(vovworld)- ວັນທີ 7/2/2014, ສະພາແຫ່ງຊາດ ອາເມລິກາ ໄດ້ຮັບຮອງເອົາກົດໝາຍວ່າດ້ວຍກະສິກຳ(FarmBill) ດ້ວຍບັນດາຂໍ້ມາດຕາອາລັກຂາກະສິກຳພາຍໃນປະເທດ. ສິ່ງດັ່ງກ່າວໄດ້ເຮັດໃຫ້ວົງເງິນສົ່ງອອກປາຈາຂອງຫວຽດນາມ ໄປຍັງອາເມລິກາ ຫລຸດລົງ ແລະ ຫນອງລ້ຽງປາຫລາຍແຫ່ງຂອງບັນດາຄອບຄົວຢູ່ເຂດທົ່ງພຽງແມ່ນນຳ້ຂອງທາງພາກໃຕ້ຫວຽດນາມ ອາດຈະຖືກລົບລ້າງ. ໃນລາຍການສະຖານະການການເມືອງພາກນີ້, ພວກເຮົາຂໍແນະນຳບົດທີ່ພາດຫົວເລື່ອງວ່າ: ນະໂຍບາຍອາລັກຂາກະສິກຳຂອງອາເມລິກາກໍ່ຄວາມຫຍຸ້ງຍາກໃຫ້ແກ່ການສົ່ງອອກປາຈາ.
ປາຈາຢູ່ ພາກໃຕ້ຫວຽດນາມ
ພາບປະກອບ:bptv.vn
|
ຕາມກົດໝາຍວ່າດ້ວຍກະສິກຳທີ່ຫາກໍ່ໄດ້ຮັບການປະກາດໃຊ້, ປາຈາ ແມ່ນປະເພດສິນຄ້າຖືກຜົນສະທ້ອນຢ່າງຫນັກຫນ່ວງຈາກບັນດາຮົ້ວກີດຂວາງດ້ານເຕັກນິກໃຫມ່ ໂດຍກະຊວງກະສິກຳ ອາເມລິກາ ຍົກອອກໃນ 2 ເດືອນຈະມາເຖິງ. ຕາມນັ້ນແລ້ວ, ບົດບາດຫນ້າທີ່ຕິດຕາມກວດກາ ປາຫນັງ, ໃນນັ້ນ ມີປາຈາ ແລະ ປາບາຊາ ຂອງຫວຽດນາມ,ເຊິ່ງກ່ອນນີ້ແມ່ນອົງການຄຸ້ມຄອງການຢາ ແລະ ອາຫານ(FDA) ຮັບຜິດຊອບ, ແຕ່ປະຈຸບັນ ກະຊວງກະສິກຳອາເມລິກາ ແມ່ນອົງການຕິດຕາມກວດກາ. ຄຽງຄູ່ກັນນັ້ນ, ນອກຈາກການກວດກາຄຸນນະພາບຫລັກອະນາໄມຄວາມປອດໄພດ້ານອາຫານແລ້ວ, ອາເມລິກາຍັງກວດກາທັງເຂດລ້ຽງປາຂອງຫວຽດນາມ ອີກ.
ກົດໝາຍສະບັບດັ່ງກ່າວໝາຍຄວາມວ່າເພີ່ມການອາລັກຂາແກ່ຜະລິດຕະພັນກະເສດຂອງອາເມລິກາ
ດ້ວຍບັນດາຂໍ້ມາດຕາຂອງກົດໝາຍສະບັບດັ່ງກ່າວ, ກະຊວງກະສິກຳອາເມລິກາ ຈະໝູນໃຊ້ມາດຕະຖານກຳນົດປາຫນັງຂອງບັນດາປະເທດສົ່ງອອກໄປຍັງຕະຫລາດ ອາເມລິກາ. ຕາມນັ້ນແລ້ວ, ຕ້ອງຕອບສະຫນອງບັນດາມາດຕະຖານຂອງ ສິນຄ້າປະເພດນີ້ທີ່ຜະລິດຢູ່ ອາເມລິກາ, ນັບແຕ່ຂັ້ນຕອນການຜະລິດ, ລ້ຽງປູກ, ຄຸນນະພາບຜະລິດຕະພັນຕະຫລອດຮອດການຫຸ້ມຫໍ່ ແລະ ການສົ່ງອອກ. ສິ່ງດັ່ງກ່າວຈະເຮັດໃຫ້ປະຊາຊົນລ້ຽງປາຫນັງຢູ່ບັນດາປະເທດ, ໃນນັ້ນ ມີຊາວກະສິກອນລ້ຽງປາຈາຢູ່ ຫວຽດນາມ ປະສົບກັບຄວາມຫຍຸ້ງຍາກວ່າ ເມື່ອຕ້ອງສ້າງລະບົບຜະລິດຕາມມາດຕະຖານຄືຢູ່ ອາເມລິກາ ແລະ ດ້ວຍຂໍ້ກຳນົດທີ່ວ່າ, ຕ້ອງກວດກາຢັ້ງຢືນນັບແຕ່ຕົ້ນກຳເນີດ, ມີວິສາຫະກິດຫລາຍແຫ່ງຢູ່ປະເທດຕ່າງໆ ຍາກທີ່ຈະຕອບສະຫນອງຄຳຮຽກຮ້ອງຕ້ອງການດັ່ງກ່າວໄດ້. ໃນຂະນະນັ້ນ, ການກວດກາຢັ້ງຢືນດັ່ງກ່າວບໍ່ມີສ່ວນກ່ຽວຂ້ອງເຖິງຄຸນນະພາບ, ຄວາມປອດໄພດ້ານສະບຽງອາຫານ, ຊ່ືງແມ່ນເງື່ອນໄຂທີ່ອາເມລິກາ ເຄີຍຖືເປັນເຫດຜົນເພື່ອກີດຂວາງປະເພດສິນຄ້າປາຈາ ນຳເຂົ້າຕະຫລາດອາເມລິກາ ໃນໄລຍະຜ່ານມາ. ເວົ້າແນວອື່ນ, ບັນດາຜູ້ລ້ຽງປາຫນັງ ຢູ່ ອາເມລິກາ ແມ່ນບັນດາເປົ້າໝາຍໄດ້ຮັບຜົນປະໂຫຍດອັນໃຫຍ່ຫລວງ ຈາກກົດໝາຍສະບັບດັ່ງກ່າວ. ຫນຶ່ງໃນບັນດາປະເທດຖືກຜົນສະທ້ອນຈາກຂໍ້ມາດຕາດັ່ງກ່າວ ນັ້ນແມ່ນຫວຽດນາມ, ຊື່ງແມ່ນປະເທດກວມເຖິງ 30% ອັດຕາສ່ວນນຳເຂົ້າບັນດາຜະລິດຕະພັນປາຫນັງຢູ່ຕະຫລາດອາເມລິກາ. ທ່ານ ເຈືອງດີງແຮ່ວ, ຮອງເລຂາທິການໃຫຍ່ສະຫະສະມາຄົມປຸງແຕ່ງ ແລະ ສົ່ງອອກ ສິນໃນນຳ້ຫວຽດນາມ ໃຫ້ຮູ້ວ່າ:
“ການສົ່ງອອກປາຈາ ພວມປະເຊີນຫນ້າກັບຄວາມຫຍຸ້ງຍາກຫລາຍຢ່າງ, ພິເສດ ແມ່ນການຫລຸດລົງຂອງບັນດາອັດຕາສ່ວນຕະຫລາດທີ່ເປັນຈຸດສຸມ ໃນຂະນະທີ່ຕະຫລາດອາເມລິກາ ພວມປະເຊີນຫນ້າກັບບັນດາບັນຫາກ່ຽວກັບການຕ້ານການຂາຍບຸບລາຄາ. ນອກນັ້ນ ລາຄາປາຈາພາຍໃນປະເທດ ກໍມີການເຫນັງຕີງ ສະນັ້ນ ບໍ່ແກ້ໄຂຄວາມຫຍຸ້ງຍາກໃຫ້ແກ່ຜູ້ລ້ຽງປາຈາໄດ້.”
ຫນອງລ້ຽງປາ ແລະ ໂຮງງານປຸງແຕ່ງປາຈາ ຢູ່ ຫວຽດນາມ ທັງໝົດ ຕ້ອງຍົກລະດັບ ແລະ ຖືກກວດກາຢ່າງເຂັ້ມງວດ ຕາມມາດຕະຖານ ຂອງອາເມລີກາ, ຖ້າຢາກເຮັດໃຫ້ຜະລິດຕະພັນປາຈາສົ່ງໄປຂາຍຢູ່ຕະຫລາດອາເມລິກາໄດ້. ຕາມຫລັກການແລ້ວ, ກະຊວງກະສິກຳ ອາເມລິກາ ຈະຕ້ອງປະກາດເງື່ອນໄຂລະອຽດ ເພື່ອປະຕິບັດ ກົດໝາຍດັ່ງກ່າວ ໃນເວລາ 60 ວັນ ນັບແຕ່ວັນທີ 7/2/2014 ເປັນຕົ້ນໄປ.
