ພິທີຕ້ອນຮັບຮອງປະທານປະເທດລາວ ບຸນຍັງວໍລະຈິດ
ມາຢ້ຽມຢາມຫວຽດນາມ ຢ່າງເປັນທາງການ
( ພາບ: vietnamplus.vn )
(vovworld) - ໂດຍຮັບຄຳເຊື້ອເຊີນຂອງທ່ານນາງຮອງປະທານປະເທດຫວຽດນາມ Nguyen Thi Doan , ກຳມະການກົມການເມືອງ, ຮອງປະທານປະເທດ ສປປລາວ ບຸນຍັງວໍລະຈິດ ເລີ່ມຕົ້ນການຢ້ຽມຢາມຫວຽດນາມ ຢ່າງເປັນທາງການແຕ່ວັນທີ 17-20/7. ຕອນບາຍວັນທີ 17/7, ພາຍຫຼັງພິທີຕ້ອນຮັບ, ທ່ານນາງຮອງປະທານປະເທດຫວຽດນາມ Nguyen Thi Doan ໄດ້ມີການເຈລະຈາກັບທ່ານ ຮອງປະທານປະເທດ ສປປ ລາວ ບຸນຍັງ ວໍລະຈິດ. ທັງສອງຝ່າຍຢັ້ງຢືນຍາມໃດກໍ່ຖືເປັນສຳຄັນການປັບປຸງ ແລະ ເພີ່ມທະວີການພັວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານຫວຽດນາມ - ລາວ, ຖືວ່ານີ້ແມ່ນຊັບສົມບັດອັນລ້ຳຄ່າທີ່ຄວນໄດ້ຮັບການຮັກສາໄວ້ ແລະ ສືບທອດໃຫ້ລຸ້ນຕໍ່ໆໄປ. ສອງຝ່າຍຢັ້ງຢືນຄວນສືບຕໍ່ຮັກສາ ແລະ ເພີ່ມທະວີການຢ້ຽມຢາມ ແລະ ພົບປະຂັ້ນສູງລະຫວ່າງສອງປະເທດ, ຊຸກຍູ້ການແລກປ່ຽນການຢ້ຽມຢາມກໍ່ຄືການຮ່ວມມືຢູ່ໃນ 3 ຂັ້ນ ລັດ, ທ້ອງຖີ່ນ, ແລະ ລະຫວ່າງວິສາຫະກິດຂອງສອງປະເທດ, ຜັນຂະຫຍາຍການເຜີຍແຜ່, ໂຄສະນາປະຫວັດສາດແຫ່ງສາຍພົວພັນແບບພິເສດຫວຽດນາມ - ລາວ ໄລຍະ 1930-2007 ແລະ ສົມທົບກັນຈັດຕັ້ງການເຄື່ອນໄຫວຕ່າງໆ ເພື່ອສະເຫຼີມສະຫຼອງປີ ແຫ່ງຄວາມສາມັກຄີມິດຕະພາບ ຫວຽດນາມ - ລາວ 2012 ສຳເລັດຜົນ. ທັງສອງຝ່າຍຕີລາຄາສູງການຮ່ວມມືຢ່າງແໜ້ນແຟ້ນ ແລະ ນັບມື້ນັບມີປະສິດທິຜົນລະຫວ່າງບັນດາກະຊວງ, ຂະແໜງການ ແລະ ທ້ອງຖີ່ນຕ່າງໆຂອງສອງປະເທດໃນທຸກຂົງເຂດ. ສອງຝ່າຍເຫັນດີຕັ້ງໜ້າສະໜັບສະໜູນລັດຖະບານສອງປະເທດສ້າງເງື່ອນໄຂສະດວກ ເພື່ອຊຸກຍູ້ຄວາມກ້າວໜ້າ, ຄຸນນະພາບ ແລະ ປະສິດທິຜົນທີ່ມີຕໍ່ບັນດາໂຄງການຮ່ວມມືດ້ານການຄ້າ, ການລົງທຶນ, ຄົມະນາຄົມຂົນສົ່ງ, ກະສີກຳ, ຊົນລະປະທານ, ຂຸດຄົ້ນແຮ່ທາດ… ທີ່ການເຈລະຈາ, ທ່ານນາງຮອງປະທານປະເທດຫວຽດນາມ Nguyen Thi Doan ສະເໜີໃນໄລຍະຈະມາເຖິງສອງຝ່າຍຄວນຊຸກຍູ້ການຮ່ວມມືຄົ້ນຄ້ວາວິທະຍາສາດ, ຍົກສູງຄຸນນະພາບການບຳລຸງສ້າງ, ປະກອບສ່ວນເຂົ້າໃນການພັດທະນາແຫຼ່ງຊັບພະ ຍາກອນມະນຸດຂອງແຕ່ລະປະເທດກໍ່ຄືກິດຈະການພັດທະນາເສດຖະກິດສັງຄົມຂອງແຕ່ລະປະເທດ. ທັງສອງຝ່າຍກໍ່ໄດ້ແລກປ່ຽນຄວາມເຫັນຢ່າງເລິກເຊິ່ງ ແລະ ກວ້າງຂວງກ່ຽວກັບບາງບັນຫາສາກົນ ແລະ ພາກພື້ນທີ່ພົ້ນເດັ່ນໃນໄລຍະຜ່ານມາ, ສະແດງຄວາມພາກພູມໃຈຕໍ່ການຮ່ວມມືຊ່ວຍເຫຼືອກັນໃນການເຄື່ອນໄຫວພົວພັນກັບຕ່າງປະເທດ, ການຮ່ວມມືຢ່າງແໜ້ນແຟ້ນຢູ່ບັນດາເວທີປາໄສສາກົນ ແລະ ພາກພື້ນ.