( vovworld ) – ໃນການປຶກສາຫາລືບັນດາມາດຕະການບໍລິຫານເສດຖະກິດສັງຄົມໃນຊຸມເດືອນທ້າຍປີ, ໃນວາລະປະຊຸມປະຈຳເດືອນ 6/2012, ລັດຖະບານຫວຽດນາມ ຢັ້ງຢືນຈະສືບຕໍ່ຢຶດໝັ້ນ ແລະ ບໍ່ປ່ຽນແປງຈຸດໝາຍໃຫ້ບຸລິມະສິດຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ລະດັບເຕີບໂຕຢ່າງເໝາະສົມ ແລະ ຮັບປະກັນຊີວິດສັງຄົມ. ລັດຖະບານໄດ້ຍົກອອກບາງມາດຕະການຂ້ຽວຂາດ, ໜູນຊ່ວຍການຜະລິດ ແລະ ຕະຫຼາດ, ເພື່ອແນໃສ່ຮັບປະກັນຈຸດໝາຍການຈະເລີນເຕີບໂຕ GDP ທີ່ໄດ້ວາງອອກຢ່າງເໝາະສົມ.
ຫວຽດນາມ ພວມກ້າວເຂົ້າສູ່ພື້ນຖານເສດຖະກິດມະຫາພາກເປັນປົກກະຕິ
(ພາບ:vnmoney.nld.com.vn)
ຕາມການສະຫລຸບທີ່ວາລະປະຊຸມ, ເບີ່ງລວມແລ້ວ, ສະພາບເສດຖະກິດ-ສັງຄົມໃນ 6 ເດືອນຕົ້ນປີ 2012 ຂອງຫວຽດນາມ ບັນລຸໄດ້ໝາກຜົນຮອບດ້ານພໍສົມຄວນ, ຖືກທິດ, ຖືກຕ້ອງຕາມຈຸດໝາຍທີ່ໄດ້ວາງອອກໃນທຸກໆດ້ານ. ການຈະເລີນເຕີບໂຕດ້ານເສດຖະກິດຂອງທົ່ວປະເທດມີສັນຍານດີພໍສົມຄວນ. ໄລ່ລວມໃນ 6 ເດືອນຕົ້ນປີ, ຄາດວ່າ GDP ເພີ່ມຂຶ້ນ 4,38% ແລະ ມີທ່າອ່ຽງຈະສືບຕໍ່ເພີ່ມຂຶ້ນໃນໄລຍະທີ່ຈະມາເຖິງ. ອຸດສາຫະກຳມີສັນຍານໄດ້ຮັບການຟື້ນຟູຢ່າງເຫັນໄດ້ຊັດ. ລັດຖະບານເປັນເອກະພາບໃຫ້ຂໍ້ສັງເກດວ່າ, ເຖິງວ່າຍັງປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ ແຕ່ໜ້າຊື່ນຊົມນັ້ນແມ່ນສະພາບເສດຖະກິດ-ສັງຄົມຂອງຫວຽດນາມ ພວມໄປຖືກທິດ. ພາຍຫຼັງໄດ້ວິເຄາະ, ຕີລາຄາໝາກຜົນແຫ່ງການປະຕິບັດໜ້າທີ່ເສດຖະກິດ-ສັງຄົມໃນຊຸມເດືອນຕົ້ນປີ, ທ່ານນາຍົກລັດຖະມົນຕີຫວຽດນາມ Nguyen Tan Dung ຊີ້ແຈ້ງວ່າ, ໃນຊຸມເດືອນທ້າຍປີ 2012, ທັດສະນະສະເໝີຕົ້ນສະເໝີປາຍຂອງລັດຖະບານ ແມ່ນຍັງຄົງຢຶດໝັ້ນບັນດາຈຸດໝາຍທີ່ໄດ້ວາງອອກແຕ່ຕົ້ນປີ, ບໍ່ປ່ຽນແປງ, ດັດປັບບໍ່ວ່າຈຸດໝາຍພັດທະນາເສດຖະກິດ-ສັງຄົມໃດ. ຕາມນັ້ນແລ້ວ, ສືບຕໍ່ໃຫ້ບຸລິມະສິດການຄວບຄຸມໄພເງິນເຟີ້, ຮັກສາເສດຖະກິດມະຫາພາກເປັນປົກກະຕິ, ຮັກສາການຈະເລີນເຕີບໂຕໃນລະດັບເໝາະສົມແມ່ນປະມານ 5,2-5,7%. ເພື່ອບັນລຸໄດ້ຈຸດໝາຍນີ້, 1 ໃນບັນດາພາກສ່ວນເສດຖະກິດຄວນປະຕິບັດການແກ້ໄຂບັນດາຂໍ້ຈຳກັດ ນັ້ນແມ່ນລັດວິສາຫະກິດ:
“ຂ້າພະເຈົ້າສະເໜີໃຫ້ບັນດາທ່ານລັດຖະມົນຕີ ຈົ່ງຄິດໄລ່ເຖິງການສ້າງໂຄງປະກອບລັດວິສາຫະກິດຄືນໃໝ່. ຜ່ານສະພາບຕົວຈິງ, ພິຈາລະນາຂອບຂະໜາດ, ຂອບເຂດ, ການຈັດຕັ້ງການຜະລິດດຳເນີນທຸລະກິດ, ສຸມໃສ່ຂະແໜງອາຊີບຕົ້ນຕໍ, ຊັບຊ້ອນການຜະລິດດຳເນີນທຸລະກິດໃນຂົງເຂດຂະແໜງອາຊີບຕົ້ນຕໍ. ນັ້ນແມ່ນທິດທາງ 1. ທິດທາງທີ 2 ແມ່ນຕ້ອງປ່ຽນໃໝ່ການບໍລິຫານ, ການຄຸ້ມຄອງ, ມີກົນໄກພາຍໃນ ຮັບປະກັນປະສິດທິຜົນການຜະລິດດຳເນີນທຸລະກິດ. ທີ 3 ແມ່ນເອົາໃຈໃສ່ເຖິງການປັບປຸງກົງຈັກການຈັດຕັ້ງທັງໝົດ. ລັດຖະບານກໍ່ຈະເຮັດແຈ້ງການຈັດແບ່ງໜ້າທີ່, ແບ່ງຂັ້ນປະຕິບັດສິດ ແລະ ຄວາມຮັບຜິດຊອບຂອງຫົວໜ່ວຍເຈົ້າຂອງວິສາຫະກິດ “.
ຄວບຄຸມໄພເງິນເຟີ້ພ້ອມກັບກະຊວງການເງິນ
(ພາບ: yume.vn)
ແຕ່ນີ້ຮອດທ້າຍປີ, ລັດຖະບານໄດ້ວາງຈຸດສຸມໃນການບໍລິຫານ ນັ້ນແມ່ນແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດກ່ຽວກັບການສຳພັດກັບທຶນຮອນ, ຈຳໜ່າຍສິນຄ້າຄ້າງສາງ. ສະນັ້ນ, ທ່ານນາຍົກລັດຖະມົນຕີຫວຽດນາມ Nguyen Tan Dung ໄດ້ຮຽກຮ້ອງໃຫ້ທະນາຄານແຫ່ງລັດຈົ່ງເປັນເຈົ້າການ, ມີໄຫວພິບໃນການຈຳກັດໜີ້ເສຍ, ຮີບເຮັ່ງສ້າງອົງປະກອບໜີ້ຄືນໃໝ່, ສ້າງໂຄງປະກອບບັນດາທະນາຄານ ການຄ້າອ່ອນດ້ວຍຄືນໃໝ່; ບໍລິຫານອັດຕາດອກເບັ້ຍຕາມອັດຕາສ່ວນໄພເງິນເຟີ້ໃນລະດັບ 7-8%, ເຮັດໃຫ້ກະແສທຶນທະລຸລວງຢ່າງໄວວາ ດ້ວຍວິທີຫລຸດຜ່ອນອັດຕາດອກເບັ້ຍເງິນກູ້ຢືມ ເພື່ອໃຫ້ບັນດາວິສາຫະກິດສາມາດສຳພັດໄດ້ຢ່າງງາຍດາຍ. ກ່ຽວກັບບັນຫານີ້, ທ່ານ Nguyen Van Binh ຜູ້ວ່າການທະນາຄານແຫ່ງລັດຫວຽດນາມ ໃຫ້ຮູ້ວ່າ:
