ຕອນຄ່ຳວັນທີ 17 ພະຈິກ, ຊາວກະສິກອນ ຝະລັ່ງ ໄດ້ຂັບລົດລາກແຫ່ເດີນຊ້ານັບຮ້ອຍຄັນ ເພື່ອອັດທາງສາຍຕ່າງໆທາງທິດຕາເວັນຕົກສ່ຽງໃຕ້, ຊື່ງແມ່ນເສັ້ນທາງເຂົ້ານະຄອນຫຼວງ ປາຣີ. ສະຫະພັນຊາວກະສິກອນແຫ່ງຊາດ ຝະລັ່ງ (FNSEA) ໃຫ້ຮູ້ວ່າ ການເດີນຂະບວນນີ້ ແມ່ນເພື່ອແນໃສ່ຮຽກຮ້ອງໃຫ້ທ່ານປະທານາທິບໍດີ ຝະລັ່ງ Emmanuel Macron, ຄັດຄ້ານການເຊັນສັນຍາການຄ້າເສລີ (FTA ລະຫວ່າງ ອີຢູ ແລະ ກຸ່ມຕະຫຼາດລວມອາເມລິກາໃຕ້ (Mercosur).  ປະຈຸບັນ, ຜູ້ນຳໜ້າປະເທດ ຝະລັ່ງ ພວມໄປປະຕິບັດງານແຕ່ວັນທີ 16-21 ພະຈິກຢູ່ສາມປະເທດ ອາເມລິກາໃຕ້ ຄື: ອັກຊັງຕິນ, ບຣາຊິນ ແລະ ຈີເລ.

  ໃນຂະນະນັ້ນ, ທ່ານນາຍົກລັດຖະມົນຕີ ຝະລັ່ງ Michel Barnier ແລະ ເຈົ້າໜ້າທີ່ລັດຖະບານຫຼາຍທ່ານ ໄດ້ເນັ້ນໜັກທັດສະນະຂອງ ຝະລັ່ງ ແມ່ນຄັດຄ້ານເລື່ອງໃຫ້ສັດຕະຍາບັນສັນຍາການຄ້າເສລີ ໂດຍ ອີຢູ ແລະ ບັນດາປະເທດອາເມລິກາໃຕ້ ເປັນເອກະພາບນັບແຕ່ປີ 2019 ແລະ ຢັ້ງຢືນວ່າ ຝະລັ່ງ ຈະແມ່ນປະເທດທີ່ຖືກຜົນສະທ້ອນຫຼາຍກ່ວາໝູ່ ແລະ ກ່າວເຕືອນເຖິງຄວາມສ່ຽງທີ່ຜະລິດຕະພັນກະເສດລາຄາຖືກຈາກອາເມລິກາໃຕ້ ຈະເຂົ້າເຕັ່ມຕະຫຼາດ ເອີລົບ.