(vovworld) – ວັນທີ 3/4, ທ່ານນາຍົກລັດຖະມົນຕີ ມາເລເຊຍ Dato’ Sri Mohd Najib Tun Razak ໄດ້ເດີນທາງມາຮອດ ຮ່າໂນ້ຍ, ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການແຕ່ວັນທີ 3 – 5/4, ຕາມຄຳເຊື້ອເຊີນຂອງທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ. ພິທີຕ້ອນຮັບນາຍົກລັດຖະມົນຕີ ມາເລເຊຍ ຢ່າງເປັນທາງການຈະໄດ້ຮັບການຈັດຕັ້ງໃນຕອນເຊົ້າວັນທີ 4/4, ຢູ່ສຳນັກງານປະທານປະເທດ.
ເມື່ອຕອບສຳພາດຕໍ່ສື່ມວນຊົນເນື່ອງໃນໂອກາດນີ້, ທ່ານລັດຖະມົນຕີການຕ່າງປະເທດ ມາເລເຊຍ YB Dato’ Sri Anifah Aman ໃຫ້ຮູ້ວ່າ: ການຢ້ຽມຢາມເພື່ອແນໃສ່ເພີ່ມທະວີການພົວພັນມິດຕະພາບ 2 ຝ່າຍລະຫວ່າງ ມາເລເຊຍ ແລະ ຫວຽດນາມ. ທ່ານລັດຖະມົນຕີຖືວ່າ ການພົວພັນລະຫວ່າງ 2 ປະເທດຈະໄດ້ຮັບການຍົກສູງກ່ວາອີກໃນຄວາມມານະພະຍາຍາມລວມເພື່ອແນໃສ່ຊຸກຍູ້ການຮ່ວມມື, ແລກປ່ຽນການຢ້ຽມຢາມຄັ້ງຕ່າງໆລະຫວ່າງບັນດາຄະນະຜູ້ແທນຂັ້ນສູງ, ກໍ່ຄືການພົວພັນແລກປ່ຽນປະຊາຊົນລະຫວ່າງ 2 ປະເທດ.
ຕາມທ່ານລັດຖະມົນຕີ Anifah Aman ແລ້ວ, ໂດຍແມ່ນ 2 ປະເທດບ້ານໃກ້ເຮືອນຄຽງທີ່ສະໜິດສະໜົມ ແລະ ເປັນສະມາຊິກ ອາຊຽນ, ຫວຽດນາມ ແລະ ມາເລເຊຍ ອາດຈະສຸມໃສ່ຮ່ວມມືໃນຫຼາຍຂົງເຂດ. ໃນການຢ້ຽມຢາມຄັ້ງນີ້, 2 ປະເທດຈະເຊັນບົດບັນທຶກຊ່ວຍຈຳກ່ຽວກັບການຮ່ວມມືດ້ານກະສິກຳ.
ເມື່ອເຕື້ອງເຖິງບັນດາຄວາມມານະພະຍາຍາມຂອງ ຫວຽດນາມ ໃນການຊອກຫາເຮືອບິນຫາຍສາບສູນ MH370 ຂອງບໍລິສັດການບິນ Malaysia Airlines, ທ່ານລັດຖະມົນຕີ Anifah Aman ຢືນຢັນວ່າ: ມາເລເຊຍ ຕີລາຄາສູງການໜູນຊ່ວຍຂອງ ຫວຽດນາມ ໃນບັນດາການເຄື່ອນໄຫວຊອກຫາ ແລະ ກູ້ໄພກູ້ຊີບ, ແລະ ມານະພະຍາຍາມເພື່ອກຳນົດບ່ອນທີ່ເຮືອບິນ MH370 ຫາຍສາບສູນ, ນັບແຕ່ໄດ້ຮັບຂ່າວເຮືອບິນລຳດັ່ງກ່າວໄດ້ຕົກລົງເຂດທະເລຕາເວັນອອກ.