ທ່ານຫງວຽນກ໊ວກຢຸງ ຮອງລັດຖະມົນຕີກະຊວງການຕ່າງປະເທດຫວຽດນາມ ແລະ ທ່ານນາງ ເລທິທູຮັ່ງ ຫົວໜ້າກົມຖະແຫຼງຂ່າວສື່ມວນຊົນກະຊວງການຕ່າງປະເທດ ໄດ້ເປັນປະທານການຖະແຫຼງຂ່າວ

ເນື້ອໃນພົ້ນເດັ່ນທີ່ໄດ້ເຕື້ອງເຖິງຢູ່ກອງປະຊຸມສຸດຍອດອາຊຽນ ຄັ້ງທີ 36 ແລະ ບັນດາກອງປະຊຸມທີ່ກ່ຽວຂ້ອງ ລ້ວນແຕ່ແມ່ນບັນດາຄວາມສົນໃຈລວມຂອງບັນດາປະເທດໃນພາກພື້ນ ໃນປັດຈຸບັນ ຄື: ວິທີການສຳຜັດໄລຍະຫຼັງ Covid -19, ການພັດທະນາຊັບພະຍາກອນມະນຸດ ໃນຍຸກດີຈີຕອນ, ເພີ່ມທະວີສິດອຳນາດໃຫ້ແມ່ຍິງ…

ຍົກສູງຄວາມເຫັນດີເຫັນພ້ອມຂອງອາຊຽນໃນບັນດາບັນຫາໃນພາກພື້ນ

ໂລກລະບາດ Covid – 19 ເກີດຂຶ້ນ ແລະ ມີການຜັນແປຢ່າງສັບສົນໃນໂລກເວົ້າລວມ ແລະ ໃນພາກພື້ນ ເວົ້າສະເພາະ ໄດ້ກາຍເປັນຄວາມສົນໃຈອັນດັບ1 ຂອງບັນດາປະເທດ ສະມາຊິກອາຊຽນ. ດ້ວຍບົດບາດເປັນປະທານອາຊຽນ 2020, ຫວຽດນາມ ໄດ້ເປັນປະທານກອງປະຊຸມທາງອອນລາຍຫຼາຍຄັ້ງທີ່ບັນລຸໄດ້ປະສິດທິຜົນຢ່າງຕັ້ງໜ້າ, ປະກອບສ່ວນຮັກສາທ່າ ຮ່ວມມືຂອງອາຊຽນ, ໃນນັ້ນມີກອງປະຊຸມສຸດຍອດອາຊຽນພິເສດກ່ຽວກັບໂລກລະບາດ Covid – 19 (ເຊິ່ງຈັດຂຶ້ນໃນວັນທີ 14 ເມສາ), ເພື່ອຍົກອອກບັນດາມາດຕະການຢ່າງລະອຽດຄືສ້າງກອງທຶນ Covid – 19, ສາງແຮອຸປະກອນການແພດ, ຂັັ້ນຕອນມາດຕະຖານກ່ຽວກັບການຮັບມືກັບໂລກລະບາດໃນອາຊຽນ, ກ້າວໄປເຖິງການສ້າງແຜນການຟື້ນຟູໃນອາຊຽນ. ໃນ 6 ເດືອນທີ່ຜ່ານມາ, ການຮ່ວມມືອາຊຽນຕາມເນື້ອໃນຈິດໃຈສະໜິດຕິດພັນ, ເປັນເຈົ້າການ ຮັບມື, ໄດ້ຊ່ວຍໃຫ້ອາຊຽນມີຄວາມໝັ້ນຄົງ ແລະ ຮັບມືກັບໂລກລະບາດ Covid – 19 ໄດ້ເປັນຢ່າງດີ ແລະ ຢູ່ກອງປະຊຸມສຸດຍອດ ອາຊຽນຄັ້ງທີ 36 ນີ້, ຫວຽດນາມ ພ້ອມກັບບັນດາປະເທດສະມາຊິກ ອາຊຽນໄດ້ສືບຕໍ່ແລກປ່ຽນບັນດາວິທີການພັດທະນາໄລຍະຫຼັງ Covid – 19, ພ້ອມກັບບັນດາມາດຕະການຮີບດ່ວນເພື່ອບັນລຸໄດ້ການຟື້ນຟູໄວທີ່ສຸດໃຫ້ແກ່ອາຊຽນໃນທຸກໆຂົງເຂດ. ທ່ານຫງວຽນກ໊ວກຢຸງ ຮອງລັດຖະມົນຕີກະຊວງການຕ່າງປະເທດຫວຽດນາມ ແບ່ງປັນວ່າ:

