(vovworld)- ວັນທີ 9/5, ສະຫະພາບເອີລົບ (EU) ໄດ້ສະແດງຄວາມວິຕົກກັງວົນ ແລະ ຈະຕິດຕາມຢ່າງໃກ້ຊິດສະພາບການຢູ່ທະເລຕາເວັນອອກ. ເມື່ອຕອບສຳພາດຕໍ່ນັກຂ່າວວິທະຍຸກະຈາຍສຽງຫວຽດນາມ, ທ່ານ Sebastien Brabant, ຮອງໂຄສົກຂອງ ຂ້າຫລວງໃຫຍ່ ຮັບຜິດຊອບນະໂຍບາຍປ້ອງກັນຄວາມສະຫງົບ ແລະ ການຕ່າງປະເທດ ສະຫະພາບເອີລົບຢືນຢັນວ່າ: EU ມີຄວາມວິຕົກກັງວົນກ່ຽວກັບບັນດາເຫດການທີ່ກ່ຽວຂ້ອງເຖິງຝ່າຍຈີນ ແລະ ຫວຽດນາມ ກ່ຽວກັບການເຄື່ອນໄຫວຂອງຮ້ານເຈາະນ້ຳມັນຂອງຈີນ.
“ພວກຂ້າພະເຈົ້າຮຽກຮ້ອງໃຫ້ບັນດາຝ່າຍກ່ຽວຂ້ອງ ຈົ່ງຊອກຫາມາດຕະການສັນຕິ ແລະ ການຮ່ວມມືສອດຄອ່ງກັບກົດໝາຍສາກົນ, ພິເສດ ແມ່ນສອດຄອ່ງກັບສົນທິສັນຍາ ສປຊ ກ່ຽວກັບກົດໝາຍທະເລ ກໍຄືຮຽກຮ້ອງໃຫ້ບັນດາຝ່າຍສືບຕໍ່ຮັບປະກັນຄວາມປອດໄພໃຫ້ແກ່ກຳປັ່ນໄປມາຢ່າງເສລີ. ພວກຂ້າພະເຈົ້າຮຽກຮ້ອງໃຫ້ບັນດາຝ່າຍກ່ຽວຂ້ອງ ປະຕິບັດບັນດາມາດຕະການຫລຸດຜ່ອນຄວາມເຄັ່ງຕຶງ ແລະ ບໍ່ໃຫ້ເກີດການກະທຳຕາມລຳພັງຝ່າຍດຽວທີ່ອາດຈະນາບຂູ່ເຖິງສັນຕິພາບ ແລະ ສະຖຽນລະພາບໃນພາກພື້ນ.”
ທີ່ກອງປະຊຸມເຈົ້າຫນ້າທີ່ຂັ້ນສູງ ອາຊຽນ ກະກຽມໃຫ້ກອງປະຊຸມສຸດຍອດ ອາຊຽນ ຄັ້ງທີ 24 ແລະ ບັນດາກອງປະຊຸມກ່ຽວຂ້ອງ ດຳເນີນໄປໃນວັນທີ 9/5,ບັນດາປະເທດ ອາຊຽນ ລ້ວນແຕ່ສະແດງຄວາມວິຕົກກັງວົນຢ່າງເລິກເຊິ່ງ ຕໍ່ຫນ້າສະພາບການສັນສົນປະຈຸບັນ, ສົ່ງຜົນສະທ້ອນເຖິງສັນຕິພາບ ແລະ ຄວາມໝັ້ນຄົງ, ຄວາມປອດໄພການເດີນທະເລຢູ່ພາກພື້ນ.
