( vovworld ) – ການຊຸກຍູ້ການຮ່ວມມືລະຫວ່າງບັນດາແຂວງຊາຍແດນ ຫວຽດນາມ-ລາວ ແມ່ນໜ້າທີ່ສຳຄັນໃນການປັບປຸງສາຍພົວພັນທີ່ເປັນມູນເຊື້ອອັນດີງາມລະຫວ່າງສອງປະເທດ, ປະກອບສ່ວນຮັກສາເສັ້ນຊາຍແດນແຫ່ງສັນຕິພາບ, ສະຖຽນລະພາບຢ່າງໝັ້ນຄົງ. ການນຳສອງປະເທດໄດ້ຢັ້ງຢືນສິ່ງດັ່ງກ່າວອີກເທື່ອໜື່ງ ໃນກອງປະຊຸມການພົວພັນຮ່ວມມືລະຫວ່າງສະພາແຫ່ງຊາດຫວຽດນາມ-ລາວ ຊື່ງໄດ້ດຳເນີນໄປໃນຕົ້ນອາທິດຢູ່ແຂວງເຊີນລາ ທາງຕາເວັນຕົກສຽງເໜືອຂອງ ຫວຽດນາມ.
ໄຂກອງປະຊຸມການພົວພັນຮ່ວມມືລະຫວ່າງສະພາແຫ່ງຊາດຫວຽດນາມ-ລາວ
(ພາບ:vov.vn)
ໂດຍແມ່ນ 1 ໃນຈຳນວນ 10 ແຂວງຂອງ ຫວຽດນາມ ມີເສັ້ນຊາຍແດນຮ່ວມກັບປະເທດ ສປປ ລາວ, ໃນຊຸມປີທີ່ຜ່ານມາ, ແຂວງພູດອຍເຊີນລາ ໄດ້ປະກາດໃຊ້ບັນດານະໂຍບາຍຊຸກຍູ້ການຮ່ວມມືກັບອຳນາດການປົກຄອງບັນດາແຂວງພາກເໜືອຂອງລາວໃນທຸກຂົງເຂດ. ຕາມທ່ານ Thao Xuan Sung ເລຂາຄະນະພັກແຂວງເຊີນລາ ແລ້ວ, ປະຊາຊົນເຂດຊາຍແດນຂອງແຂວງເຊີນລາ ແລະ ແຂວງຕ່າງຂອງ ສປປລາວ ໄດ້ເປັນເຈົ້າການຊ່ວຍເຫຼືອຊື່ງກັນ ແລະ ກັນໃນການພັດທະນາເສດຖະກິດ, ຍົກກສູງຊີວິດການເປັນຢູ່, ພ້ອມກັນກໍ່ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ກໍ່ສ້າງເຂດຊາຍແດນທີ່ມີສະຖຽນລະພາບ ແລະ ພັດທະນາ:
“ແຂວງເຊີນລາ ໄດ້ລົງນາມໃນເອກະສານຮ່ວມມືຮອບດ້ານໃນຂົງເຂດການເມືອງ, ເສດຖະກິດ, ວັດທະນະທຳ, ສັງຄົມ, ການປ້ອງກັນຊາດກັບ 8 ແຂວງທາງພາກເໜືອຂອງລາວ. ສອງຝ່າຍໄດ້ໂຄສະນາກ່ຽວກັບມູນເຊື້ອສາມັກຄີມິດຕະພາບແບບພິເສດ, ການຮ່ວມມືຮອບດ້ານລະຫວ່າງ ຫວຽດນາມ-ລາວ ໃຫ້ແກ່ປະຊາຊົນບັນດາເຜົ່າເປັນປະຈຳ, ພ້ອມກັນປະຕິບັດສັນຍາກ່ຽວກັບຂໍ້ກຳນົດເສັ້ນຊາຍແດນແຫ່ງຊາດ ຫວຽດນາມ-ລາວ ແລະ ບັນດາແຜນນະໂຍບາຍ, ນະໂຍບາຍຂອງພັກ, ລັດຖະບານສອງປະເທດ ໃຫ້ເປັນຢ່າງດີ. ພິເສດ, ໃນໄລຍະທີ່ຜ່ານມາ, ສອງຝ່າຍໄດ້ພ້ອມກັນເປັນເອກະພາບກ່ຽວກັບບັນດາແຜນນະໂຍບາຍ, ມາດຕະການສຳຄັນ, ທັບມ້າງທຸກກົນອຸບາຍມ້າງເພທຳລາຍ, ປະກອບສ່ວນຮັກສາຄວາມສະຫງົບປອດໄພ, ສະຖຽນລະພາບດ້ານການເມືອງໃນເຂດຊາຍແດນ, ປັບປຸງນ້ຳໃຈສາມັກຄີມິດຕະພາບແບບພິເສດ ຫວຽດນາມ-ລາວໃຫ້ໜັກແໜ້ນກ່ວາອີກ“.
