(vovworld) - ໃນບົດລາຍງານກ່ຽວກັບຄວາມເສລີໃນການເຊື່ອຖືສາສະຫນາສາກົນປີ 2011 ໂດຍຊວງການຕ່າງປະເທດ ອາເມລິກາ ປະກາດເມື່ອວັນທີ 30/7 ຜ່ານມາ ຖືວ່າ: ລັດຖະບານ ຫວຽດນາມ ບໍ່ສະແດງໃຫ້ເຫັນທ່າອ່ຽງປັບປຸງ ຫລືຖອຍຫລັງ ໃນການປົກປ້ອງສິດເສລີໃນການເຊື່ອຖືສາສະຫນາ. ເຖິງວ່າໄດ້ຮັບຮູ້ບັນດາຜົນງານຂອງຫວຽດນາມໃນການຮັບປະກັນສິດເສລີໃນການເຊື່ອຖືສາສະຫນາ, ການເຫລື້ອມໃສ ຂອງປະຊາຊົນກໍຕາມ, ບົດລາຍງານດັ່ງກ່າວຍັງຄົງມີບັນດາຂໍ້ສັງເກດບໍ່ພາວະວິໄສ, ໂດຍອີງໃສ່ຂໍ້ມູນຂ່າວສານທີ່ຜິດເຂວກ່ຽວກັບສະພາບການຢູ່ ຫວຽດນາມ, ບໍ່ຊຸກຍູ້ການພັດທະນາສາຍພົວພັນລະຫວ່າງ ຫວຽດນາມ ແລະ ອາເມລິກາ.
ໂບດ ດຶກບ່າ ຢູ່ ນະຄອນ ໂຮ່ຈິມີນ
ພາບ:internet
|
ຄວາມຈິງກ່ຽວກັບຄວາມເສລີໃນການເຊື່ອຖືສາສະຫນາຢູ່ ຫວຽດນາມ ໄດ້ຮັບການຮັບຮູ້ຈາກບັນດານັກການເມືອງ, ວົງການເຈົ້າຫນ້າທີ່ຮັບຜິດຊອບບັນດາສາສະຫນາ ອາເມລິກາ ທີ່ເຄີຍມາຢ້ຽມຢາມຫວຽດນາມ. ທ່ານ Michael Lewis Cromartie ຮອງປະທານຄະນະກຳມະການຄວາມເສລີໃນການເຊື່ອຖືສາສະຫນາສາກົນອາເມລິກາ ພາຍຫລັງການຢ້ຽມຢາມຫວຽດນາມ ເມື່ອເດືອນ 5/2010 ໄດ້ໃຫ້ຂໍ້ສັງເກດວ່າ: “ຄວາມເສລີໃນການເຄື່ອນໄຫວສາສະຫນາ, ການເຫລື້ອມໃສ ຢູ່ ຫວຽດນາມ ໄດ້ຮັບການເປີດກວ້າງ ແລະ ມີຄວາມກ້າວຫນ້າຫລາຍຢ່າງ, ມີຫລາຍຈຸດດີເປັນຫນ້າຊື່ນຊົມ”. ທ່ານ Michael Lewis Cromartie ໃຫ້ຮູ້ວ່າ: ການຢ້ຽມຢາມ ຫວຽດນາມ ຄັ້ງທີ 2 ໃນປີ 2007 ພາຍຫລັງການຢ້ຽມຢາມ ຄັ້ງທຳອິດເມື່ອປີ 2007 ເພ່ືອຮັບຟັງ ແລະ ຊອກຮູ້ກ່ຽວກັບການເຄື່ອນໄຫວສາສະຫນາຂອງ ຫວຽດນາມ ໄດ້ຊ່ວຍໃຫ້ທ່ານເຫັນໄດ້ຢ່າງຈະແຈ້ງ ແລະ ມີຄວາມປະທັບໃຈຕໍ່ການເປີດກວ້າງສະຖານທີ່ບູຊາ ແລະ ຮາກຖານສາສະຫນາຢູ່ ຫວຽດນາມ. ທ່ານເຫັນໄດ້ວ່າ: ລັດຖະບານ ຫວຽດນາມ ຢາກເປີດກວ່າງຄວາມເສລີໃນການເຊື່ອຖືສາສະຫນາກວ່າອີກ ແລະ ມີຄວາມມານະພະຍາຍາມຫລາຍຢ່າງເພື່ອຢັ້ງຢືນທັດສະນະນີ້. ຜູ້ຄົນທັງຫລາຍຍັງຈືດີວ່າ: ເດືອນ 12 ປີ 2011, ກ່ອນທີ່ກະຊວງການຕ່າງປະເທດ ອາເມລິກາ ປະກາດບົດລາຍງານກ່ຽວກັບຄວາມເສລີໃນການເຊື່ອຖືສາສະຫນາສາກົນປີ 2010, ຫລວງພໍ່ Bob Roberts ເຈົ້າອະທິການບໍດີໂບດຂ່າວປະເສີດ Northwood ຢູ່ Southlake ລັດ Texas ໄດ້ເນັ້ນຫນັກຕໍ່ຫນ້າສາສະນິກະຊົນນັບພັນຄົນທີ່ເຂົ້າຮ່ວມເວທີປາໄສການເຊື່ອຖືສາສະຫນາທົ່ວໂລກ (Global Faith Forum) ວ່າ: “ບັນດານັກກອມມູນິດ ຫວຽດນາມ ເຄົາລົບຄວາມເສລີໃນການເຊື່ອຖືສາສະຫນາ ແລະ ຫວຽດນາມ ແມ່ນປະເທດມີຫລາຍສາສະຫນາ ດ້ວຍຈຳນວນປະຊາກອນກວ່າ 80% ມີການເຫລື້ອມໃສສາສະຫນາ. ແລະກໍໃນໂອກາດນີ້, ທ່ານ Faleomaveaga ສະມາຊິກສະພາຕຳ່ອາເມລິກາ, ປະທານອະນຸກຳມະການກ່ຽວກັບ ອາຊີ ປາຊີຟີກ ແລະ ສິ່ງແວດລ້ອມທົ່ວໂລກ ສັງກັດກຳມາທິການການຕ່າງປະເທດ - ສະພາຕຳ່ອາເມລິກາ ເມື່ອຕອບສຳພາດຕໍ່ນັກຂ່າວ ວິທະຍຸກະຈາຍສຽງຫວຽດນາມ ປະຈຳ ວໍຊິງຕັນ ໃຫ້ຮູ້ວ່າ:
“ເມື່ອມາຢ້ຽມຢາມ ຫວຽດນາມ, ຂ້າພະເຈົ້າໄດ້ເຂົ້າຮ່ວມພິທີກຳຂອງຊາວຄຼິດຢູ່ໃຈກາງນະຄອນ ໂຮ່ຈິມີນ ແລະ ຂ້າພະເຈົ້າເຫັນວ່າບໍ່ມີແຫ່ງໃດທີ່ປະຊາຊົນຖືກຫ້າມຍ້ອນເຫດຜົນເຫລື້ອມໃສສາສະຫນາ. ພວກຂ້າພະເຈົ້າກໍໄດ້ຈັດການເຄື່ອນໄຫວສາສະຫນາຈຳນວນຫນຶ່ງ ຢູ່ ຫວຽດນາມ ແຕ່ບໍ່ຖືກລັດຖະບານ ຫວຽດນາມ ຂັດຂວາງແຕ່ຢ່າງໃດເລີຍ. ຜ່ານສິ່ງຕ່າງໆທີ່ຂ້າພະເຈົ້າໄດ້ຮູ້ຈັກ ກໍຄືຜ່ານການຢ້ຽມຢາມ ຫວຽດນາມ ຄັ້ງຕ່າງໆ ນັ້ນ ຂ້າພະເຈົ້າບໍ່ມີຍາມໃດທີ່ຄິດວ່າອຳນາດການປົກຄອງ ຫວຽດນາມ ປາບປາມຜູ້ເຊື່ອຖືສາສະຫນາ.”
