(vovworld)- ການອະໄພຍະໂທດແມ່ນແຜນນະໂຍບາຍໃຫຍ່ຂອງລັດຫວຽດນາມ ແລະ ໄດ້ຮັບການປະຕິບັດປະຈຳປີກົງກັບໂອກາດດຳເນີນບັນດາວັນບຸນໃຫຍ່ຂອງປະເທດຊາດ. ເພື່ອກະກຽມໃຫ້ແກ່ການອະໄພຍະໂທດປີນີ້, ອົງການທີ່ມີຫນ້າທີ່ຮັບຜິດຊອບພວມຮີບເຮັ່ງສຳເລັດທຸກລະບຽບການ, ເພື່ອເປີດກາລະໂອກາດດັດສ້າງໃຫ້ແກ່ບັນດາຜູ້ມີການກະທຳຜິດກັບຄືສູ່ເຈືອຈານເຂົ້າກັບວົງຄະນາຍາດ. ຄ້າຍຄຸທຂັງ ຮົ່ງກາ, ເມືອງ ເຈີນອຽນ ແຂວງ ອຽນບາຍ ພວມຄຸມຂັງ, ດັດສ້າງນັກໂທດກວ່າ 2000 ຄົນ. ດ້ວຍແຜນນະໂຍບາຍອະນຸໂລມຂອງລັດ, ໃນໂອກາດສະເຫລີມສະຫລອງວັນຊາດທີ 2/9 ແຕ່ລະປີ, ມີນັກໂທດຫລາຍຄົນຮູ້ສຶກຕືນເຕັ້ນໃຈ, ລໍຄອຍການປະກາດຂໍ້ຕົກລົງອະໄພຍະໂທດຂອງທ່ານປະທານປະເທດ. ນັກໂທດ ເຈີນຢວານຊີງ ຊື່ງແມ່ນນັກໂທດທີ່ສະພາອະໄພຍະໂທດຄ້າຍຄຸມຂັງພິຈາລະນາສຳເນົາເອກະສານຍື່ນສະເຫນີຕໍ່ຂັ້ນເທິງອະໄພຍະໂທດໃນປີນີ້ ໃຫ້ຮູ້ວ່າ:
“ເມື່ອຖືກຕັດສິນລົງໂທດຈຳຄຸກ 15 ປີ ຍ້ອນການກະທຳຜິດຂອງຕົນຂ້າພະເຈົ້າໂສກເສົ້າຫລາຍ ແຕ່. ໂດຍໄດ້ຮັບການລະດົມກຳລັງໃຈ, ການສຶກສາອົບຮົມຈາກພະນັກງານໃນຄ້າຍ ຂ້າພະເຈົ້າໄດ້ສູ້ຊົນດ້ວຍຄວາມມານະພະຍາຍາມເພື່ອສຳເລັດວຽກງານຊື່ງພະນັກງານໃນຄ້າຍມອບໝາຍໃຫ້ເພື່ອ ໄດ້ຮັບອະໄພຍະໂທດເພື່ອກັບຄືນເມືອດຳລົງຊີວິດພ້ອມກັບຄອບຄົວ ແລະ ເຈືອຈານເຂົ້າກັບວົງຄະນາຍາດໂດຍໄວ.”
ທ່ານຮອງນາຍົກລັດຖະມົນຕີຫງວຽນຊວນຟຸກມອບຂໍ້ຕົກລົງ
ຂອງປະທານປະເທດອະໄພຍະໂທດໃຫ້ແກ່ນັກໂທດ
ພາບ:internet
|
ການອະໄພຍະໂທດປີນີ້, ຄ້າຍຄຸມຂັງ ຮ່ົາກາ ປະຕິບັດ ບັນດາຂໍ້ກຳນົດຂອງລັດ ຢ່າງເຂັ້ມງວດ ຈາກການໂຄສະນາເພື່ອໃຫ້ນັກໂທດມີຄວາມເຂົ້າໃຈກ່ຽວກັບເງື່ອນໄຂໄດ້ຮັບການພິຈາລະນາອະໄພຍະໂທດຕະຫລອດຮອດການຈັດຕັ້ງໃຫ້ນັກໂທດພິຈາລະນາຕັດສິນບັນດາກໍລະນີມີເງື່ອນໄຂຢ່າງພຽງພໍເພື່ອຮັບອະໄພຍະໂທດ. ສະນັ້ນ ມີ 132 ກໍລະນີທີ່ຄ້າຍຄຸມຂັງສະເຫນີອະໄພຍະໂທດໃນປີນີ້ ລ້ວນແຕ່ໄດ້ຮັບຄວາມເຫັນດີເຫັນພ້ອມສູງຈາກນັກໂທດ.
