(ພາບປະກອບ)
(vovworld) - ຕອນເຊົ້າວັນທີ 20/03, ຢູ່ຮ່າໂນ້ຍ, ຄະນະກຳມະການແນວໂຮມປະເທດຊາດຫວຽດນາມ ໄດ້ຈັດກອງປະຊຸມຮັບເອົາຄຳຄິດຄຳເຫັນຂອງນັກຮຽນຮູ້, ນັກປັນຍາຊົນ, ນັກກົດໝາຍ, ຜູ້ທີ່ດີເດັ່ນໃນບັນດາເຜົ່າສ່ວນນ້ອຍ, ຜູ້ມີຍົດຖາບັນດາສັກທາງສາສະໜາ ທີ່ປະກອບຄຳຄິດຄຳເຫັນໃສ່ຮ່າງລັດຖະທຳມະນູນປີ 1992 ສະບັບປັງປຸງ. ບັນດາຜູ້ແທນລ້ວນແຕ່ຖືວ່າ ຮ່າງລັດຖະທຳມະນູນປີ 1992 ສະບັບປັງປຸງ ສືບຕໍ່ຢືນຢັນ ແລະ ສະແດງໃຫ້ເຫັນແຈ້ງແນວຄິດເສີມຂະຫຍາຍກຳລັງແຮງມະຫາສາມັກຄີທົ່ວປວງຊົນທັງຊາດ, ຖືມະຫາສາມັກຄີທົ່ວປວງຊົນທັງຊາດແມ່ນກຳລັງຊຸກຍູ້, ແມ່ນແຫຼ່ງກຳລັງແຮງທີ່ໃຫຍ່ຫຼວງເພື່ອສ້າງສາ, ປົກປັກຮັກສາ ແລະ ພັດທະນາປະເທດຊາດ. ແຕ່ລັດຖະທຳມະນູນຕ້ອງກຳນົດຢ່າງຈະແຈ້ງ ແລະ ກຳນົດທີ່ຕັ້ງຍຸດທະສາດຂອງບັນດາເຜົ່າ ແລະ ສາມັກຄີບັນດາເຜົ່າ; ສິດ ແລະ ພັນທະສະເໝີພາບຂອງບັນດາເຜົ່າ; ບັນດາຫຼັກການ, ນະໂຍບາຍແກ້ໄຂບັນຫາຊົນເຜົ່າ; ໜ້າທີ່ຮັບປະກັນຂອງລັດ, ເສີມຂະຫຍາຍກຳລັງແຮງພາຍໃນຂອງບັນດາເຜົ່າ... ກ່ຽວກັບບັນຫາເຫຼື້ມໃສສາສະໜາ ໄດ້ມີຂໍ້ກຳນົດຢ່າງລະອຽດໃນມາດຕາ 25 ຂອງຮ່າງລັດຖະທຳມະນູນ. ແຕ່ພະມະຫາອາຈານ ທິກຢາກວາງ, ຮອງປະທານສະພາບໍລິຫານງານ, ສູນກາງສະມາຄົມພຸດທະສາສະໜາຫວຽດນາມ ໄດ້ຖືວ່າ.
“ມາດຕາ 25 ຕ້ອງໄດ້ເພີ່ມເຕີມຕື່ມອີກມາດຕາໜຶ່ງທີ່ວ່າ; ລັດສ້າງເງື່ອນໄຂສະດວກເພື່ອໃຫ້ບັນດາອົງການສາສະໜາເຄື່ອນໄຫວຖືກຕາມກົດໝາຍ, ທຳນຽມ, ຂໍ້ກຳນົດຂອງບັນດາສາສະໜາທີ່ໄດ້ຮັບການຮັບຮູ້ຈາກລັດ. ບັນຫານີ້, ລັດຍັງຮັບປະກັນ, ສ້າງເງື່ອນໄຂສະດວກເພື່ອໃຫ້ບັນດາອົງການສາສະໜາເຄື່ອນໄຫວຖືກຕາມກົດໝາຍ. ນັ້ນແມ່ນບັນດາຂໍ້ກຳນົດທີ່ມີຢູ່ແລ້ວ, ແຕ່ປະຈຸບັນຕ້ອງນຳເຂົ້າລັດຖະທຳມະນູນແມ່ນດີທີ່ສຸດ ເພື່ອໃຫ້ປະຊາຊົນ ແລະ ໂລກຊາບວ່າ ພວກເຮົາພວມເອົາໃຈໃສ່ ແລະ ຮັບປະກັນຊີວິດສາສະໜາໃຫ້ແກ່ຜູ້ທີ່ເຊື່ອຖືສາສະໜາ”.