ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງ ຫວຽດນາມ ໄດ້ຮັບຈົດໝາຍ, ອີເມວ 390 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 36 ປະເທດ ແລະ ເຂດແຄວ້ນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 26 ສະບັບ ຈາກທ່ານຜູ້ຟັງລາວ.

(ເວັບໄຊພາກພາສາລາວ)

ມີທ່ານຜູ້ຟັງຫຼາຍທ່ານໄດ້ໂທລະສັບ, ສົ່ງຂໍ້ຄວາມອວຍພອນມາຫາລາຍການພາກພາສາ ລາວ, ເນື່ອງໃນໂອກາດສະເຫຼີມສະຫຼອງ 69 ປີແຫ່ງວັນສ້າງຕັ້ງລາຍການພາກພາສາ ລາວ (12 ຕຸລາ 1954 – 12 ຕຸລາ 2023). ໃນນັ້ນ, ເພື່ອນ ສຸລິຈັນ, ຢູ່ແຂວງ ຈຳປາສັກ, ໄດ້ສົ່ງຄຳອວຍພອນດ້ວຍເນື້ອໃນທີ່ວ່າ: “ຂ້າພະເຈົ້າຂໍອວຍພອນໃຫ້ບັນດາບັນນາທິການລາຍການພາກພາສາ ລາວ ຈົ່ງມີສຸຂະພາບເຂັ້ມແຂງ, ອວຍພອນໃຫ້ລາຍການນັບມື້ນັບພັດທະນາ, ມີຫຼາຍເນື້ອໃນທີ່ເປັນປະໂຫຍດ ແລະ ອຸດົມສົມບູນຕື່ມອີກ”. ສ່ວນເພື່ອນ ຄຳຕັນ, ຢູ່ນະຄອນຫຼວງ ວຽງຈັນ, ໄດ້ຂຽນວ່າ: “ຊົມເຊີຍວັນສ້າງຕັ້ງລາຍການພາກພາສາ ລາວ, VOV ຄົບຮອບ 69 ປີ - ເຊິ່ງແມ່ນລາຍການທີ່ຂ້າພະເຈົ້າໄດ້ຮັບຟັງທຸກວັນ. ຂ້າພະເຈົ້າຈະສືບຕໍ່ເປັນຜູ້ຟັງ ຕິດຕາມລາຍການຕະຫຼອດໄປ”.

ເພື່ອນ ຄຳຫຼ້າ ທອງສຸກ, ດຳລົງຊີວິດຢູ່ນະຄອນຫຼວງ ວຽງຈັນ, ໄດ້ສົ່ງຂໍ້ຄວາມມາຫາລາຍການດ້ວຍເນື້ອໃນທີ່ວ່າ: “ບັນດາລາຍການຂອງ VOV ລ້ວນແຕ່ເປັນປະໂຫຍດ, ດ້ວຍແຫຼ່ງຂ່າວທີ່ອຸດົມສົມບູນ, ຫຼາຍຮູບຫຼາຍແບບ ໄດ້ຊ່ວຍໃຫ້ຊາວ ລາວ ຄືຂ້າພະເຈົ້າສາມາດມີຄວາມເຂົ້າໃຈກ່ຽວກັບປະເທດຊາດ ແລະ ຊາວ ຫວຽດນາມ ຫຼາຍຂຶ້ນ”.

ເພື່ອນ ຄຳປະສົງ ໄດ້ແບ່ງປັນທາງ Facebook ດ້ວຍເນື້ອໃນທີ່ວ່າ: “ຫວ່າງແລ້ວນີ້, ຢູ່ນະຄອນຫຼວງ ວຽງຈັນ ໄດ້ຈັດພິທີເປີດວາລະສານອະລຸນໃໝ່ເອເລັກໂຕນິກ, ຄະນະໂຄສະນາອົບຮົບສູນກາງພັກປະຊາຊົນປະຕິວັດ ລາວ. ນີ້ແມ່ນໂຄງການໂດຍ ອົງການບັນນາທິການວາລະສານພັກກອມມູນິດ ຫວຽດນາມ ແລະ ກຸ່ມບໍລິສັດອຸດສາຫະກຳໂທລະສົມ ມະນາຄົມກອງທັບ Viettel ໜູນຊ່ວຍ, ເຊິ່ງສະແດງໃຫ້ເຫັນ ນ້ຳໃຈມິດຕະພາບ, ອຸ້ມຊູຊ່ວຍເຫຼືອຊຶ່ງກັນແລະກັນລະຫວ່າງ 2 ອົງການທິດສະດີການເມືອງຂອງ 2 ພັກເວົ້າສະເພາະ ແລະ 2 ປະເທດເວົ້າລວມ. ວາລະສານອະລຸນໃໝ່ເອເລັກໂຕນິກ ໄດ້ເປີດຕົວ ເຂົ້າສູ່ການເຄື່ອນໄຫວຢ່າງເປັນທາງການ ບໍ່ພຽງແຕ່ແມ່ນທ່າອ່ຽງທີ່ຈຳເປັນເໝາະສົມກັບສື່ມວນຊົນທັນສະໄໝ, ຫາກຍັງຊ່ວຍໃຫ້ວາລະສານມີພາຫະນະສື່ຂ່າວກ່ຽວກັບບັນດາແນວທາງ, ແຜນນະໂຍບາຍຂອງພັກ, ລັດ ລາວ ເຖິງປະຊາຊົນ ລາວ ອີກດ້ວຍ”.

