ພາຍຫຼັງທີ່ໄດ້ຮັບຂ່າວວ່າ ພາຍຸ Yagi ໃກ້ຈະພັດຖະຫຼົ່ມ, ການນຳຂອງ VOV ໄດ້ຈັດກອງປະຊຸມດ່ວນແລະຕົກລົງລະດົມບັນດາພາຫະນະແລະເຕັກນິກດີທີ່ສຸດ, ສົ່ງນັກຂ່າວທີ່ເກັ່ງທີ່ສຸດໄປໜູນຊ່ວຍ 2 ຫ້ອງການຜູ້ຕາງໜ້າ VOV ປະຈຳເຂດຕາເວັນອອກສ່ຽງເໜືອແລະຕາເວັນຕົກສ່ຽງເໜືອເຊິ່ງເປັນບ່ອນທີ່ພາຍຸດັ່ງກ່າວຈະສົ່ງຜົນກະທົບໂດຍກົງເພື່ອເກັບຂ່າວໃນສະພາບໄພທຳມະຊາດທີ່ເກີດຂຶ້ນຢ່າງຮ້າຍແຮງ.

ໃນສະພາບອາກາດທີ່ ມີຝົນຕົກ, ພາຍຸ, ນ້ຳຖ້ວມ, ຖັນແຖວນັກຂ່າວຂອງVOV ໄດ້ມີໜ້າຢ່າງທັນການຢູ່ເຂດທີ່ຫຍຸ້ງຍາກແລະອາກາດມີການຜັນແປອັນຕະລາຍທີ່ສຸດຢູ່ບັນດາແຂວງກາວບັ່ງ, ບັກກ້ານ, ລ້າງເຊີນ, ລ່າວກາຍ, ອຽນບ໊າຍ… ອັດເດດຂໍ້ມູນຂ່າວກ່ຽວກັບສະພາບການດິນເຊາະເຈື່ອນ, ວຽກງານກູ້ໄພກູ້ຊີບ, ຊ່ວຍເຫຼືອປະຊາຊົນຢ່າງຕໍ່ເນື່ອງ.

ນັກຂ່າວ VOV2 ເກັບຂ່າວຢູ່ແຂວງ ຕວຽນກວາງ

ບັນດານັກຂ່າວໄດ້ເຄື່ອນໄຫວໃນເງື່ອນໄຂ 3 ບໍ່: ບໍ່ມີໄຟຟ້າ, ບໍ່ສາມາດຕິດຕໍ່ສື່ສານ, ບໍ່ມີນ້ຳສະອາດ; ແລະໄດ້ຜ່ານຜ່າຈຸດເວລາອັນຕະລາຍບໍ່ຈັກວ່າເທົ່າໃດຄັ້ງເມື່ອອ້ອມຂ້າງມີຕົ້ນໄມ້ລົ້ມຫັກ, ປ້າຍໂຄສະນາ, ປ່ອງຢ້ຽມແກ້ວຂອງຕຶກອາຄານຕ່າງໆກໍຖືກແຮງລົມພັດອອກໄດ້ແບບງ່າຍໆ, ຊ້ຳບໍ່ໜຳ ອາດຈະຖືກລົມຝົນພັດເອົາຕົນເອງໄປນຳຕອນໃດກໍ່ບໍ່ຮູ້ເມື່ອ… ແຕ່ເຂົາເຈົ້າຍັງພະຍາຍາມເພື່ອຮັບປະກັນຄວາມປອດໄພໃນຂະນະເກັບຂ່າວແລະສົ່ງຂ່າວກັບມາສູນບັນນາທິການໃຫ້ໄດ້ໄວທີ່ສຸດເທົ່າທີ່ຈະໄວໄດ້. ນັກຂ່າວຫວູມ່ຽນແລະນັກຂ່າວຮວ່າງກວາງຮຸຍເລົ່າຄືນສູ່ຟັງວ່າ:

