ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວະ ແລະ ທ່ານ Daniel Caspary, ປະທານ EP (ພາບ:Doãn Tấn/TTXVN)

ຫວຽດນາມ ປາດຖະໜາຢາກຊຸກຍູ້ການພົວພັນກັບ EU - ນີ້ແມ່ນການຢັ້ງຢືນຂອງທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວະ ທີ່ການຕ້ອນຮັບຄະນະສະມາຊິກສະພາແຫ່ງຊາດ ຮັບຜິດຊອບການພົວພັນກັບບັນດາປະເທດ ອາຊີຕາເວັນອອກສ່ຽງໃຕ້ ແລະ ອາຊຽນ (ສະມາຄົມປະຊາຊາດ ອາຊີຕາເວັນອອກສ່ຽງໃຕ້) ຂອງ ລັດຖະສະພາ ເອີລົບ (EP), ໂດຍທ່ານ Daniel Caspary, ປະທານກຸ່ມເປັນຫົວໜ້າຄະນະ, ໃນຕອນບ່າຍວັນທີ 19 ມິຖຸນາ, ຢູ່ຫໍສະພາແຫ່ງຊາດ ຫວຽດນາມ.

        ທີ່ການຕ້ອນຮັບ, ທ່ານປະທານສະພາແຫ່ງຊາດ ຫວຽດນາມ ໄດ້ສະແດງຄວາມຂອບອົກຂອບໃຈ ສະຫະພາບເອີລົບ (EU) ທີ່ໄດ້ສະໜັບສະໜູນ ແລະ ໃຫ້ສັດຕະຍາບັນສັນຍາການຄ້າເສລີ EU - ຫວຽດນາມ (EVFTA), ປາດຖະໜາວ່າບັນດາສະມາຊິກລັດຖະສະພາຈະປະກອບສຽງເວົ້າ ເພື່ອແນໃສ່ຊຸກຍູ້ລັດຖະສະພາຂອງບັນດາປະເທດ EU ທີ່ຍັງເຫຼືອໃຫ້ສັດຕະຍາບັນສັນຍາອາລັກຂາການລົງທຶນ (EVIPA) ໂດຍໄວ. ທ່ານປະທານສະພາແຫ່ງຊາດ ເວືອງດິ່ງເຫວະ ສະເໜີໃຫ້ສອງຝ່າຍເພີ່ມທະວີການແລກປ່ຽນຄະນະ ເພື່ອແບ່ງປັນບົດຮຽນ ແລະ ຊຸກຍູ້ການຮ່ວມມືໃນບັນດາຂົງເຂດ; ສົມທົບຢ່າງແໜ້ນແຟ້ນ ຢູ່ບັນດາເວທີປາໄສລັດຖະສະພາຫຼາຍຝ່າຍ ແລະ ພາກພື້ນສຳຄັນ; ເພີ່ມທະວີການຮ່ວມມືໃນຂົງເຂດອະນຸພາກພື້ນແມ່ນ້ຳຂອງ; ໜູນຊ່ວຍ ຫວຽດນາມ ສຳຜັດແຫຼ່ງການເງິນ, ເຕັກໂລໂລຊີ,  ກົດໝາຍ, ຊັບພະຍາກອນມະນຸດ; ພັດທະນາເສດຖະກິດສີຂຽວ, ຫັນເປັນດີຈີຕອນ… ທ່ານປະທານສະພາແຫ່ງຊາດ ຫວຽດນາມ ກໍ່ສະເໜີໃຫ້ EU ປະກອບສຽງເວົ້າ ແລະ ມີການກະທຳລະອຽດ ເພື່ອແນໃສ່ຮັບປະກັນລັກສະນະເຄົາລົບກົດໝາຍ, ຄວາມເສລີໃນການເດີນເຮືອ, ການບິນ ຢູ່ທະເລຕາເວັນອອກ; ຍູ້ແຮງການຮ່ວມມືກັບ ອາຊຽນ ໃນບັນຫານີ້.

        ສ່ວນທ່ານ Daniel Caspary ເນັ້ນໜັກວ່າ: ການຮ່ວມມືລັດຖະສະພາ ໄດ້ສວມບົດບາດສຳຄັນເຂົ້າໃນການພົວພັນຮ່ວມມືສັງລວມລະຫວ່າງ EU ແລະ ຫວຽດນາມ; ໂດຍໃຫ້ຮູ້ວ່າ EU ພວມພະຍາຍາມ ເພື່ອໃຫ້ລັດຖະສະພາບັນດາປະເທດທີ່ຍັງເຫຼືອໃນກຸ່ມ ສືບຕໍ່ໃຫ້ສັດຕະຍາບັນສັນຍາອາລັກຂາການລົງທຶນ ຫວຽດນາມ - EU (EVIPA). ທ່ານ Daniel Caspary ປາດຖະໜາວ່າ ຂໍ້ລິເລີ່ມ “ປະຕູຂອງທົ່ວໂລກ” (Global Gateway) ຂອງ EU ຈະປະກອບສ່ວນເຊື່ອມຕໍ່ EU ແລະ ອາຊຽນ, ກໍ່ຄືປະຊາຊົນໃນ 2 ກຸ່ມນີ້ຢ່າງແຮງ.