ບໍ່ພຽງແຕ່ຢູ່ເຊີນລາ ເທົ່ານັ້ນ, ໃນໄລຍະຜ່ານມາ, ທ້ອງຖິ່ນຕ່າງໆຂອງ ຫວຽດນາມ ກໍໄດ້ເພີ່ມທະວີສາຍພົວພັນມິດຕະພາບ, ນ້ຳໃຈສາມັກຄີ, ການຮ່ວມມື, ສະໜິດຕິດພັນ, ຮັບປະກັນຄວາມເປັນລະບຽບຮຽບຮ້ອຍໃນເຂດຊາຍແດນຕິດກັບ ສປປລາວ ທີ່ມີລວງຍາວກ່ວາ 2000 ກມ. ສອງຝ່າຍໄດ້ສົມທົບກັນເປັນຢ່າງດີໃນການສ້າງບັນດາຄຸ້ມບ້ານຢູ່ເຂດຫ່າງໄກສອກຫຼີກ, ເຂດຊາຍແດນ, ປະກອບສ່ວນລົບລ້າງຄວາມອຶດຫີວ ຫລຸຜ່ອນຄວາມທຸກຍາກ, ຍົກສູງຊີວິດດ້ານວັດຖຸ ແລະ ຈິດໃຈໃຫ້ແກ່ປະຊາຊົນຢູ່ເຂດຊາຍແດນ. ໄປຄຽງຄູ່ກັນນັ້ນ, ທ້ອງຖິ່ນຕ່າງໆກໍໄດ້ຍູ້ແຮງການຮ່ວມມືດ້ານການຄ້າໃນເຂດຊາຍແດນ, ຊື່ງແມ່ນມາດຕະການສຳຄັນເພື່ອພັດທະນາເສດຖະກິດສັງຄົມຢູ່ເຂດຊາຍແດນ ກໍຄືສວມບົດບາດສຳຄັນໃນການແລກປ່ຽນດ້ານການຄ້າ ແລະ ການຜະລິດລວມ, ພິເສດແມ່ນໃນສະພາບການສອງປະເທດສ້າງໂຄງການພັດທະນາເຄືຍຂ່າຍ ຕະຫຼາດຊາຍແດນ ຫວຽດນາມ-ລາວ ຮອດປີ 2020. ນີ້ຖືກຖືວ່າ ແມ່ນກຳລັງໜູນທີ່ແຂງແຮງ ບໍ່ພຽງແຕ່ໃຫ້ແກ່ການຄ້າຊາຍແດນ ຫວຽດນາມ-ລາວ ເທົ່ານັ້ນ, ຫາກຍັງໄດ້ໜູນຊ່ວຍຢ່າງຕັ້ງໜ້າໃຫ້ແກ່ບັນດາໂຄງການລົງທຶນລະຫວ່າງສອງປະເທດອີກດ້ວຍ. ສິ່ງດັ່ງກ່າວໄດ້ພິສູດໃຫ້ເຫັນວ່າ: ໃນປີ 2011, ການຄ້າ ຫວຽດນາມ-ລາວ ໄດ້ມີການຈະເລີນເຕີບໂຕຢ່າງແຮງດ້ວຍລະດັບ 49,8% ເມື່ອທຽບກັບກ່ອນນີ້, ບັນລຸກ່ວາ 700 ລ້ານໂດລາສະຫະລັດ. ທ່ານ Tran Van Hang ປະທານກຳມາທິການການຕ່າງປະເທດ ສະພາແຫ່ງຊາດ ຫວຽດນາມ ໃຫ້ຮູ້ວ່າ:
“ພວກຂ້າພະເຈົ້າຕີລາຄາສູງ ແລະ ຊົມເຊີຍຄວາມມານະພະຍາຍາມຂອງບັນດາທ້ອງຖິ່ນສອງປະເທດ ທີ່ໄດ້ຮ່ວມມືນຳກັນຢ່າງແໜ້ນແຟ້ນ, ມີປະສິດທິຜົນໃນການກໍ່ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ປະກອບສ່ວນສຳຄັນ ຊຸກຍູ້ການຮ່ວມມື, ລົງທຶນດ້ານການຄ້າ, ສ້າງເງື່ອນໄຂອຳນວຍຄວາມສະດວກເພື່ອໃຫ້ປະຊາຊົນຢູ່ຕາມເຂດຊາຍແດນຂອງສອງປະເທດດຳລົງຊີວິດ, ດຳເນີນທຸລະກິດ, ໄປມາຊ່ວຍເຫຼືອຊື່ງກັນ ແລະ ກັນ“
