສສະອາດ, ມີທິວທັດທຳມະຊາດຮົກເຮື້ອ ແລະ ພວມປ່ຽນແປງ ແລະ ຂະຫຍາຍຕົວຢ່າງແຂງແຮງເທື່ອລະກ້າວ, ຈາກສະໜາມບິນ, ທາງຄົມມະນາຄົມຕະຫຼອກຮອດເຂດ ຣີສອດ ທີ່ທັນສະໄໝໄດ້ປະກົດຕົວຢ່າງຫຼວງຫຼາຍ. ປີ 2016 ເກາະຟູ້ກ໋ວກ ແມ່ນສະຖານທີ່ທ່ອງທ່ຽວທີ່ດູດດື່ມທີ່ສຸດສຳລັບແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດຍ້ອນມີບັນດາທິວທັດທຳມະຊາດທີ່ລືຊື່, ນັບມື້ນັບຂະຫຍາຍຕົວ ສາມາດທຽບເທົ່າກັບບັນດາສະຖານທີ່ທ່ອງທ່ຽວທີ່ລືຊື່ຂອງໂລກ.