(vovworld)- ການເລືອກຕັ້ງລັດຖະສະພາເອີລົບ (EP) ໄດ້ມີໝາກຜົນລະອຽດແລ້ວ. ເຖິງວ່າ, ຝ່າຍສຳພັນທະມິດບັນດາພັກຮັກສາເດີມ ແລະ ສຳພັນທະມິດບັນດາພັກສັງຄົມ, ສັງຄົມປະຊາທິປະໄຕ ຍັງຄົງແມ່ນບັນດາພັກໃຫ່ຍກ່ວາໝູ່ໃນລັດຖະສະພາກໍ່ຕາມ, ແຕ່ບັນດາພັກຂວາຈັດຕາມທ່າອ່ຽງລັດທິຊົນຊາດ ແລະ ຕ້ານຄືນເອີລົບໜຶ່ງດຽວ ພັດຍາດໄດ້ຈຳນວນບັດສະໜັບສະໜູນສູງສຸດໂດຍບັງເອີນ. ຄວາມຈິງນີ້ໄດ້ວາງອອກສິ່ງທ້າທາຍອັນໃຫ່ຍຫຼວງໃຫ້ແກ່ບັນດາການນຳສະຫະພາບເອີລົບ (EU) ຍ້ອນທ່າອ່ຽງນີ້ ອາດຈະກີດຂວາງວິວັດການຟື້ນຟູ ແລະ ພັດທະນາຂອງ EU.
751 ທີ່ນັ່ງຂອງສະມາຊິກລັດຖະສະພາໄດ້ຈັດແບ່ງໃຫ້ບັນດາປະເທດສະມາຊິກ EU ອີງຕາມຈຳນວນປະຊາກອນຂອງແຕ່ລະປະເທດ. ແລະ ມີຢ່າງໜ້ອຍສຸດ 20% ໃນຈຳນວນ 751 ທີ່ນັ່ງຂອງ EP ໃນອາຍຸການນີ້ ແມ່ນຂຶ້ນກັບບັນດາພັກຝ່າຍຕ່າງໆທີ່ບໍ່ເປັນປະໂຫຍດສຳລັບ EU.
ສຳນັກງານຂອງລັດຖະສະພາເອີລົບ
(ພາບ: AP)
ທັດສະນະຂວາຈັດ, ຕ້ານ EU ຟື້ນຕົວຂຶ້ນ
ໃນບັນດາປະເທດເຂົ້າຮ່ວມ EP ເກືອບທັງໝົດ, ພັກຕ່າງໆດ້ວຍທັດສະນະຫົວຮຸນແຮງ, ຂວາຈັດ, ລັດທິຊົນຊາດ ແລະ ຕ້ານຄືນການສ້າງເອີລົບເປັນອົງການດຽວ ລ້ວນແຕ່ໄດ້ຟື້ນຕົວຢ່າງແຮງ ແລະ ບັນລຸໝາກຜົນສູງ.
ຢູ່ຝະລັ່ງ, ອັງກິດ, ພັກແນວໂຮມແຫ່ງຊາດ ແລະ ພັກເອກະລາດລ້ວນແຕ່ລື່ນກາຍບັນດາພັກໃຫ່ຍທີ່ເຄີຍຜັດປ່ຽນກັນກຳອຳນາດຢູ່ສອງປະເທດນັບແຕ່ດົນນານແລ້ວ. ຢູ່ແດນມາກ, ພັກຝ່າຍຂວາປະຊາຊົນແດນມາກ, ຊື່ງຄັດຄ້ານນະໂຍບາຍເຂົ້າເມືອງ ກໍ່ນຳໜ້າໃນການປ່ອນບັດຢູ່ປະເທດນີ້. ຢູ່ປະເທດໂອຕາລິດ, ໂປໂລຍ, ຮຸງກາຣີ ແລະ ແຟງລັງ, ບັນດາພັກຂວາຈັດ ແລະ ລັດທິຊົນຊາດລ້ວນແຕ່ຍາດໄດ້ບັດສະໜັບສະໜູນດ້ວຍອັດຕາສູງທີ່ສຸດ. ສິ່ງທີ່ໜ້າເວົ້າເຖິງແມ່ນ, ພັກທັງໝົດເຫຼົ່ານັ້ນລ້ວນແຕ່ມີແຜນນະໂຍບາຍໄປຝືນກັບທຸກສິ່ງທຸກຢ່າງທີ່ EU ຖືວ່າແມ່ນຄະຕິທຳ ແລະ ປະຕິບັດນະໂຍບາຍຄັດຄ້ານ EU ໂຮມເປັນອົງການເປັນໜຶ່ງດຽວ, ສົງໃສຕໍ່ອະນາຄົດຂອງກຸ່ມ.