ນັກຂ່າວຫງວຽນດິ່ງຮວ່ານ, ສັງກັດໂທລະພາບເຕັກນິກດີຈີຕອນ VTC ເກັບຂ່າວຢູ່ ລາວກາຍ

ໂດຍເປັນຜູ້ທີ່ມີໜ້າຢູ່ສະຖານທີ່ຕົວຈິງ, ບັນດານັກຂ່າວກໍແມ່ນບຸກຄົນທີ່ເຂົ້າໃຈເລິກເຖິງຄວາມເຈັບປວດ, ຄວາມສູນເສຍເຊິ່ງປະຊາຊົນເຂດຖືກໄພທຳມະຊາດພວມປະເຊີນໜ້າແມ່ນໜັກໜ່ວງຂະໜາດໃດ. ນັກຂ່າວຫງວຽນດິ່ງຮວ່ານ, ສັງກັດໂທລະພາບເຕັກນິກດີຈີຕອນ VTC ເລົ່າຄືນສູ່ຟັງວ່າ:

“ຊ່ອງໂທລະພາບ VTC14 ມີທັງໝົດ 10 ທິມງານລົງເອົາຂ່າວໃນພາຍຸ Yagi ແລະຝົນຕົກນ້ຳຖ້ວມ. ຂ້າພະເຈົ້າໄດ້ລົງເອົາຂ່າວຢູ່ແຂວງລ່າວກາຍແລະອຽນບ໊າຍ. ທຳອິດ, ຂ້າພະເຈົ້າເອົາຂ່າວຢູ່ແຂວງ ອຽນບ໊າຍເຊິ່ງເປັນແຂວງທີ່ເກີດຝົນຕົກ, ດິນເຊາະເຈື່ອນຢ່າງຮ້າຍແຮງທີ່ສຸດ. ແຕ່ພາຍຫຼັງທີ່ຮູ້ຂ່າວວ່ານ້ຳໄຫຼຊຸໄດ້ກວາດລ້າງໝູ່ເຮືອນທຸກຫຼັງຢູ່ໃນໝູ່ບ້ານ ໜູ ຢູ່ແຂວງລ່າວກາຍເຮັດໃຫ້ປະຊາຊົນນັບຮ້ອຍຄົນເສຍຊີວິດແລະຫາຍສາບສູນ, ພວກຂ້າພະເຈົ້າໄດ້ເດີນທາງໄປສະຖານທີ່ນັ້ນໃນທັນທີ. ເມື່ອມາຮອດ, ພວກຂ້າພະເຈົ້າຕົກສະລຶງແລະຮູ້ສຶກເຈັບປວດທີ່ສຸດເມື່ອເຫັນພາບປະຫຼັກຫັກພັງບໍ່ເຫຼືອຈັກຢ່າງຢູ່ທີ່ນັ້ນ. ນັ້ນກໍແມ່ນຮູບພາບທີ່ເຈັບປວດທີ່ສຸດ. ພວກຂ້າພະເຈົ້າກໍໄດ້ເຫັນວ່າກຳລັງກູ້ໄພກູ້ຊີບໄດ້ມານະພະຍາຍາມຂະໜາດໃດ”.

ໃນສະພາບທີ່ຖືກຕັດຂາດກັບພາຍນອກຢ່າງສິ້ນເຊີງຍ້ອນພາຍຸນ້ຳຖ້ວມນັ້ນ, ພິເສດແມ່ນເມື່ອນ້ຳຍິ່ງຂຶ້ນສູງ, ຕ້ອງ ຕັດ ໄຟເພື່ອຮັບປະກັນຄວາມປອດໄພ, ປະຊາຊົນຢູ່ເຂດຖືກຜົນກະທົບຈາກພາຍຸເກືອບຄືວ່າບໍ່ມີໂທລະພາບ, ບໍ່ມີແສງໄຟ, ສັນຍານອິນເຕີເນັດກໍຖືກຢຸດສະງັກ, ແບັດໂທລະສັບໝົດ, ເວລານີ້, ວິທະຍຸແມ່ນແຫຼ່ງສະໜອງຂໍ້ມູນຫຼັກແຫຼ່ງແລະເປັນທາງການທີ່ສຸດ, ໃຫ້ການຊ່ວຍເຫຼືອປະຊາຊົນທຸກຄົນ. ໃນຄື້ນກະຈາຍສຽງຂອງVOV, ບັນດາລາຍການຂ່າວພະຍາກອນ, ກ່າວເຕືອນບັນດາສະພາບອາກາດທີ່ຜິດປົກກະຕິ, ຄຳຊີ້ນຳໂດຍດ່ວນກ່ຽວກັບພາຍຸນ້້ຳຖ້ວມຈາກສູນກາງໄດ້ອອກອາກາດຢ່າງຕໍ່ເນື່ອງດ້ວຍຄວາມຖີ່ອັນໜາແໜ້ນ. ນອກຈາກນັ້ນແລ້ວຍັງແນະນຳປະຊາຊົນກ່ຽວກັບວິທີຮັບມື ແລະຮັບປະກັນຄວາມປອດໄພໃນລະດູນ້ຳຖ້ວມນີ້ອີກດ້ວຍ. ສຳລັບພໍ່ແມ່ພີ່ນ້ອງຊາວເຜົ່າສ່ວນໜ້ອຍຢູ່ເຂດພູສູງລອງແຮະ, ເມືອງທ້ວນເຈົາ, ແຂວງເຊີນລາ, ໃນນັ້ນມີອ້າຍວື່ອາທົ໊ງ, ນີ້ແມ່ນໜຶ່ງໃນບັນດາຊ່ອງຂໍ້ມູນຂ່າວທີ່ສຳຄັນ.

