(vovworld)- ວັນທີ 9/7, ຫວຽດນາມ ແລະ ລາວຈັດຕັ້ງພິທີຊົມເຊີຍວຽກງານປັກຫລັກໝາຍຊາຍແດນລະຫວ່າງສອງປະເທດໃນພື້ນທີ່ຕົວຈິງສຳເລັດ ແລະ ເປີດສະຫລອງຫລັກໝາຍສຸດທ້າຍ ເລກ 460 ຢູ່ ດ່ານຊາຍແດນ ແທນຖູຍ (ເຫງ້ອານ) ແລະ ນ້ຳອອນ (ແຂວງ ບໍລິຄຳໄຊ) ຂອງ ສປປ ລາວ, ພາຍໃຕ້ການເປັນສັກຂິພິຍານຂອງທ່ານນາຍົກລັດຖະມົນຕີ ສອງປະເທດ. ນີ້ແມ່ນເຫດການມີລັກສະນະປະຫວັດສາດ ເພາະວ່ານັບແຕ່ນີ້ເປັນຕົ້ນໄປ ປະຊາຊົນສອງປະເທດມີເສັ້ນຊາຍແດນຖາວອນ, ປະກອບສ່ວນສຳຄັນເພື່ອໃຫ້ສອງປະເທດພ້ອມກັນປັບປຸງການປ້ອງກັນຊາດປ້ອງກັນຄວາມສະຫງົບ, ສ້າງເງື່ອນໄຂສະດວກໃຫ້ແກ່ການສ້າງສາ ແລະ ພັດທະນາເສດຖະກິດ ສັງຄົມ ຢູ່ເຂດຊາຍແດນ. ເນື່ອງໃນໂອກາດນີ້, ແອງຮ່ວຽນ ນັກຂ່າວວິທະຍຸກະຈາຍສຽງ ຫວຽດນາມ ມີບົດຂຽນທີ່ພາດຫົວເລື່ອງວ່າ: ໄມຕິຈິດມິດຕະພາບຫວຽດນາມ ລາວ.
ພິທີເປີດສະຫລອງຫລັກໝາຍ 635
ຢູ່ດ່ານຊາຍແດນ ກວ໋າງຈີ້ -ສະຫວັນນະເຂດ
ພາບ:chinhphu.vn
|
ຊາຍແດນ ຫວຽດນາມ - ລາວ ມີຄວາມຍາວກວ່າ 2.063 ກິໂລແມັດ, ຕິດກັບ 10 ແຂວງ ຂອງຫວຽດນາມ ແລະ 10 ແຂວງ ຂອງລາວ. ວັນທີ 18/7/1977, ສົນທິສັນຍາວ່າດ້ວຍກຳນົດເສັ້ນຊາຍແດນລະຫວ່າງ ສສ ຫວຽດນາມ ແລະ ສປປ ລາວ ໄດ້ຮັບການລົງນາມ. ຕົ້ນປີ 1987, ສອງປະເທດປະຕິບັດວຽກງານຂີດເສັ້ນຊາຍແດນໃນເສັ້ນຊາຍແດນທັງໝົດສຳເລັດໂດຍພື້ນຖານ ດ້ວຍ 214 ຫລັກໝາຍໄດ້ຮັບການກໍ່ສ້າງດ້ວຍເສົາເບຕົງ. ລະບົບຫລັກໝາຍນີ້ໄດ້ຢືນຢັນຄວາມເໝາະສົມກັບຄວາມຈິງຂອງເສັ້ນຊາຍແດນ, ກົດໝາຍສາກົນ ແລະ ແມ່ນພື້ນຖານດ້ານກົດໝາຍສຳຄັນເພື່ອໃຫ້ສອງລັດ ຫວຽດນາມ ແລະ ລາວ ປະຕິບັດການຄຸ້ມຄອງ, ປົກປັກຮັກສາຊາຍແດນ ແລະ ໄດ້ຮັບການເຄົາລົບຈາກປະຊາຊົນ, ອຳນາດການປົກຄອງທຸກຂັ້ນຂອງສອງຝ່າຍ. ເຖິງຢ່າງໃດກໍຕາມ, ເພື່ອກໍ່ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ສະຖຽນລະພາບ ແລະ ການຮ່ວມມືຍາວນານລະຫວ່າງສອງປະເທດ, ບົນພື້ນຖານສະເຫມີພາບ, ເຄົາລົບເອກະລາດ, ອະທິປະໄຕ ແລະ ຜືນແຜນດິນອັນຄົບຖ້ວນຂອງແຕ່ລະປະເທດ, ວັນທີ 30/1/2008, ລັດຖະບານ ສອງປະເທດ ຫວຽດນາມ ແລະ ລາວ ເປັນເອກະພາບສົມທົບກັນກໍ່ສ້າງ ແລະ ປະຕິບັດ “ໂຄງການປັກຫລັກໝາຍຖີ່ ແລະ ບູລະນະລະບົບຫລັກໝາຍຂອງປະເທດຊາດ ຫວຽດນາມ - ລາວ”.ໄລຍະປະຕິບັດໂຄງການແມ່ນແກ່ຍາວຮອດປີ2014.