ໃນຂະນະນັ້ນ ພາຍຫລັງມີຂໍ້ຕົກລົງຂອງປະທານປະເທດກ່ຽວກັບການອະໄພຍະໂທດປີ 2013 ແລະ ຄຳແນະນຳຂອງສະພາທີ່ປຶກສາອະໄພຍະໂທດສູນກາງ, ການນຳຄ້າຍຄຸມຂັງ ອຽນຫ້າ ເມືອງຟູອຽນ ແຂວງ ເຊີນລາ ໄດ້ຜັນຂະຫຍາຍຢ່າງວ່ອງໄວ ແລະ ລະອຽດ, ຮັບປະກັນໃຫ້ບັນດານັກໂທດດັດສ້າງເປັນຢ່າງດີໄດ້ຮັບການຊົມໃຊ້ນະໂຍບາຍອະນຸໂລມ. ປະຈຸບັນ ຄ້າຍຄຸມຂັງ ອຽນຫ້າ ໄດ້ສົ່ງສຳເນົາເອກະສານຂອງນັກໂທດ 81 ຄົນເພື່ອສະເຫນີອະໄພຍະໂທດໃນໂອກາດວັນຊາດທີ 2/9 ປີນີ້. ພັນໂທ ຟ້າມຊວນງຽບ, ນາຍທຳມະໂລງຄ້າຍຄຸມຂັງ ອຽນຫ້າ ຢືນຢັນວ່າ:
“ໃນວິວັດການພິຈາລະນາຄັດເລືອກ ພວກຂ້າພະເຈົ້າຮັບປະກັນໃຫ້ນັກໂທດທຸກຄົນໄດ້ຮູ້ຈັກເຖິງມາດຖານທັງໝົດ, ຂັ້ນຕອນເພື່ອພິຈາລະນາອະໄພຍະໂທດໃຫ້ແກ່ນັກໂທດ. ເພາະສະນັ້ນ ບັນດານັກໂທດ ລ້ວນແຕ່ມີຄວາມເຂົ້າໃຈ ແລະ ກຳແຫນ້ນເງື່ອນໄຂໄດ້ຮັບອະໄພຍະໂທດ. ອາດຈະຢືນຢັນໄດ້ວ່າ ພວກຂ້າພະເຈົ້າໄດ້ປະຕິບັດວຽກງານອະໄພຍະໂທດຢ່າງເປີດເຜີຍ, ຖືກຕ້ອງກັບຂັ້ນຕອນກໍຄືການກຳນົດຂອງກົດໝາຍ, ຮັບປະກັນປະຊາທິປະໄຕ, ເປີດເຜີຍ, ກະຈ່າງແຈ້ງ.”
