 ໂຄສົກ ກຽນເກື່ອງ |
ໂຄສົກ ກຽນເກື່ອງ ເກີດປີ 1932 ຢູ່ ຮ່າໂນ້ຍ. ທ່ານເຂົ້າຮ່ວມການປະຕິວັດນັບແຕ່ປີ 1945. ພາຍຫຼັງເຂົ້າຮ່ວມບັ້ນຮົບເຂດ ເຕິຍບັກ, ຮອດປີ 1958 ທ່ານໄດ້ມາເຮັດວຽກຢູ່ ວິທະຍຸກະຈາຍສຽງຫວຽດນາມ ແລະ ໄດ້ກາຍເປັນໂຄສົກທີ່ມີຊື່ສຽງ. ຍ້ອນສຳນຽງອ່ານສຳລັບບົດວິຈານການເມືອງຂອງໂຄສົກ ກຽນເກື່ອງນັ້ນ, ບັນດາບົດວິເຄາະວິຈານທາງ ວິທະຍຸກະຈາຍສຽງຫວຽດນາມ ໃນຊຸມປີທຳການຕໍ່ຕ້ານ ໄດ້ກາຍເປັນສັນຍາລັກໃຫ້ແກ່ ກຳລັງແຮງຂອງການຕໍ່ສູ້ດ້ານແນວຄິດ ຜ່ານຄື້ນກະຈາຍສຽງ. ນັກຂ່າວ ດົ່ງແມັ້ງຮຸ່ງ ຫົວໜ້າພະແນກເລຂາບັນນາທິການຂອງ ວິທະຍຸກະຈາຍສຽງຫວຽດນາມ ໃຫ້ຮູ້ວ່າ:
“ໂຄສົກ ການເກື່ອງ ແມ່ນຄົນສຸພາບ, ມີສຳນຽງອ່ານແບບອ່ອນໂຍນ, ແຕ່ສຳນຽງເວົ້າຂອງທ່ານພັດມີຄວາມເຂັ້ມແຂງ ຂ້ຽວຂາດ. ຍ້ອນເຫດນີ້ເອງ ເມື່ອທ່ານອ່ານບັນດາບົດເຄາະວິຈານການເມືອງທາງ ວິທະຍຸກະຈາຍສຽງຫວຽດນາມ ເພື່ອຕໍ່ສູ້ໃນການຕໍ່ຕ້ານ ຍາດເອົາເອກະລາດ ກໍ່ໄດ້ສະແດງໃຫ້ເຫັນກຳລັງແຮງພາຍໃນຂອງປະຊາຊົນ, ແຕ່ທີ່ຈິງແລ້ວ ນັ້ນກໍ່ແມ່ນສຽງເວົ້າອັນຊອບທຳ ສຽງເວົ້າຂອງຊາດຫວຽດນາມ ທີ່ສົ່ງເຖິງພໍ່ແມ່ພີ່ນ້ອງຢູ່ພາຍໃນປະເທດ ແລະ ສາກົນ”.
ຈຸດທີ່ພົ້ນເດັ່ນໃນການປະກອບອາຊີບເປັນໂຄສົກຂອງທ່ານ ກໍ່ແມ່ນຄວາມແຕກຕ່າງໂດຍພື້ນຖານກັບໂຄສົກຄົນອື່ນໆ ນັ້ນແມ່ນທ່ານພະຍາຍາມຫັນຈາກການອ່ານໄປສູ່ການເວົ້າ ການເລົ່າໃຫ້ຜູ້ຟັງຮັບຊາບ. ສິ່ງນີ້ກໍ່ບໍ່ແມ່ນງ່າຍຍ້ອນວ່າຕ້ອງຕິດຕາມເນື້ອໃນເອກະສານ ແລະ ເນື້ອໃນນັ້ນບໍ່ແມ່ນຕົນເອງເປັນຜູ້ຮຽບຮຽງ. ໃນຊຸມປີທຳສົງຄາມຍາດເອົາເອກະລາດ, ທ່ານຜູ້ອຳນວຍການໃຫຍ່ ວິທະຍຸກະຈາຍສຽງ ຫວຽດນາມ ເຈິ່ນເລີ່ມ ເຄີຍສະເໜີວ່າ ຕ້ອງມອບເຮືອນຢູ່ໃຫ້ແກ່ໂຄສົກ ກຽນເກື່ອງ ຢູ່ເຮືອນເລກທີ 5 ຖະໜົນ ເຈິ່ນຝູ ຮ່າໂນ້ຍ ເຊິ່ງຕັ້ງຢູ່ໃກ້ສຳນັກງານ ວິທະຍຸກະຈາຍສຽງຫວຽດນາມຢູ່ເຮືອນເລກທີ 58 ຖະໜົນ ກວ໊ານສື ຮ່າໂນ້ຍ ເພື່ອມີຄວາມສະດວກໃນການໄປເຮັດວຽກ. ໂຄສົກ ຫວຽດຮຸ່ງ ແບ່ງປັນວ່າ:
