(vovworld) - ເນື່ອງໃນໂອກາດສະເຫຼີມສະຫຼອງ 67 ປີແຫ່ງວັນຊາດຫວຽດນາມ (2/9/1945 – 2/9/2012), ຕອນເຊົ້າວັນທີ 1/9, ຄະນະຜູ້ແທນພັກ, ລັດ, ກອງທັບ, ລັດຖະບານ, ຄະນະກຳມະການແນວໂຮມປະເທດຊາດຫວຽດນາມ ໄດ້ໄປວາງພວງມາລາ ແລະ ຈັດຕັ້ງພິທີອາໄລຫາລະດັບຊາດ ຢູ່ສຸສານປະທານໂຮ່ຈິມິນ ທີ່ນະຄອນຫຼວງຮ່າໂນ້ຍ. ເຂົ້າຮ່ວມພິທີອາໄລຫາມີທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong, ທ່ານອະດິດເລຂາທິການໃຫຍ່ Le Kha phieu, ທ່ານ Nong Duc Manh, ທ່ານປະທານປະເທດ Truong Tan Sang, ອະດິດປະທານປະເທດ Tran Duc Luong, ທ່ານນາຍົກລັດຖະມົນຕີ Nguyen Tan Dung, ທ່ານປະທານສະພາແຫ່ງຊາດ Nguyen Sinh Hung, ອະດິດປະທານສະພາແຫ່ງຊາດ Nguyen Van An ພ້ອມກັບບັນດາກຳມະການກົມການເມືອງ, ເລຂາສູນກາງພັກ, ຮອງປະທານປະເທດ, ຮອງນາຍົກລັດຖະມົນຕີ, ຮອງປະທານສະພາແຫ່ງຊາດ ແລະ ບັນດານັກປະຕິວັດອະວຸໂສ. ບັນດາຜູ້ແທນໄດ້ສະແດງຄວາມຮູ້ບຸນຄຸນຕໍ່ຜູ້ນຳທີ່ແສນເຄົາລົບຮັກ, ນັກວິລະຊົນປົດປ່ອຍຊາດ, ເປັນອາຈານທີ່ຍິ່ງໃຫຍ່ຂອງການປະຕິວັດຫວຽດນາມ, ເພີ່ນໄດ້ອຸທິດສ່ວນຕະຫຼອດຊີວິດຂອງຕົນເພື່ອເອກະລາດ, ເສລີພາບຂອງປະເທດຊາດ ແລະ ຄວາມຜາສຸກຂອງປະຊາຊົນ. ພາຍຫຼັງພິທີ່ອາໄລຫາ, ບັນດາຜູ້ແທນໄດ້ຖະຫວາຍດອກໄມ້, ທູບທຽນບຊາຢູ່ອານຸສາວະລີບັນດານັກຮົບທີ່ເສຍສະຫຼະຊີວິດເພື່ອຊາດ.
ແລະກໍໃນຕອນເຊົ້າຂອງວັນດຽວກັນ, ຄະນະພັກການທະຫານສູນກາງ, ຄະນະພັກຕຳຫຼວດສູນກາງ - ກະຊວງຕຳຫຼວດ; ຄະນະຜູ້ແທນກະຊວງການຕ່າງປະເທດ, ຄະນະທູຕານຸທູດ, ຄະນະຜູ້ແທນຄະນະພັກນະຄອນ, ສະພາປະຊາຊົນນະຄອນຮ່າໂນ້ຍ ໄດ້ເຂົ້າຢ້ຽມສຸສານປະທານ ໂຮ່ຈິມິນ ແລະ ຖະຫວາຍທູບທຽນອາໄລຫານັກຮົບທີ່ເສຍສະຫຼະຊີວິດເພື່ອຊາດ.