(ໂຄສົກກະຊວງການຕ່າງປະເທດ ຫວຽດນາມ ເລຫາຍບີງ)
(vovworld) – ທີ່ການປະຊຸມຂ່າວນັດສາມັນຂອງກະຊວງການຕ່າງປະເທດ ທີ່ດຳເນີນໃນຕອນບ່າຍວັນທີ 02/06 ຢູ່ຮ່າໂນ້ຍ, ເມື່ອຕອບຄຳຖາມຂອງນັກຂ່າວກ່ຽວກັບທັດສະນະຂອງ ຫວຽດນາມ ທີ່ກ່ຽວຂ້ອງເຖິງເລື່ອງຕັດສິນຂອງສານກຳມະການສາກົນໃນການຟ້ອງຮ້ອງຂອງ ຟີລີບປິນ ສຳລັບ “ເສັ້ນລີ້ນງົວ” ເຊິ່ງ ຈີນ ຍົກອອກມາພຽງລຳພັງຝ່າຍດຽວຢູ່ທະເລຕາເວັນອອກນັ້ນ. ໂຄສົກກະຊວງການຕ່າງປະເທດ ຫວຽດນາມ ເລຫາຍບີງ ເນັ້ນໜັກວ່າ:
“ໂດຍແມ່ນປະເທດທີ່ກ່ຽວຂ້ອງໂດຍກົງເຖິງການຂັດແຍ້ງກັນຢູ່ທະເລຕາເວັນອອກ, ຫຼັກໝັ້ນສະເໝີຕົ້ນສະເໝີປາຍຂອງ ຫວຽດນາມ ແມ່ນສະໜັບສະໜູນການແກ້ໄຂການຂັດແຍ້ງກັນຢູ່ທະເລຕາເວັນອອກໂດຍມາດຕະການສັນຕິພາບ, ເໝາະສົມກັບກົດໝາຍສາກົນ ໃນນັ້ນ ມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982. ພວກຂ້າພະເຈົ້າ ປາດຖະໜາວ່າ ສານກຳມະການຈະຍົກອອກຄຳຕັດສິນຢ່າງມີຄວາມຍຸດຕິທຳ ແລະ ພາວະວິໄສເໝາະສົມກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 ແລະ ຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງຈົ່ງເຄົາລົບກົດໝາຍສາກົນ ເຊິ່ງໄດ້ກຳນົດໃນສົນທິສັນຍາສຳຄັນນີ້”
ໂຄສົກ ເລຫາຍບີງ ໃຫ້ຮູ້ວ່າ: ຫວຽດນາມ ກໍ່ຊົມເຊີຍຖະແຫຼງການຂອງກອງປະຊຸມສຸດຍອດບັນດາປະເທດອຸດສາຫະກຳພັດທະນາ ຈີ7 ກ່ຽວກັບບັນດາຄຳໝັ້ນສັນຍາຮັບປະກັນຄວາມສະຫງົບປອດໄພ ແລະ ຄວາມເສລີໃນການເດີນທະເລ, ການບິນ, ຄວາມປອດໄພບົນທະເລ ແລະ ເຄົາລົບກົດໝາຍສາກົນ, ຫວຽດນາມ ສະເໜີບັນດາຝ່າຍ ສືບຕໍ່ມີບັນດາການປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ, ເຄົາລົບກົດໝາຍສາກົນຢູ່ບັນດາເຂດທະເລ ແລະ ມະຫາສະໝຸດ.