“ພໍ່ແມ່ພີນ້ອງບັນດາເຜົ່າຢູ່ເຂດພູສູງພວກຂ້າພະເຈົ້າໄດ້ຟັງລາຍການເປັນປະຈຳ, ຍ້ອນວ່າບາງເທື່ອບໍ່ມີອິນເຕີເນັດແລະບໍ່ສາມາດເບິ່ງໂທລະພາບ… ໂດຍສະເພາະແມ່ນໃນຊຸມວັນເກີດນ້ຳຖ້ວມນີ້, ລາຍການຂ່າວຂອງວິທະຍຸ ໄດ້ໃຫ້ຂ່າວກ່ຽວກັບສະພາບການເລື້ອຍໆເພື່ອໃຫ້ພວກຂ້າພະເຈົ້າກຳໄດ້ແລະເປັນເຈົ້າການປ້ອງກັນ, ປົກປ້ອງຊີວິດ, ຊັບສິນຂອງຄອບຄົວ

ໃນກອງປະຊຸມກົມການເມືອງຊີ້ນຳວຽກງານແກ້ໄຂຜົນຮ້າຍຢ້ອນຫຼັງຈາກພາຍຸ Yagi ໃນວັນທີ 9 ກັນຍາຜ່ານມາ, ທ່ານເລຂາທິການໃຫຍ່, ປະທານປະເທດຫວຽດນາມໂຕເລິມຕີລາຄາວ່າ:

“ບັນດາກຳລັງ, ພິເສດແມ່ນກອງທັບ, ຕຳຫຼວດ, ອົງການພະຍາກອນອາກາດ, ບັນດາຂະແໜງກະສິກຳຊົນນະບົດ, ຄົມມະນາຄົມ, ໄຟຟ້າ, ບັນດາອົງການສື່ມວນຊົນ, ໂທລະພາບ, ວິທະຍຸກະຈາຍສຽງຫວຽດນາມໄດ້ປະຕິບັດຄຳຊີ້ນຳຢ່າງຂ້ຽວຂາດໃກ້ຊິດແລະລະດົມແຫຼ່ງກຳລັງຢ່າງສູງສຸດ, ເປັນເຈົ້າການຮັບມືແຕ່ໄວແຕ່ໄກແລະແກ້ໄຂຜົນຮ້າຍຢ້ອນຫຼັງຢ່າງທັນການ. VOV ປະຕິບັດຄຳແນະນຳ, ອັດເດດຂ່າວໃນແຕ່ລະຊົ່ວໂມງແລະ ສື່ຂ່າວໄດ້ຢ່າງກວ້າງຂວາງ”.

ຄວາມມານະພະຍາຍາມຢ່າງບໍ່ຢຸດຢັ້ງຂອງຖັນແຖວນັກຂ່າວ VOV ໄດ້ປະກອບສ່ວນຮັບປະກັນວຽກງານສື່ຂ່າວກ່ຽວກັບໄພທຳມະຊາດ, ໄພນ້ຳຖ້ວມໃນທຸກແຟຼດຟອມສື່ມວນຊົນ, ຜ່ານນັ້ນ ກໍ່ປະກອບສ່ວນຊ່ວຍປະຊາຊົນຫຼຸດຜ່ອນຄວາມເສຍຫາຍໃນໄລຍະເກີດໄພທຳມະຊາດຜ່ານມາ./.