ພັກແນວໂຮມຊົນຊາດຂອງທ່ານນາງ Marine Le Penໄດ້ຮັບໄຊຊະນະຢູ່ຝະລັ່ງ
(ພາບ: http://dantri.com.vn)
ໝາກຜົນທີ່ແນ່ນອນຂອງການຂາດຄວາມໄວ້ເນື້ອເຊື່ອໃຈ
ຕົວຈິງເຫັນວ່າ, ອັດຕາສ່ວນຜູ້ມີສິດເລືອກຕັ້ງເຂົ້າຮ່ວມການເລືອກຕັ້ງ EP ຄັ້ງນີ້ແມ່ນຢູ່ໃນລະດັບຕ່ຳສຸດ, ກວມພຽງ 43% ໃນຈຳນວນຜູ້ມີສິດເລືອກຕັ້ງປະມານ 400 ລ້ານຄົນຂອງປະທດ ສະມາຊິກ EU ທັງໝົດ 28 ປະເທດເທົ່ານັ້ນ. ຫລຸດລົງຢ່າງແຮງເມື່ອທຽບກັບການເລືອກຕັ້ງຄັ້ງກ່ອນ.
ນັບແຕ່ເກີດວິກິດການເສດຖະກິດ-ການເງິນໂລກເປັນເວລາກ່ວາ 5 ປີ, ປະຊາຊົນ EU ບໍ່ທັນເຫັນສັນຍານຕັ້ງໜ້າຈາກບັນດາລະບອບການເມືອງໃນ EU ກໍ່ຄືໃນແຕ່ລະລັດຖະບານຂອງເຂົາເຈົ້າ. ລາຄາສິນຄ້ານັບມື້ນັບເພີ່ມຂຶ້ນ, ເກີດໄພຫວ່າງງານ, ພາສີອາກອນເພີ່ມຂຶ້ນໃນຂະນະທີ່ສະຫວັດດີການສັງຄົມຫລຸດລົງ…. ປະຊາຊົນບໍ່ພໍໃຈ ແລະ ຖີ້ມໂທດໃຫ້ການນຳ EU ນັ້ນແມ່ນສາຍເຫດກໍ່ໃຫ້ເກີດວິກິດການ. ບັນດາພັກຂວາຈັດກວມອັດຕາສ່ວນສະໜັບສະຫນູນສູງໃນການເລືອກຕັ້ງລັດຖະສະພາເອີລົບ (EP) ທີ່ຜ່ານມາແມ່ນຄຳຕອບທີ່ຈະແຈ້ງທີ່ສຸດ, ສະແດງໃຫ້ເຫັນວ່າ: ຄວາມໄວ້ເນື້ອເຊື່ອໃຈຂອງຜູ້ມີສິດເລືອກຕັ້ງຕໍ່ອົງການ EU ໜຶ່ງດຽວຖືກຫລຸດລົງ
ເລືອກເຟັ້ນທິດທາງໃນອະນາຄົດ
ຕົວຈິງດັ່ງກ່າວໄດ້ເຮັດໃຫ້ບັນດາການນຳ EU ມີຄວາມເປັນຫ່ວງກັງວົນ. ຊ້ຳບໍ່ໜຳ, ທ່ານນາຍົກລັດຖະມົນຕີຝະລັ່ງ Mamuel Valls ຖືວ່າ, ນີ້ແມ່ນການສັ່ນສະເທືອນດ້ານການເມືອງຢູ່ EU. ບັນດານັກການເມືອງໃຫ້ຂໍ້ສັງເກດວ່າ, ໝາກຜົນການເລືອກຕັ້ງ EP