ບັນດານັກຮຽນຮູ້ປຶກສາຫາລືທີ່ກອງປະຊຸມສຳມະນາ

ວັນທີ 9 ພະຈິກ, ທີ່ນະຄອນດ່າໜັງຂອງຫວຽດນາມ, ກອງປະຊຸມສໍາມະນາສາກົນຄັ້ງທີ 10 ກ່ຽວກັບທະເລຕາເວັນອອກ ພາຍໃຕ້ຫົວຂໍ້ວ່າ “ທະເລຕາເວັນອອກ: ຮ່ວມມືເພື່ອຄວາມໝັ້ນຄົງ ແລະ ພັດທະນາພາກພື້ນ” ໂດຍສະຖາບັນການຕ່າງປະເທດ, ກອງທຶນໜູນຊ່ວຍຄົ້ນຄວ້າກ່ຽວກັບທະເລຕາເວັນອອກ ແລະ ສະມາຄົມທະນາຍຄວາມຫວຽດນາມ ຈັດຕັ້ງ ໄດ້ສິ້ນສຸດລົງ. ພາຍຫຼັງການເຮັດວຽກມາເປັນເວລາ 2 ວັນ,  ດ້ວຍ 36 ບົດປະກອບຄຳເຫັນນຳມາສະເໜີ ພ້ອມກັບ ການປຶຶກສາຫາລື, ແລກປ່ຽນຢ່າງຟົດຟື້ນກວ່າ 200 ຂໍ້ຄຳເຫັນ. ນັກຮຽນຮູ້ຫຼາຍຄົນຖືວ່າ ເລື່ອງບັນດາປະເທດເພີ່ມທະວີການສ້າງກໍາລັງ ແລະ ຫັນເຄື່ອນໄຫວຢູ່ທະເລຕາເວັນອອກເປັນການທະຫານ ແມ່ນຄວາມສ່ຽງຂາດສະຖຽນລະພາບຫຼາຍທີ່ສຸດໃນປັດຈຸບັນ. ເມື່ອປຶກສາຫາລືກ່ຽວກັບມາດຕະການສ້າງຄວາມໄວ້ເນື້ອເຊື່ອໃຈ, ຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກໃນໄລຍະຈະມາເຖິງ, ນັກຮຽນຮູ້ຫຼາຍຄົນຖືວ່າ,ບັນດາຝ່າຍທີ່ຂັດແຍ່ງກັນ ຄວນພິຈາລະນາຄືນຄໍາຮຽກກຳມະສິດຂອງຕົນ, ລົບລ້າງບັນດາຄໍາຮຽກກຳມະສິດທີ່ເກີນຂອບເຂດ, ບໍ່ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາ ສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ ປີ 1982. ຈາກນັ້ນ, ຮັດແຄບການຂັດແຍ້ງກັນ, ກ້າວໄປເຖິງການແກ້ໄຂການຂັດແຍ້ງກັນ ໂດຍສັນຕິວິທີເທື່ອລະກ້າວ.