ບົນພື້ນຖານບັນດາຜົນງານທີ່ບັນລຸໄດ້ໃນການຮ່ວມມືລະຫວ່າງບັນດາ ທ້ອງຖິ່ນເຂດຊາຍແດນສອງປະເທດ, ທີ່ກອງປະຊຸມການພົວພັນຮ່ວມມືລະຫວ່າງສະພາແຫ່ງຊາດຫວຽດນາມ-ລາວ, ສາມັກຄີ-ມິດຕະພາບ, ບັນດາຜູ້ແທນໄດ້ສະເໜີໃຫ້ສະພາແຫ່ງຊາດສອງປະເທດ ຕ້ອງສ້າງເງື່ອນໄຂອຳນວຍຄວາມສະດວກກ່ວາອີກ ເພື່ອໜູນຊ່ວຍບັນດາທ້ອງຖິ່ນມີເສັ້ນຊາຍແດນຮ່ວມ ເພື່ອສົ່ງເສີມພັດທະນາການພົວພັນດ້ານເສດຖະກິດກັບຕ່າງປະເທດ ໃນເຂດຊາຍແດນລະຫວ່າງ ຫວຽດນາມ-ລາວ. ທ່ານຮອງນາຍົກລັດຖະມົນຕີ ຫວຽດນາມ Nguyen Xuan Phuc ເວົ້າວ່າ:
“ການຮ່ວມມືດ້ານການສຶກສາ ບຳລຸງສ້າງ ແລະ ການພັດທະນາແຫຼ່ງຊັບພະຍາກອນມະນຸດ ແມ່ນໜ້າທີ່ຍຸດທະສາດອັນຍາວນານຂອງສອງປະເທດ ເພື່ອແນໃສ່ສ້າງຖັນແຖວພະນັກງານທີ່ມີຄວາມສາມາດຢ່າງພຽງພໍ, ຍົກສຸງປະສິດທິຜົນແຫ່ງການຮ່ວມມືບົນຫຼັກການສະເໝີພາບ, ຕ່າງຝ່າຍຕ່າງມີຜົນປະໂຫຍດ, ສ້າງການຫັນປ່ຽນຢ່າງແຮງໃນການຮ່ວມມືດ້ານເສດຖະກິດລະຫວ່າງສອງປະເທດ, ສ້າງເງື່ອນໄຂສະດວກໃຫ້ແກ່ທອ້ງຖິ່ນຕ່າງໆໃນເຂດຊາຍແດນ ແລະ ແຂວງບໍ່ມີຊາຍແດນຕິດຈອດ ມີໂອກາດຮ່ວມມືຮອບດ້ານ, ພັດທະນາເສດຖະກິດ ປົກປັກຮັກສາສິ່ງແວດລ້ອມ, ເພີ່ມະວີວຽກງານປ້ອງກັນຊາດ, ກໍ່ສ້າງເສັ້ນຊາຍແດນແຫ່ງສັນຕິພາບ, ມິດຕະພາບ, ສະຖຽນລະພາບຍາວນານ“
ທ່ານຮອງນາຍົກລັດຖະມົນຕີ Nguyen Xuan Phuc ເຂົ້າຮ່ວມກອງປະຊຸມ
(ພາບ:nguyenxuanphuc.net)
ດ້ວຍເສັ້ນຊາຍແດນຮ່ວມ ຫວຽດນາມ-ລາວ ທີ່ມີຄວາມຍາວທັງໝົດກ່ວາ 2000 ກມ ນັ້ນ, ເລື່ອງຍູ້ແຮງການຮ່ວມມືລະຫວ່າງບັນດາແຂວງຊາຍແດນ ຈະແມ່ນກຳລັງໜູນເພື່ອໃຫ້ປະຊາຊົນສອງປະເທດ ພັດທະນາສາຍພົວພັນອັນເປັນມູນເຊື້ອ, ມິດຕະພາບອັນດີງາມ ຊື່ງການນຳສອງປະເທດໄດ້ເພີ່ມພູນຄູນສ້າງຂຶ້ນ.