ໄດ້ສ່ອງແສງໃຫ້ເຫັນສະພາບຂາດສະຖຽນລະພາບຍັງໜັກໜ່ວງກ່ວາວິກິດການເສດຖະກິດການເງິນທີ່ເຄີຍທຳລາຍພາກພື້ນໃຊ້ສະກຸນເງິນເອີໂຣ. ຫລັງຈາກນັ້ນ, ບັນດາການນຳ EU ໄດ້ຟ້າວຟັ່ງຈັດການປະຊຸມຢູ່ Brucssel ປະເທດແບນຊິກ ເພື່ອຮັບມືກັບບັນດາຄວາມວິຕົກກັງວົນກ່ຽວກັບທ່າອ່ຽງແຍກຕົວເອົລົບໃນປະຈຸບັນ ຊື່ງມີທີ່ຕັ້ງທີ່ແນ່ນອນໃນ EP. EU ພວມຢືນຢູ່ຕໍ່ໜ້າສິ່ງທ້າທາຍຕ້ອງຍູ້ແຮງການປະຕິຮູບ, ການປ່ຽນແປງໃໝ່.
EU ພວມຕ້ອງການການປະຕິຮູບຢ່າງແຮງ, ມີໄຫວພີບກ່ວາ, ໂດຍສະເພາະແມ່ນໃນການເຄື່ອນໄຫວຂອງບັນດາລະບອບຂອງກຸ່ມຈຶ່ງສາມາດນຳມາເຊິ່ງປະສິດທິຜົນໄດ້ ແລະ ເວລານັ້ນຈຶ່ງນຳມາເຊິ່ງພະລັງຊີວິດໃໝ່, ການປ່ຽນແປງທີ່ຕັ້ງໜ້າສຳລັບພາກພື້ນນີ້.
ແຕ່ເຖິງແນວນັ້ນກໍ່ຕາມ, ດ້ວຍການປະກົດຕົວຂອງບັນດາບຸກຄົນຂວາຈັດໃນ EP, ວິວັດການປະຕິຮູບນີ້ແນ່ນອນວ່າຈະດຳເນີນໄປດ້ວຍດີຫຼືບໍ່? EU ຈະສ້າງໃຫ້ມີຄວາມເຫັນດີເຫັນພ້ອມສູງໃນບັນດາລະບອບຂອງ EU ກໍ່ຄືລະຫວ່າງການນຳບັນດາປະເທດສະມາຊິກຂອງກຸ່ມນີ້ເອງໄດ້ຫຼືບໍ່? ເກືອບຄືວ່າຄຳຕອບກໍ່ມີຢູ່ແລ້ວ. ດ້ວຍແນວຄິດຄັດຄ້ານການສ້າງເອີລົບເປັນອົງການໜຶ່ງດຽວນັ້ນ, ຕາມຂໍ້ໃຫ້ສັງເກດແລ້ວ, ໃນໄລຍະຈະມາເຖິງ, ບັນດາທັດສະນະທີ່ແຕກຕ່າງກັນໃນ EP ອາດຈະກະທົບເຖິງສົນທິສັນຍາກ່ຽວກັບການໄປມາຢ່າງເສລີ, ການເຄື່ອນໄຫວດ້ານທະນາຄານ, ການເງິນໃນ EU ແລະ ພາໃຫ້ຂາດຄວາມເປັນລະບຽບຮຽບຮ້ອຍໃນ EU. ພາຍຫຼັງຮັບມືກັບໜີ້ສາທາລະນະເປັນເວລາ 5 ປີ, EU ພວມກ້າວເຂົ້າສູ່ໄລຍະຫຍຸ້ງຍາກໃໝ່ບົນເສັ້ນທາງເຫັນດີເຫັນພ້ອມ ມຸ້ງໄປສູ່ອະນາຄົດ./.