“ຕາມເນື້ອໃນຈິດໃຈຂອງທ່ານນາຍົກລັດຖະມົນຕີແລ້ວ, ໃນໄລຍະທີ່ຈະມາເຖິງນີ້, ພວກຂ້າພະເຈົ້າຈະມີການສະຫລຸບ ແລະ ຊາບຊືມໃນທົ່ວຂະແໜງ ນັ້ນແມ່ນບໍ່ຕ້ອງລໍຖ້າຮອດກຳນົດເວລາ, ທະນາຄານ, ສາຂາທະນາຄານທັງໝົດ ຕ້ອງເປັນເຈົ້າການເຮັດວຽກກັບບັນດາວິສາຫະກິດໂດຍທັນທີ ເພື່ອໃຫ້ວິສາຫະກິດໃດພວມກູ້ຢືມດ້ວຍອັດຕາດອກເບັ້ຍກ່ວາ 15% ຊື່ງວິສາຫະກິດນັ້ນຍັງສາມາດຄົງຕົວໄດ້ ຈະຫລຸດລົງຕ່ຳກ່ວາ 15% ເພື່ອໃຫ້ວິສາຫະກິດນັ້ນ ມີເງື່ອນໄຂພັດທະນາ“
ຜູ້ວ່າການທະນາຄານແຫ່ງລັດຫວຽດນາມ Nguyen Van Binh
(ພາບ:taichinh.vnexpress.net)
ທ່ານນາຍົກລັດຖະມົນຕີຫວຽດນາມ Nguyen Tan Dung ກໍຮຽກຮ້ອງໃຫ້ບັນດາກະຊວງ ຂະແໜງການມີໜ້າທີ່ຮັບຜິດຊອບ ສຸມໃສ່ແກ້ໄຂ, ໜູນຊ່ວຍການຜະລິດ, ໃນນັ້ນມີການເພີ່ມສິນເຊື່ອ, ປ່ອຍເງິນໃຫ້ແກ່ທຶນໄດ້ທີ່ໄດ້ຈັດແບ່ງແລ້ວ, ໃຫ້ບຸລິມະສິດສິນເຊື່ອສຳລັບ ຂົງເຂດກະສິກຳ, ຊົນນະບົດ, ການຜະລິດເປັນສິນຄ້າສົ່ງອອກ, ອຸດສາຫະກຳສຳຮອງ, ວິສາຫະກິດຂະໜາດກາງ ແລະ ນ້ອຍ, ວິສາຫະກິດໃຊ້ຄົນງານຫຼາຍ. ທ່ານນາຍົກລັດຖະມົນຕີຫວຽດນາມ Nguyen Tan Dung ຊີ້ນຳໃຫ້ກະຊວງການເງິນ ຕ້ອງປະຕິບັດ ນະໂຍບາຍປີການເງິນຢ່າງເໝາະສົມ ສົມທົບກັນຢ່າງແໜ້ນແຟ້ນ ແລະ ມີປະສິດທິຜົນລະຫວ່າງນະໂຍບາຍເງິນຕາ ແລະ ສິນເຊື່ອ ເພື່ອແນໃສ່ເພີ່ມຄວາມຕ້ອງການທັງໝົດຂອງພື້ນຖານເສດຖະກິດ, ປະຕິບັດບັນດາມາດຕະການໜູນຊ່ວຍພາສີອາກອນຖືກຕ້ອງກັບເປົ້າໝາຍບຸລິມະສິດ ເພື່ອແນໃສ່ສົ່ງເສີມການຜະລິດດຳເນີນທຸລະກິດ ແລະ ກະຕຸກຊຸກຍູ້ຄວາມຕ້ອງການທັງໝົດ ຮັບໃຊ້ໃຫ້ແກ່ຈຸດໝາຍຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້. ທ່ານນາຍົກລັດຖະມົນຕີຫວຽດນາມ Nguyen Tan Dung ກໍ່ຮຽກຮ້ອງໃຫ້ບັນດາກະຊວງ ຂະແໜງການ, ທ້ອງຖິ່ນຕ່າງໆ ຈົ່ງສຸມໃສ່ຊຸກຍູ້ການປ່ອຍເງິນລົງທຶນ ເພື່ອກະຕຸກຊຸກຍູ້ຄວາມຕ້ອງການພາຍໃນປະເທດ, ເອົາໃຈໃສ່ເຖິງວຽກງານຮັບປະກັນສະຫວັດດີການສັງຄົມກ່ວາອີກ, ປະຕິບັດບັນດາມາດຕະການສ້າງວຽກເຮັດງານທຳຢ່າງຂ້ຽວຂາດ, ມີປະສິດທິຜົນ, ເພີ່ມລາຍຮັບໃຫ້ແກ່ຜູ້ອອກແຮງງານ, ມີຄວາມເອົາໃຈໃສ່ຢ່າງເໝາະສົມເຖິງວຽກງານເບິ່ງແຍງສຸຂະພາບໃຫ້ແກ່ປະຊາຊົນ.