ນະຄອນຫຼວງ ຮ່າໂນ້ຍ (ພາບປະກອບອິນເຕີເນັດ)

ທ່ານ ວັນໄຊ ຕະວິນຍານ, ຮອງຫົວໜ້າຄະນະໂຄສະນາອົບຮົມສູນກາງພັກ ລາວ ໄດ້ສົ່ງຂໍ້ຄວາມມາຫາລາຍການ ດ້ວຍເນື້ອໃນທີ່ວ່າ: “ຂ້າພະເຈົ້າຢາກຊອກຮູ້ກ່ຽວກັບເສດຖະກິດຂອງນະຄອນຫຼວງ ຮ່າໂນ້ຍ, ປະຊາກອນຮ່າໂນ້ຍ ຫຼາຍປານໃດ, ຈຳນວນຊາວຕ່າງປະເທດດຳລົງຊີວິດຢູ່ທີ່ນີ້ ແລະ ຄວາມໜາແໜ້ນ ຂອງປະຊາຊົນຢູ່ ຮ່າໂນ້ຍ ມີຈັກຄົນຕໍ່ກິໂລຕາແມັດ. ຂໍຂອບໃຈນຳທາງລາຍການ".

ທ່ານ ວັນໄຊ ຕະວິນຍານ ທີ່ຮັກແພງ! ເພື່ອຕອບຄຳຖາມຂອງທ່ານກ່ຽວຂ້ອງເຖິງບາງຂໍ້ມູນຂອງ ຮ່າໂນ້ຍ, ລາຍການພາກພາສາ ລາວ ແຈ້ງມາຍັງທ່ານຄືດັ່ງນີ້:

+ ກ່ຽວກັບສະພາບເສດຖະກິດຂອງ ຮ່າໂນ້ຍ:

ຕາມຕົວເລກຂອງກົມສະຖິຕິ ນະຄອນຮ່າໂນ້ຍ ແລ້ວ, ໃນ 8 ເດືອນຂອງປີ 2023, ວົງເງິນສົ່ງອອກສິນຄ້າຂອງ ຮ່າໂນ້ຍ ບັນລຸ 10,8 ຕື້ USD, ຫຼຸດລົງ 4,6% ເມື່ອທຽບໃສ່ໄລຍະດຽວກັນຂອງປີ 2022. ໃນນັ້ນ, ຂົງເຂດເສດຖະກິດພາຍໃນປະເທດບັນລຸ 6,1 ຕື້ USD ກ່ຽວກັບມູນຄ່າສົ່ງອອກ; ຂົງເຂດມີການລົງທຶນໂດຍກົງ ຈາກຕ່າງປະເທດບັນລຸ 4,7 ຕື້ USD. ລວມຍອດລາຍຮັບງົບປະມານແຫ່ງລັດຢູ່ ຮ່າໂນ້ຍ ໃນໄລຍະ 8 ເດືອນຕົ້ນປີ 2023 ຄາດວ່າແມ່ນ 282.000 ຕື້ດົ່ງ (ກວ່າ 11 ລ້ານ USD).

+ ກ່ຽວກັບຄວາມໜາແຫນ້ນຂອງປະຊາກອນຮ່າໂນ້ຍ:

ຕາມຕົວເລກສະຖິຕິ, ປະຊາກອນນະຄອນ ຮ່າໂນ້ຍ ໃນປີ 2020 ມີປະມານ 8,3 ລ້ານຄົນ, ປີ 2021 ມີປະມານ 8,34 ລ້ານຄົນ ແລະ ປີ 2022 ມີປະມານ 8,4 ລ້ານຄົນ. ຮອດທ້າຍໄຕມາດທີ 1 ຂອງປີ 2023, ຄາດວ່າ, ປະຊາກອນນະຄອນຫຼວງຈະມີປະມານ 8,5 ລ້ານຄົນ ແລະ ກວມເອົາປະມານ 8,4 – 8,5% ຂອງປະຊາກອນທົ່ວປະເທດ. ປະຈຸບັນ, ນະຄອນ ຮ່າໂນ້ຍ ພຽງແຕ່ຢູ່ອັນດັບຖັດຈາກນະຄອນ ໂຮ່ຈີມິນ ເທົ່ານັ້ນ ແລະ ແມ່ນນະຄອນທີ່ມີປະຊາກອນຫຼາຍອັນດັບ 2 ຂອງ ຫວຽດນາມ. ເຖິງຢ່າງໃດກໍຕາມ, ຕົວເລກປະຊາກອນຂອງ ຮ່າໂນ້ຍ ອາດຈະຫຼາຍກວ່າຍ້ອນສະພາບການເຄື່ອນຍ້າຍຖິ່ນຖານມາຈາກຫຼາຍແຂວງ, ນະຄອນໃນທົ່ວປະເທດ. ຄວາມໜາແໜ້ນໂດຍສະເລ່ຍຂອງປະຊາກອນ ຮ່າໂນ້ຍ ຮອດປີ 2022 ແມ່ນປະມານ 2.398 ຄົນ/ກິໂລຕາແມັດ (ຂໍ້ມູນອ້າງອີງ).