ໂລກລະບາດ Covid – 19 ໄດ້ເຮັດໃຫ້ທຸກສິ່ງທຸກຢ່າງທີ່ຫວຽດນາມກະກຽມໄວ້ຖືກຕ່າວປີ້ນ ເພາະສະນັ້ນພວກເຮົາຕ້ອງປ່ຽນແປງໂຄງການເຮັດແນວໃດເພື່ອໃຫ້ມີຄວາມເໝາະສົມ. ພວກເຮົາຕ້ອງສັງເກດວ່າ ບັນດາປະເທດມີຄວາມສົນໃຈຕໍ່ບັນຫາຫຍັງ ແລະ ຕ້ອງປ່ຽນແປງຈຸດສຸມຂອງອາຊຽນ. ເພາະສະນັ້ນ, ຫວຽດນາມຈົ່ງສຸມໃສ່ເປົ້າໝາຍສາມັກຄີ, ເຫັນດີເປັນເອກະພາບຂອງອາຊຽນ, ສຸມໃສ່ພູມປັນຍາ, ຊັບພະຍາກອນມະນຸດໃຫ້ແກ່ການປ້ອງກັນ, ສະກັດກັ້ນໂລກລະບາດ Covid – 19 ກໍ່ຄືສຸມໃສ່ເຂົ້າໃນການສົມທົບລະຫວ່າງ ອາຊຽນກັບບັນດາຄູ່ຮ່ວມມືໃນໂລກ. ສິ່ງນັ້ນແມ່ນຖືກຕ້ອງທີ່ສຸດ ແລະໄດ້ຮັບການຕອບສະໜອງຢ່າງຕັ້ງໜ້າຈາກບັນດາປະເທດອາຊຽນ.

ໂດຍອີງໃສ່ບັນດາຄວາມສົນໃຈລວມຂອງປະຊາຄົມ, ຫວຽດນາມ ໄດ້ສ້າງ, ປຶກສາຫາລືກັບບັນດາປະເທດອາຊຽນ ເພື່ອ ຮັບຮອງເອົາຖະແຫຼງການກ່ຽວກັບການພັດທະນາແຫຼ່ງຊັບພະຍາກອນມະນຸດ ເພື່ອໂລກແຫ່ງການປ່ຽນແປງຂອງວຽກງານ. ສິ່ງດັ່ງກ່າວເພື່ອແນໃສ່ຊ່ວຍແຫຼ່ງຊັບພະຍາກອນມະນຸດຂອງອາຊຽນ ໃຫ້ມີຄວາມສອດຄ່ອງກັບທ່າອ່ຽງພັດທະນາຂອງວິທະຍາສາດເຕັກໂນໂລຊີໃນໂລກກ່ວາ. ສ້າງທ່າແຮງການແກ່ງແຍ້ງໃຫ້ແກ່ພາກພື້ນ. ທ່ານເລກວັນ ຮອງລັດຖະມົນຕີກະຊວງແຮງງານ ທະຫານເສຍອົງຄະ ແລະ ສັງຄົມຫວຽດນາມ, ຫົວໜ້າຄະນະຜູ້ແທນຫວຽດນາມ ຢູ່ກອງປະຊຸມປະຊາຄົມວັດທະນະທຳສັງຄົມອາຊຽນ ຄັ້ງທີ 23 ໃຫ້ຮູ້ວ່າ:

ຕົວຈິງໃນຍຸກສະໄໝອຸດສາຫະກຳ 4.0, ໂດຍສະເພາະແມ່ນໃນສະພາບການເກີດໂລກລະບາດໂຄວິດ, ການໃຫ້ບຸລິມະສິດພັດທະນາແຫຼ່ງຊັບພະຍາກອນມະນຸດນັບມື້ນັບມີຄວາມສຳຄັນກ່ວາ ແລະ ກຳລັງຄວາມສາມາດແກ່ງແຍ້ງຂອງບັນດາປະເທດອາຊຽນ ເມື່ອທຽບກັບພາກພື້ນ ແລະ ໂລກ ຕ້ອງຄ່ອຍໆວັດແທກດ້ວຍແຫຼ່ງຊັບພະຍາກອນມະນຸດທີ່ມີຄຸນນະພາບສູງ. ຍ້ອນເຫດນັ້ນ, ບັນດາປະເທດອາຊຽນ ພວມສຸມໃສ່ ບັນດາປາຍແຫຼມຫຼາຍກ່ວາເປັນຕົ້ນແມ່ນ: ເຕັກໂນໂລຊີ, ເຕັກໂນໂລຊີຂໍ້ມູນຂ່າວສານ.

