ຂໍ້ຕົກລົງດັ່ງກ່າວ ໄດ້ເປີດກາລະໂອກາດເພື່ອໃຫ້ຫວຽດນາມ ໄດ້ແຊກຊຶມຕະຫຼາດຂອງ 28 ປະເທດສະມາຊິກ ສະຫະພາບເອີຣົບ ຢ່າງເລິກເຊິ່ງກວ່າ ກາຍເປັນສະຖານທີ່ດຶງດູດການລົງທຶນຢ່າງແຮງຂອງກຸ່ມ ແລະ ແມ່ນສູນສົ່ງຕໍ່, ເຊື່ອມຕໍ່ບັນດາການເຄື່ອນໄຫວດ້ານການຄ້າ - ການລົງທຶນຂອງ ສະຫະພາບເອີຣົບ ຢູ່ ພາກພື້ນ ອາຊຽນ.

        ທ່ານນາງ Cecilia Malmstrom ຂ້າຫຼວງໃຫຍ່ການຄ້າໄດ້ຍ້ອງຍໍຊົມເຊີຍຄວາມສາມາດບົ່ມຊ້ອນຂອງຫວຽດນາມ, ໂດຍໃຫ້ຂໍ້ສັງເກດວ່າ ຫວຽດນາມ ແມ່ນຕະຫຼາດທີ່ຟົດຟື້ນ ແລະ ຕະຫຼາດຂອງຫວຽດນາມ ກໍ່ນັບມື້ນັບກາຍເປັນຈຸດນັດພົບສໍາລັບວິສາຫະກິດ ເອີຣົບ. ທ່ານນາງ Cecilia Malmstrom ກໍເນັ້ນໜັກວ່າ ນອກຈາກບັນດາຜົນປະໂຫຍດກ່ຽວກັບດ້ານເສດຖະກິດແລ້ວ, ຂໍ້ຕົກລົງສອງສະບັບດັ່ງກ່າວຍັງແນໃສ່ຈຸດປະສົງຊຸກຍູ້ການເຄົາລົບຕໍ່ບັນຫາສິດທິມະນຸດ, ປົກປັກຮັກສາສິ່ງແວດລ້ອມ ກໍຄືສິດຜົນປະໂຫຍດຂອງຜູ້ອອກແຮງງານອີກດ້ວຍ.

        ຕາມການຕີລາຄາຂອງນັກຊ່ຽວຊານ ສັງກັດສູນກາງ WTO ແລະ ການເຊື່ອມໂຍງ, ຂຶ້ນກັບຫ້ອງການການຄ້າ ແລະ ອຸດສາຫະກໍາ ຫວຽດນາມແລ້ວ ສໍາລັບ EVFTA, ຫວຽດນາມ ໃຫ້ຄໍາໝັ້້ນສັນຍາເປີດປະຕູໃຫ້ສະຫະພາບເອີຣົບໃນຫຼາຍຂົງເຂດກວ່າອີກ ເມື່ອທຽບໃສ່ WTO ລວມມີບາງບໍລິການດໍາເນີນທຸລະກິດ, ເບິ່ງແຍງສຸຂະພາບ, ສິ່ງແວດລ້ອມ, ການສຶກສາ, ການແຈກຢາຍ ແລະ ການເງິນ. ເມື່ອສັນຍາ EVFTA ໄດ້ຮັບການລົງນາມ ແລະ ມີຜົນສັກສິດນັ້ນ ຈະຊຸກຍູ້ການຄ້າລະຫວ່າງຫວຽດນາມ ແລະ ສະຫະພາບເອີຣົບຫຼາຍພໍສົມຄວນ ເຊິ່ງເປັນສອງຕະຫຼາດທີ່ມີໂຄງປະກອບຜະລິດຕະພັນເຕີ່ມເຕັມໜູນຊ່ວຍເຊິ່ງກັນແລະກັນ.