ເຖິງວ່າຂະແຫນງປຸງແຕ່ງອາຫານສົ່ງອອກຂອງຫວຽດນາມ ໄດ້ມີການຄິດໄລ່ລ່ວງຫນ້າ ແລະ ມີການກະກຽມແລ້ວກໍ່ຕາມ, ແຕ່ເມື່ອກົດໝາຍດັ່ງກ່າວມີຜົນສັກສິດ, ຫວຽດນາມ ຍັງຄົງປະສົບກັບຄວາມຫຍຸ້ງຍາກຈຳນວນຫນຶ່ງ ໃນໄລຍະຕົ້ນ ແລະ ການສົ່ງອອກສິນໃນນຳ້ໄປຍັງຕະຫລາດ ອາເມລິກາ ອາດຈະຖືກຊັກຊ້າໄວ້. ສິ່ງດັ່ງກ່າວແມ່ນຮຽກຮ້ອງໃຫ້ຂະແຫນງສົ່ງອອກສິນໃນນຳ້ຂອງຫວຽດນາມ ຕ້ອງຜ່ານຜ່າຄວາມຫຍຸ້ງຍາກ ພ້ອມທັງຍູ້ແຮງການສ້າງໂຄງປະກອບການຜະລິດຄືນໃຫມ່ເພື່ອຮັບມືກັບຄຳຮຽກຮ້ອງຂອງຕະຫລາດການຄ້າໂລກ. ທ່ານ ຫງວຽນຫືວຢູງ, ຮອງປະທານສະຫະສະມາຄົມປຸງແຕ່ງ ແລະ ສົ່ງອອກສິນໃນນຳ້ຫວຽດນາມ ຢືນຢັນວ່າ:
“ບັນດາວິສາຫະກິດຕ້ອງມີຂໍ້ມູນຂ່າວສານກ່ຽວກັບປະເພດສິນຄ້າຢ່າງຈະແຈ້ງ, ຕົວຢ່າງຄື: ກາໝາຍສິນຄ້າ, ຄວາມປອດໄພ, ຫລັກອະນາໄມດ້ານອາຫານ, ໂລກລະບາດ. ທີສອງ ປະຊາຄົມວິສາຫະກິດ ຕ້ອງມີຂໍ້ມູນຂ່າວສານ, ເວລານັ້ນ ພວກເຮົາຈຶ່ງສາມາດຫລີກລ້ຽງຄວາມສ່ຽງ ແລະ ຜົນສະທ້ອນບໍ່ດີເຖິງປາຈາຂອງຫວຽດນາມ.”
ປີ 2013, ຍອດປະລິມານປາຈາຂອງ ຫວຽດນາມ ທີ່ສົ່ງອອກຕະຫຼາດໂລກ ບັນລຸມູນຄ່າ 1,8 ຕື້ USD. ໃນນັ້ນຕະຫລາດ ອາເມລິກາ ກວມ 27-33% ຍອດວົງເງິນສົ່ງອອກສິນໃນນຳ້ຂອງຫວຽດນາມ ເວົ້າລວມ ແລະ ປາຈາເວົ້າສະເພາະ. ແຕ່ດົນນານມາແລ້ວ, ຫວຽດນາມ ສົ່ງເສີມຊາວກະສິກອນ ແລະ ວິສາຫະກິດ ປະຕິບັດການລ້ຽງປູກສິນໃນນຳ້ ຕາມບັນດາມາດຕະຖານ Viet GAP, Global GAP, ASC. ສະນັ້ນ, ຖ້າຫາກມີການດັດປັບ ການຄຸ້ມຄອງ, ການສົ່ງອອກ, ການຈັດຕັ້ງຢັ້ງຢືນຢ່າງເໝາະສົມ.. ປາຈາຂອງຫວຽດນາມ ຍັງຄົງຕອບສະຫນອງບັນດາຄຳຮຽກຮ້ອງສ່ົງອອກໄປຍັງຕະຫລາດອາເມລິກາໄດ້ຢ່າງພຽງພໍ. ການສ້າງ ແລະ ຜັນຂະຫຍາຍແຜນການກະກຽມເພື່ອຕອບສະຫນອງບັນດາຂໍ້ກຳນົດໃຫມ່ຂອງກົດໝາຍວ່າດ້ວຍກະສິກຳປີ 2014, ແມ່ນໜ້າທີ່ຂອງບັນດາວິສາຫະກິດ ຫວຽດນາມໃນປະຈຸບັນ ເພື່ອຮັກສາໃຫ້ໄດ້ອັນດັບທີຫນຶ່ງ, ກ່ຽວກັບການສົ່ງອອກປາຈາເຂົ້າຕະຫລາດອາເມລິກາ.