“ລຸງກຽນເກື່ອງ ແມ່ນຜູ້ມີບົດຮຽນປະສົບການໃນການປະກອບອາຊີບເປັນໂຄສົກ ແລະ ມີອິດທິພົນຊື່ສຽງຜ່ານຄື້ນຂອງ ວິທະຍຸກະຈາຍສຽງຫວຽດນາມ, ເປັນຕົ້ນແມ່ນໄລຍະປົດປ່ອຍພາກໃຕ້ ແລະ ໃນຊຸມປີແຫ່ງການຕໍ່ຕ້ານກູ້ຊາດ. ໂຄສົກ ກຽນເກື່ອງ ຍັງແມ່ນຜູ້ມີຄວາມຈິງໃຈ ຍາມໃດກໍ່ໃຫ້ຄວາມຊ່ວຍເຫຼືອພວກຂ້າພະເຈົ້າກ່ຽວກັບວິຊາສະເພາະ ແລະ ມີຄວາມໃກ້ຊິດສະໜິດສະໜົມກັບທຸກໆຄົນ”.
ໂຄສົກ ກຽນເກື່ອງ ຖືກອຸປະມາດັ່ງປຶ້ມວັດຈະນານຸກົມມີຊີວິດ. ທ່ານເມົາມົວ ແລະ ໄດ້ເກັບກຳວັດຈະນານຸກົມຫຼາຍເຫຼັ້ມ ແລະ ເຄີຍສະຫຼະເວລາເພື່ອຊອກຄົ້ນຫາ ຊອກຮູ້ເຖິງຮາກເຖິງກົກ ຂອງແຕ່ລະຄຳສັບ ອັນໄດ້ນຳມາເຊິ່ງຜົນປະໂຫຍດຫຼາຍຢ່າງໃຫ້ແກ່ອາຊີບເປັນໂຄສົກຂອງທ່ານ. ທ່ານ ເຈືອງກົ້ງຮວ່າ ອະດີດນັກຂ່າວ ວິທະຍຸກະຈາຍສຽງຫວຽດນາມ ຫວນຄືວ່າ:
“ອ້າຍ ກຽນເກື່ອງ ພ້ອມກັບບັນດາໂຄສົກຄື ຕວຽດມາຍ, ຫວຽດຄວາ, ເຟືອງຈີ ແມ່ນໂຄສົກລຸ້ນອ້າຍກົກຂອງ ວິທະຍຸກະຈາຍສຽງຫວຽດນາມ. ອ້າຍ ກຽນເກື່ອງ ກໍ່ມີສຳນຽງອ່ານໃສ ແລະ ແຈ້ງ. ໂດຍແມ່ນຄົນຄ່ຽມຄົມ ເຖິງວ່າອ້າຍແມ່ນໂຄສົກທີ່ໄດ້ຮັບກຽດໃນໄລຍະ ວິທະຍຸກະຈາຍສຽງຫວຽດນາມ ຕັ້ງໜ້າໂຄສະນາໃຫ້ແກ່ການຕໍ່ຕ້ານກູ້ຊາດຂອງຊາດ ຫວຽດນາມ”.
ໂຄສົກ ກຽນເກື່ອງ ແມ່ນໜຶ່ງໃນບັນດາໂຄສົກສຽງຄຳຂອງ ວິທະຍຸກະຈາຍສຽງຫວຽດນາມ. ທ່ານພ້ອມກັບບັນດາໂຄສົກຄົນອື່ນໆໄດ້ກາຍເປັນສ່ວນໜຶ່ງໃນປະຫວັດຂອງ ວິທະຍຸກະຈາຍສຽງຫວຽດນາມ ປະກອບສ່ວນສ້າງເຄື່ອງໝາຍໃຫ້ແກ່ວິທະຍຸກະຈາຍສຽງແຫ່ງຊາດ.