ໃນໄລຍະກວ່າ 6 ປີຜ່ານມາ, ດ້ວຍຄວາມມານພະຍາຍາມ, ຜ່ານຜ່າຄວາມຫຍຸ້ງຍາກລຳບາກ ຍ້ອນອາກາດຮ້າຍແຮງ, ພູມສັນຖານທຸລະກັນດານ ແຕ່ພາຍໃຕ້ການຊີ້ນຳນຳພາຢ່າງໃກ້ຊິດຂອງລັດຖະບານສອງປະເທດ ພ້ອມກັບການປະສານສົມທົບຢ່າງແຫນ້ນແຟ້ນແລະຄວາາມມານະພະຍາຍາມລວມຂອງບັນດາກະຊວງ, ຂະແຫນງການ, ທ້ອງຖິ່ນກ່ຽວຂ້ອງສອງປະເທດ, ມາຮອດປະຈຸບັນ ສອງຝ່າຍໄດ້ປະຕິບັດວຽກງານກໍ່ສ້າງລະບົບຫລັກໝາຍດ້ວຍຫີນແກ້ວກ່ອນກຳນົດເວລາ ດ້ວຍ 793ຈຸດ,ເທົ່າກັບ 835 ຫລັກໝາຍ. ເລື່ອງປັກຫລັກໝາຍຖີ່ ແລະ ບູລະນະຫລັກໝາຍປະເທດຊາດ ຮັບປະກັນຄວາມໝັ້ນຄົງ ແລະ ຕອບສະຫນອງບັນດາມາດຖານເໝາະສົມກັບທຳນຽມສາກົນ.
ຊື່ງແມ່ນແຂວງຫນຶ່ງມີເສັ້ນຊາຍແດນຕິດກັບ ລາວ ຫລາຍສຸດ, ໃນຕະຫລອດປີຜ່ານມາ, ດ້ວຍຈິດໃຈເປັນເຈົ້າການ, ຕັດສິນໃຈສູງ, ແຂວງ ຮ່າຕິ້ງ ໄດ້ມາພະຍາຍາມຜັນຂະຫຍາຍໂຄງການບູລະນະ, ປັກຫລັກໝາຍຖີ່ລະບົບຫລັກໝາຍຊາຍແດນຫວຽດນາມ-ລາວຢ່າງມີປະສິດທິຜົນ, ຈາກຂອດດຳເນີນການສຳຫລວດ, ວັດແທກ, ກຳນົດທີ່ຕັ້ງຢ່າງຊັດເຈນຕະຫລອດຮອດການສ້າງແຜນການບູລະນະ, ປັກຫລັກໝາຍຖີ່ນ ພ້ອມທັງເພີ່ມທະວີວຽກງານລາດຕະເວນເສັ້ນຊາຍແດນ. ພັນໂທ ຫງວຽນຮູຍຈູງ, ຫົວຫນ້າເສນາທິການທະຫານປ້ອງກັນຊາຍແດນຂແວງ ຮ່າຕິ້ງ, ຫົວຫນ້າກົງປັກຫລັກໝາຍແຂວງ ຮ່າຕິ້ງ ໃຫ້ຮູ້ວ່າ:
“ຍ້ອນມີການປະສານສົມທົບລະຫວ່າງບັນດາກຳລັງປັກຫລັກໝາຍຂອງແຂວງ ຮ່າຕິ້ງ, ແຂວງ ບໍລິຄຳໄຊ, ໂດຍມີການຊີ້ນຳຂອງຄະນະຊີ້ນຳປັກຫລັກໝາຍຂອງແຂວງ, ທະຫານປ້ອງກັນຊາຍແດນ ໄດ້ສົມທົບກຳນົດທີ່ຕັ້ງ ແລະ ປັກຫລັກໝາຍໃນພື້ນທີ່ຕົວຈິງເສັ້ນຊາຍແດນ ຮ່າຕິ້ງ - ບໍລິຄຳໄຊສຳເລັດ, ແລະ ປະຕິບັດວຽກງານປັກຫລັກໝາຍໃນພື້ນທີ່ຕົວຈິງເສັ້ນຊາຍແດນຕອນຕິດກັບ ບໍລິຄຳໄຊ ສຳເລັດ. ເຖິງວ່າ ເຮັດວຽກໃນເງື່ອນໄຂຫຍຸ້ງຍາກກໍຕາມ ແຕ່ມາຮອດຈຸດເວລານີ້, ພວກຂ້າພະເຈົ້າໄດ້ສຳເລັດຄາດໝາຍຊື່ງຄະນະຊີ້ນຳສູນກາງວາງອອກ.”
ຄຽງຄູ່ກັບຄວາມຫຍຸ້ງຍາກດັ່ງກ່າວ, ວຽກງານກໍ່ສ້າງປັກຫລັກໝາຍຊາຍແດນ ຫວຽດນາມ ລາວ ກໍມີຄວາມສະດວກຫລາຍຢ່າງ ຍ້ອນເສັ້ນຊາຍແດນ ຫວຽດນາມ - ລາວ ໄດ້ຮັບການກຳນົດຢ່າງຈະແຈ້ງ ແລະ ໄດ້ຮັບການຂີດເສັ້ນປັກຫລັກໝາຍໃນຊຸມປີ 1977-1986ແລ້ວ. ເສັ້ນຊາຍແດນນີ້ກໍໄດ້ສະແດງຢ່າງຄົບຖ້ວນໃນແຜນທີ່ຊື່ງສອງຝ່າຍພ້ອມກັນສ້າງຂຶ້ນເມື່ອປີ 2003 ດ້ວຍວິທີເຕັກນິກທັນສະໄຫມ, ຊັດເຈນ. ຄຽງຂ້າງນັ້ນ ໂຄງການດັ່ງກ່າວຍັງໄດ້ຮັບການກໍ່ສ້າງບົນພື້ນຖານຖອດຖອນບົດຮຽນຈາກການຂີດເສັ້ນປັກຫລັກໝາຍຊາຍແດນ ຫວຽດນາມ - ຈີນ ແລະ ຫວຽດນາມ - ກຳປູເຈຍ. ຍິ່ງກວ່ານັ້ນ ແມ່ນຄວາມສາມັກຄີ, ການຊ່ວຍເຫລືອເຊິ່ງກັນ ແລະ ກັນຂອງທະຫານສອງປະເທດ ຫວຽດນາມ - ລາວ ທີ່ເຮັດວຽກໂດຍກົງໃນພື້ນທີ່ຕົວຈິງ.
ຜ່ານຜ່າຄວາມຫຍຸງຍາກລຳບາກນາໆປະການ ສຸດທ້າຍຄວາມມຸ້ງມາດປາດຖະຫນາກໍ່ສ້າງເສັ້ນຊາຍແດນສັນຕິພາບ, ມິດຕະພາບ, ໝັ້ນຄົງຖາວອນຕາມການກຳນົດເວລາຂອງການນຳສອງປະເທດ ໄດ້ສຳເລັດ. ຜ່ານໄລຍະປະຫວັດສາດຍາວນານ, ສອງປະເທດ ຫວຽດນາມ ແລະ ລາວ ພ້ອມກັນອີງຫລັງໃສ່ສາຍພູຫລວງທີ່ໃຫຍ່ໂຕມະໂຫຖານ ແລະ ຮຽງບ່າຮຽງໄຫລ່ ສ້າງສາຍພົວພັນສາມັກຄີມິດຕະພາບແບບພິເສດ, ບໍລິສຸດຜຸດຜ່ອງ, ເປັນແບບຢ່າງ ໃນປະຫວັດສາດແຫ່ງການພົວພັນສາກົນ. ເລື່ອງປະຕິບັດວຽກງານປັກຫລັກໝາຍຖີ່ ແລະ ບູລະນະຫລັກໝາຍຊາຍແດນ ຫວຽດນາມ - ລາວ ສຳເລັດແມ່ນເຫດການມີຄວາມໝາຍຍິ່ງສຳລັບປະຊາຊົນສອງປະເທດ, ປະກອບສ່ວນເພີ່ມພູນຄູນສ້າງນ້ຳໃຈມິດຕະພາບ ຫວຽດນາມ - ລາວໝັ້ນຄົງຂະຫນົງແກ່ນຈົນຊົ່ວກາລະນານ.