ພ້ອມກັບວິວັດການກະກຽມຄ້າຍຄຸມຂັງຄັ້ງຕ່າງໆ, ບັນດາກຸ່ມກວດກາລະຫວ່າງຂະແຫນງ ໄດ້ລົງກວດກາໂດຍກົງ, ປຽບທຽບສຳເນົາເອກະສານສະບັບຕົ້ນຂອງບັນດານັກໂທດກັບສຳເນົາເອກະສານສະເຫນີຮັບອະໄພຍະໂທດ. ບັນດາສະມາຊິກສະພາທີ່ປຶກສາອະໄພຍະໂທດ ກໍລົງກວດກາໂດຍກົງຢູ່ຄ້າຍຄຸມຂັງ. ໃນຂະນະນັ້ນ ໄອຍະການປະຊາຊົນ ດຳເນີນການກວດກາສຳເນົາເອກະສານສະເຫນີອະໄພຍະໂທດຢ່າງແຫນ້ນແຟ້ນ,ສະພາທີ່ປຶກສາອະໄພຍະໂທດສູນກາງໄດ້ພິຈາລະນາຕັດສິນ, ກວດກາຢັ້ງຢືນສຳເນົາເອກະສານ, ບັນຊີລາຍຊື່ນັກໂທດທີ່ໄດ້ຮັບສະເຫນີອະໄພຍະໂທດຍື່ນສະເຫນີຕໍ່ປະທານປະເທດພິຈາລະນາຕັດສິນ. ທ່ານຮອງນາຍົກລັດຖະມົນຕີ ຫງວຽນຊວນຟຸກ, ປະທານສະພາອະໄພຍະໂທດສູນກາງໃຫ້ຮູ້ວ່າ:
“ການອະໄພຍະໂທດແມ່ນຄວາມອະນຸໂລມພິເສດຂອງລັດສຳລັບຜູ້ຖືກຕັດສິນລົງໂທດ ເພື່ອສົ່ງເສີມເຂົາເຈົ້າກິນແຫນງແຄງໃຈ, ຕັ້ງຫນ້າໃນການຮຳ່ຮຽນ, ອອກແຮງງານ, ດັດສ້າງ, ສູ້ຊົນຝືກຝົນຫລໍ່ຫລອມໃຫ້ກາຍເປັນຜູ້ມີປະໂຫຍດຕໍ່ສັງຄົມ. ການອະໄພຍະໂທດສະແດງໃຫ້ເຫັນມູນເຊື້ອມະນຸດສະທຳຂອງຊາດທີ່ມີຕໍ່ນັກໂທດ. ການອະໄພຍະໂທດຕ້ອງໄດ້ຮັບການປະຕິບັດຢ່າງແຫນ້ນແຟ້ນ ແລະ ຖືກກັບກົດໝາຍ, ຮັບປະກັນປະຊາທິປະໄຕ, ພາວະວິໄສ, ຍຸຕິທຳ, ເປີດເຜີຍ, ໂປ່ງໃສ ແລະ ຖືກກັບເປົ້າໝາຍ, ເງື່ອນໄຂ, ບໍ່ປະໃຫ້ເກີດປະກົດການຫຍໍ້ທໍ້, ຮັບປະກັນຄວາມຮຽກຮ້ອງຕ້ອງການພົວພັນພາຍໃນປະເທດ, ຕ່າງປະເທດ, ຮັບປະກັນຄວາມສະຫງົບປອດໄພແຫ່ງຊາດ ແລະ ຄວາມເປັນລະບຽບຮຽບຮ້ອຍທາງສັງຄົມ.”
ການອະໄພຍະໂທດ, ປ່ອຍຕົວນັກໂທດກ່ອນກຳນົດເວລາ ແມ່ນນະໂຍບາຍມະນຸດສະທຳຂອງຫວຽດນາມ ໃນວຽກງານຕໍ່ສູ້ປ້ອງກັນ ແລະ ຕ້ານອາດຊະຍາກຳ. ນັບແຕ່ປີ 2009 ມາຮອດປະຈຸບັນ, ຫວຽດນາມ ໄດ້ປະຕິບັດການອະໄພຍະໂທດ, ປ່ອຍຕົວນັກໂທດກ່ອນກຳນົດເວລາ 4 ຄັ້ງ ໃຫ້ແກ່ນັກໂທດ 48.000 ຄົນ, ໃນນັ້ນ ມີນັກໂທດຫລາຍຄົນແມ່ນຊາວຕ່າງປະເທດທີ່ລະເມີດກົດໝາຍຫວຽດນາມ. ວຽກງານອະໄພຍະໂທດຂອງຫວຽດນາມ ໄດ້ຮັບການຕີລາຄາສູງຈາກຫາງສຽງພາຍໃນ ແລະ ຕ່າງປະເທດ.