(vovworld) – ໃນຂອບເຂດບັນດາການເຄື່ອນໄຫວຢູ່ນອກກອງປະຊຸມລັດຖະມົນຕີເສດຖະກິດ ອາຊຽນ ແລະ ບັນດາກອງປະຊຸມທີ່ກ່ຽວຂ້ອງ, ວັນທີ 7/3, ທະນາຄານ Standard Chartered ໄດ້ຈັດຕັ້ງການປະຊຸມຂ່າວ ດ້ວຍຫົວຂໍ້ວ່າ “ເສດຖະກິດ ຫວຽດນາມ ແລະ ຄວາມສຳຄັນໃນການຮ່ວມມືດ້ານການຄ້າລະຫວ່າງ ຫວຽດນາມ ກັບບັນດາປະເທດໃນພາກພື້ນ ອາຊຽນ”. ທີ່ການປະຊຸມຂ່າວ, ບັນດານັກປາຖະກະຖາ ໄດ້ແບ່ງປັນຄວາມສຳຄັນຂອງການຄ້າໃນກຸ່ມ ອາຊຽນ ທີ່ມີຕໍ່ ຫວຽດນາມ ແລະ ມາດຕະການເພື່ອໃຫ້ ຫວຽດນາມ ໄດ້ຮັບຜົນປະໂຫຍດຫຼາຍທີ່ສຸດ ຈາກຂໍ້ລິເລີ່ມປະຊາຄົມເສດຖະກິດ ອາຊຽນ ໃນປີ 2015. ທ່ານ Neeraj Swaroop, ຜູ້ອຳນວຍການບໍລິຫານທະນາຄານ Standard Chartered ພາກພື້ນ ອາຊີຕາເວັນອອກສ໋ຽງໃຕ້ ແບ່ງປັນວ່າ:
“ຂ້າພະເຈົ້າຖືວ່າ: ນີ້ແມ່ນຈຸດເວລາທີ່ດີໃຫ້ບັນດາວິສາຫະກິດ ຫວຽດນາມ ໝູນໃຊ້ໂອກາດເພື່ອເຊື່ອມໂຍງເຂົ້າກັບສາກົນ. ຍ້ອນວ່າ ປະຈຸບັນ, ຫວຽດນາມ ນັບມື້ນັບພົ້ນເດັ່ນກ່ວາ, ແມ່ນຄູ່ຮ່ວມມືການຄ້າສຳຄັນດ້ວຍຕະຫຼາດກ້ວາງໃຫຍ່, ຕະຫຼາດຜະລິດດ້ວຍຄວາມສາມາດແກ້ງແຍ້ງສູງ, ພິເສດແມ່ນໃນຊຸມປີມໍ່ໆມານີ້. ແຕ່ເຖິງຢ່າງໃດກໍ່ຕາມ, ເພື່ອນຳໃຊ້ກາລະໂອກາດໃຫ້ດີທີ່ສຸດ, ພິເສດແມ່ນເມື່ອ ອາຊຽນ ກາຍເປັນປະຊາຄົມເສດຖະກິດ ໃນປີ 2015, ຫວຽດນາມ ຄວນປັບປຸງດ້ານຄົມມະນາຄົມ, ພື້ນຖານໂຄງລ່າງກ່ວາອີກ, ເພື່ອແນໃສ່ສ້າງເງື່ອນໄຂສະດວກກ່ວາອີກໃຫ້ແກ່ການຂົນສົ່ງສິນຄ້າຈາກ ຫວຽດນາມ ໄປຍັງບັນດາປະເທດໃນພາກພື້ນ ແລະ ກົງກັນຂ້າມ.”
ການພົວພັນແລກປ່ຽນການຄ້າຂອງ ຫວຽດນາມ ກັບ ອາຊຽນ ໄດ້ຮັບການເຕີບໂຕຢ່າງແຮງ ໃນ 3 ປີມານີ້. ໃນປີ 2012, ຍອດວົງເງິນສົ່ງອອກຂອງ ຫວຽດນາມໄດ້ບັນລຸລະດັບເຕີບໂຕ 20%, ລື່ນກາຍບັນດາປະເທດອື່ນໆໃນພາກພື້ນ ອາຊີຕາເວັນອອກສ່ຽງໃຕ້, ປະຈຸບັນ ອາຊຽນ ພວມແມ່ນ 1 ໃນ 3 ຄູ່ຮ່ວມມືການຄ້າສຳຄັນທີ່ສຸດຂອງ ຫວຽດນາມ.