ການປະຕິວັດອຸດສາຫະກຳ 4.0 ກໍ່ຮຽກຮ້ອງໃຫ້ພາກພື້ນອາຊຽນ ຕ້ອງມີວິທີສຳຜັດໃໝ່ ກ່ຽວກັບສິດສະເໝີພາບລະຫວ່າງຍິງ-ຊາຍ. ດ້ວຍບົດບາດເປັນປະທານອາຊຽນ 2020, ໃນຂອບເຂດກອງປະຊຸມສຸດຍອດອາຊຽນ ຄັ້ງທີ 36, ຫວຽດນາມ ໄດ້ຈັດວາລະປະຊຸມພິເສດຂອງບັນດາການນຳອາຊຽນ ກ່ຽວກັບການເພີ່ມສິດອຳນາດໃຫ້ແກ່ແມ່ຍິງໃນຍຸກສະໄໝດີຈີຕອນ. ນີ້ແມ່ນເຫດການທີ່ມີຄວາມໝາຍສຳຄັນພິເສດ ເພື່ອຊຸກຍຸ້ສິດສະເໝີພາບລະຫວ່າງຍິງ-ຊາຍ ໃນຂະນະທີ່ບັນດາການນຳອາຊຽນ ໄດ້ປຶກສາຫາລືຢ່າງເປັນການ ເປັນຄັ້ງທຳອິດ ກ່ຽວກັບການມອບສິດອຳນາດໃຫ້ແກ່ແມ່ຍິງ.

ບັນດາການຕີລາຄາທີ່ຕັ້ງໜ້າ       

ຄວາມມານະພະຍາຍາມໃນການປະສານງານຂອງຫວຽດນາມ ໃນບົດບາດເປັນປະທານອາຊຽນ 2020 ໃນຫຼາຍຂົງເຂດ ໄດ້ຮັບການຕີລາຄາສູງຈາກປະເທດຕ່າງໆໃນພາກພື້ນ ແລະ ບັນດາປະເທດຄູ່ຮ່ວມມື. ທ່ານເລຂາທິການໃຫ່ຍອາຊຽນ Dato Lim Jock Hoi ແບ່ງປັນວ່າ:

ຫວຽດນາມ ໄດ້ສະແດງໃຫ້ເຫັນ “ຄວາມເປັນການນຳຢ່າງແຮງ” ໃນການນຳບັນດາປະເທດຮັບມືກັບໂລກລະບາດໂຄວິດ 19ໃນພາກພື້ນ. ຫົວເລື່ອງ “ສ້າງອາຊຽນມີຄວາມສະໜິດຕິດພັນ ແລະ ເປັນເຈົ້າການຮັບມື” ໃນປີເປັນປະທານອາຊຽນ 2020 ແມ່ນເໝາະສົມກັບສະພາບການຂອງພາກພື້ນໃນປະຈຸບັນທີ່ສຸດ. ອາຊຽນ ມີຄວາມສາມັກຄີກັນ ແລະ ຮັບມືກັບໂລກລະບາດຢ່າງໄວວາ ນັບແຕ່ເດືອນກຸມພາ ແລະ ຮັບຮອງເອົາກອງປະຊຸມຂັ້ນສູງພິເສດ 2 ຄັ້ງ ທີ່ຖືກຈັດຂຶ້ນໃນວັນທີ 14 ເມສາ. ບັນດາປະຕິກິລິຍາຢ່າງແຮງຂອງອາຊຽນ ສ່ວນຫຼາຍແມ່ນຍ້ອນມີການນຳພາຂອງຫວຽດນາມ, ພິເສດແມ່ນໃນການຊຸກຍູ້ບັນດາປະເທດສະມາຊິກມີການໂອ້ລົມສົນທະນາ ແລະ ຮ່ວມມື.

ບັນດາປະເທດອາຊຽນ ກໍ່ໄດ້ຕີລາຄາສູງຕໍ່ບົດບາດເປັນປະທານອາຊຽນ 2020 ຂອງຫວຽດນາມ ນັບແຕ່ຕົ້ນປີມາຮອດປະຈຸບັນ, ຢືນຢັນການສະໜັບສະໜູນທີ່ມີຕໍ່ການຜັນຂະຫຍາຍບັນດາໝາກຜົນຕົ້ນຕໍ ຂອງບັນດາກອງປະຊຸມຂັ້ນສູງພິເສດອາຊຽນ ແລະ ອາຊຽນ+3 ກ່ຽວກັບການຮັບມືກັບໂລກລະບາດໂຄວິດ 19 ໂດຍຫວຽດນາມ ສະເໜີ.

ໃນຖານະບົດບາດເປັນປະທານອາຊຽນ 2020, ຫວຽດນາມ ຍາມໃດກໍ່ເປັນສຳຄັນຄວາມສົນໃຈລວມຂອງບັນດາປະເທດອາຊຽນ ໃນການຮັບມືກັບສິ່ງທ້າທາຍໃນພາກພື້ນ ແມ່ນການສະແດງໃຫ້ເຫັນຄວາມມານະພະຍາຍາມສ້າງປະຊາຄົມອາຊຽນຢ່າງລະອຽດ, ປັບປຸງຄວາມສາມັກຄີພາຍໃນກຸ່ມອາຊຽນ.