ມີຄວາມຈິງບໍ່ອາດປະຕິເສດໄດ້, ນັ້ນແມ່ນ ຫວຽດນາມ ແມ່ນປະເທດມີຫລາຍສາສະຫນາ ດ້ວຍຜູ້ເຊື່ອຖືສາສະຫນາກາເກືອບ 22 ລ້ານຄົນ, ຜູ້ທີ່ມີຍົດສັກຕຳແຫນ່ງໃນສາສະຫນາເກືອບ 80.000 ແຫ່ງ ແລະ ຮາກຖານບູຊາ ເກືອບ 24.000 ຄົນ. ໃນຫລາຍປີຜ່ານມາ, ເມື່ອລັດຖະບັນຍັດກ່ຽວກັບການເຫລື້ອມໃສສາສະຫນາ, ເຂົ້າສູ່ຊີວິດຕົວຈິງ ມີ 16 ອົງການສາສະຫນາໄດ້ຮັບການຮັບຮູ້ຖານະນິຕິບຸກຄົນ,ອັນໄດ້ຍົກຍອດຈຳນວນອົງການສາສະຫນາທີ່ໄດ້ຮັບການຮັບຮູ້ຈາກລັດ ຢ່າງເປັນທາງການ ຂຶ້ນເຖິງ 32 ອົງການ. ໃນບົດລາຍງານກ່ຽວກັບຄວາມເສລີໃນການເຊື່ອຖືສາສະຫນາສາກົນປີ 2011, ກະຊວງການຕ່າງປະເທດ ອາເມລິກາ ກໍຍອມຮັບວ່າ: ລັດຖະບານ ຫວຽດນາມ ໄດ້ສ້າງເງື່ອນໄຂເພື່ອໃຫ້ບັນດາສາສະຫນາກໍ່ສ້າງຮາກຖານບູຊາແຫ່ງໃຫມ່ຕື່ມອີກນັບຮ້ອຍແຫ່ງ, ຮັບຮູ້ 2 ກຸ່ມສາສະຫນາໃຫມ່ໃນທົ່ວປະເທດ, ອະນຸຍາດຈົດທະບຽນຫລາຍຄະນະສາສະຫນາໃຫມ່, ອະນຸຍາດເປີດກວ້າງບັນດາການເຄື່ອນໄຫວກຸສົນ ແລະ ອະນຸຍາດໃຫ້ດຳເນີນພິທີກຳດ້ວຍຂອບຂະຫນາດໃຫຍ່ກວ່າ.
“ຄວາມເສລີໃນການເຄື່ອນໄຫວສາສະຫນາ ຢູ່ ຫວຽດນາມ ໄດ້ຮັບການເປີດກວ້າງ |
ກ່ຽວກັບດ້ານກົດໝາຍ, ກໍເຊັ່ນດຽວກັບຫລາຍປະເທດອື່ນ, ຢູ່ ຫວຽດນາມ ບັນດາສາສະຫນາລ້ວນແຕ່ມີຄວາມສະເໝີພາບຕໍ່ກັນ. ບໍ່ມີເລື່ອງ ຜູ້ເຊື່ອຖືສາສະຫນາ ໄດ້ຮັບບຸລິສະສິດກວ່າຜູ້ບໍ່ເຊື່ອຖືສາສະຫນາ. ບໍ່ມີເລື່ອງ ສາສະຫນາໃດຫນຶ່ງຮຽກຮ້ອງໃຫ້ລັດ ຕ້ອງປະຕິບັດຕາມຮູບແບບສາສະຫນາຢູ່ຕ່າງປະເທດ. ກໍຄືບັນດາຂົງເຂດການເມືອງ, ເສດຖະກິດ, ວັດທະນະທຳ, ສັງຄົມ,ຄວາມແຕກຕ່າງກ່ຽວກັບຮູບແບບເວົ້າລວມ, ຄວາມສຳນຶກກ່ຽວກັບການເຫລື້ອໃສສາສະຫນາເວົ້າສະເພາະ ລະຫວ່າງບັນດາປະເທດ ແມ່ນສິ່ງທຳມະດາ. ທັດສະນະຂອງ ຫວຽດນາມ ກ່່ຽວກັບບັນຫານີ້ ສະແດງໃຫ້ເຫັນຢ່າງຈະແຈ້ງວ່າ: ກະຊວງການຕ່າງປະເທດ ອາເມລິກາບໍ່ຄວນ ແລະ ບໍ່ມີສິດຈັດວາງຮູບແບບຄວາມເສລີໃນການເຊື່ອຖືສາສະຫນາຂອງອາເມລິກາໃຫ້ແກ່ບັນດາປະເທດອື່ນ, ໃນນັ້ນ ມີ ຫວຽດນາມ. ທ່ານ Dang Tai Tinh ຫົວຫນ້າກົມຮ່ວມມືສາກົນ, ສັງກັດຄະນະສາສະຫນາລັດຖະບານ ຊີ້ແຈງວ່າ:
“ຂ້າພະເຈົ້າຄິດວ່າ ແຕ່ລະປະເທດ, ແຕ່ລະເຂດ, ແຕ່ລະເຂດແຄ້ວນ ລ້ວນແຕ່ມີຮີດຄອງປະເພນີແຕກຕ່າງກັນ ແລະ ມີພື້ນຖານວັດທະນະທຳແຕກຕ່າງກັນ. ແລະ ຢາກມີຄວາມເຂົ້າໃຈເຊິ່ງກັນ ແລະ ກັນ ແມ່ນຕ້ອງເຂົ້າໃຈພື້ນຖານວັດທະນະທຳ, ຮີດຄອງປະເພນີຂອງປະເທດ, ເຂດແຄ້ວນນັ້ນ ກໍຄືການກຳນົດຂອງກົດໝາຍຢູ່ແຕ່ລະປະເທດ, ບົນພື້ນຖານລັດຖະທຳມະນູນ,ກົດໝາຍສາກົນ ກໍຄືນຳນຽມສາກົນ. ບໍ່ຄວນເອົາທຳນຽມຂອງປະເທດນີ້ ຈັດວາງໃຫ້ປະເທດອື່ນ, ເຮັດຄືແນວນັ້ນກໍເປັນການຍາກທີ່ຈະໂອ້ລົມສົນທະນານຳກັນໄດ້.”
ໃນການປະຊຸມຈັດຂຶ້ນຢູ່ ວໍຊິງຕັນ ເມື່ອວັນທີ 17/11/2011, ທ່ານນາງລັດຖະມົນຕີການຕ່າງປະເທດ ອາເມລິກາ Hilary Clinton ຖະແຫລງວ່າ: ຄວາມເສລີໃນການເຊື່ອຖືສາສະຫນາ ທັງເປັນສິດພື້ນຖານຂອງມະນຸດ, ທັງເປັນປັດໄຈຈຳເປັນໃຫ້ແກ່ສັງຄົມທີ່ມີສະຖຽນລະພາບ, ສັນຕິພາບ ແລະ ວັດທະນາຖາວອນ. ສິ່ງທີ່ລັດຖະມົນຕີການຕ່າງປະເທດ ອາເມລິກາ ຍົກອອກມາ ກໍແມ່ນສິ່ງທີ່ຫວຽດນາມ ໄດ້ ແລະ ພວມປະຕິບັດ. ເປັນທີ່ຈະແຈ້ງແລ້ວວ່າ ຄວາມເສລີໃນການເຊື່ອຖືສາສະຫນາຢູ່ ຫວຽດນາມ ໄດ້ຮັບການຮັບຮູ້ຈາກຊາວ ອາເມເລິກາເອງ ແລະ ແມ່ນຄວາມເປັນຈິງບໍ່ອາດປະຕິເສດໄດ້./.