ລະດູໃບໄມ້ຫຼົ່ນຢູ່ ຊາປາ (ພາບ: onetour)

ເພື່ອນ ບຸນທະວີ ອິນທະວົງ, ຢູ່ນະຄອນຫຼວງ ວຽງຈັນ ໄດ້ສົ່ງອີເມວມາຫາລາຍການ, ໂດຍຢາກໄດ້ຮັບການແນະນຳ ກ່ຽວກັບສະຖານທີ່ທ່ອງທ່ຽວເໝາະສົມທີ່ສຸດໃນຊຸມເດືອນລະດູໃບໄມ້ຫຼົ່ນ, ທາງພາກເໜືອ ຫວຽດນາມ.

ເພື່ອນ ບຸນທະວີ ອິນທະວົງ ທີ່ຮັກແພງ, ລາຍການພາກພາສາ ລາວ ຈະແນະນຳກ່ຽວກັບສະຖານທີ່ທ່ອງທ່ຽວ ຈຳນວນໜຶ່ງທີ່ເໝາະສົມກັບການໄປທ່ອງທ່ຽວໃນລະດູໃບໄມ້ຫຼົ່ນ ຄືດັ່ງນີ້:

+ ໄປທ່ອງທ່ຽວໃນລະດູໃບໄມ້ຫຼົ່ນຢູ່ ຊາປາ: ຊາປາ ໄດ້ນຳມາເຊິ່ງຄວາມສວຍງາມ, ພິເສດແມ່ນຮູບພາບທົ່ງເຂົ້າ ສຸກເຫຼືອງ. ເພື່ອຊົມລະດູເຂົ້າສຸກເຫຼືອງທີ່ສວຍງາມຂອງ ຊາປາ ເພື່ອນຄວນໄປບັນດາເຂດບ້ານ ຍ້ອນມີຈຸດຊົມວິວ ທີ່ສວຍງາມທີ່ສຸດເໝາະກັບການຖ່າຍຮູບ.

+ ໄປທ່ອງທ່ຽວລະດູໃບໄມ້ຫຼົ່ນຢູ່ ຮ່າຢາງ: ຮ່າຢາງ ໄດ້ນຳມາເຊິ່ງຄວາມຮູ້ສຶກສະບາຍໃຈ, ເຢັນສະບາຍ ດ້ວຍສີສັນທີ່ຫຼາກຫຼາຍ. ນັ້ນແມ່ນສີເຫຼືອງຂອງນາຂັ້ນໄດ ຫຼື ສີອິດຂອງດອກບັກວິດທີ່ເບັ່ງບານປົກຄຸມທົ່ວໂນນພູ.

+ໄປທ່ອງທ່ຽວລະດູໃບໄມ້ຫຼົ່ນຢູ່ ຮ່າໂນ້ຍ: ເມື່ອມາທ່ອງທ່ຽວໃນລະດູໃບໄມ້ຫຼົ່ນ, ເພື່ອນຈະເຫັນໄດ້ ລົດຖີບຕ່າງດອກໄມ້ຫຼາກຫຼາຍສີສັນ, ສ້າງເປັນຈຸດທີ່ເປັນເອກະລັກສະເພາະຢູ່ແຫ່ງນີ້. ລະດູໃບໄມ້ຫຼົ່ນຢູ່ ຮ່າໂນ້ຍ ຍັງຕິດພັນກັບເຂົ້າເໝົ້າອ່ອນ ແລະ ໝາກແຂ້ສຸກ (ໝາກເສົ໋າສຸກ), ເຊິ່ງແມ່ນສິ່ງທີ່ນັກທ່ອງທ່ຽວ ເມື່ອມາຢ້ຽມຢາມແລ້ວ ກໍ່ລ້ວນແຕ່ຊື້ໄປເປັນຂອງຕ້ອນຂອງຝາກໃຫ້ຄອບຄົວ ແລະ ເພື່ອນຂອງຕົນ.