ບົດນຳໃນຫນ້າເວັບ Asahi Shimbun ຂອງຍີ່ປຸ່ນຄັດຄ້ານຈີນ
ພາບ:xahoi.com.vn
|
ເມື່ອຕອບສຳພາດຕໍ່ນັກຂ່າວຫວຽດນາມ, ໂຄສົກຂອງເລຂາທິການໃຫຍ່ ສປຊ, ທ່ານ Farhan Haq ໄດ້ຢືນຢັນວ່າ: ທ່ານ ເລຂາທິການໃຫຍ່ ສປຊ Ban Ki moon ສະແດງຄວາມວິຕົກກັງວົນກ່ຽວກັບສະພາບການເຄັ່ງຕຶງເພີ່ມຂຶ້ນຢູ່ທະເລຕາເວັນອອກລະຫວ່າງ ຈີນ ແລະ ຫວຽດນາມໃນຊຸມມື້ຜ່ານມາ. ທ່ານ Ban Ki Moon ເລັ່ງລັດໃຫ້ບັນດາຝ່າຍກ່ຽວຂ້ອງ ຈົ່ງລະງັບໃຈ ແລະ ແກ້ໄຂການພິພາດໂດຍສັນຕິວິທີ, ຜ່ານການເຈລະຈາ ແລະ ສອດຄ່ອງກັບກົດໝາຍສາກົນ, ໃນນັ້ນ ມີ ກົດບັດ ສປຊ.
ໃນວັນດຽວກັນ, ກະຊວງການຕ່າງປະເທດ ອິນເດຍ ອອກຖະແຫລງການ ສະແດງຄວາມວິຕົກກັງວົນກ່ຽວກັບການຜັນແປ່ຢ່າງສັບສົນຢູ່ທະເລຕາເວັນອອກ.
ກຸ່ມສະມາຊິກສະພາສູງ ຂອງພັກສາທາລະນະ ແລະ ພັກ ປະຊາທິປະໄຕ ຂຶ້ນກັບກຳມາທິການການຕ່າງປະເທດ ສະພາສູງ ອາເມລິກາ ໄດ້ອອກຖະແຫລງການຮ່ວມ ຄັດຄ້ານເລື່ອງຈີນ ມີການກະທຳກໍ່ຄວາມເຄັ່ງຕຶງຢ່າງລຽນຕິດຢູ່ທະເລຕາເວັນອອກ.
ໃນຂະນະນັ້ນ, ວົງການນັກຮຽນຮູ້ສາກົນໄດ້ໃຫ້ຂໍ້ສັງເກດວ່າ: ການກະທຳຂອງຈີນແມ່ນໄປຝືນກັບກົດໝາຍສາກົນ ແລະ ມີຈຸດປະສົງດ້ານການເມືອງ. ທ່ານ Taylor Fravel, ສາດສະດາຈານ ການເມືອງວິທະຍາ ອາເມລິກາ, ຊື່ງແມ່ນຜູ້ຊ່ຽວຊານຄົ້ນຄ້ວາກ່ຽວກັບບັນດາບັນຫາຜືນແຜນດິນຂອງຈີນ ຖືວ່າ: ຖ້າພິຈາລະນາດ້ານເສດຖະກິດ, ບໍ່ມີຫລັກຖານພິສູດໃຫ້ເຫັນວ່າ ເຂດທີ່ຈີນນຳຮ້ານເຈາະນ້ຳມັນເຂົ້າເຄື່ອນໄຫວ ມີປະລິມານ hydrocarbon ໃຫຍ່ຫລວງ. ສ່ວນສາດສະດາ Kumao Kaneko, ຜູ້ອຳນວຍການສະຖາບັນຄົ້ນຄ້ວາຍຸດທະສາດ ພະລັງງານຂອງຍີ່ປຸ່ນ ຖືວ່າ: ເລື່ອງຈີນ ຮຽກຮ້ອງຕ້ອງການສິດຜົນປະໂຫຍດເກືອບທັງໝົດທະເລຕາເວັນອອກ ແລະ ນັບທັງທະເລ ຮວາຕຸງ ແມ່ນສິ່ງທີ່ຍາກຮັບຮູ້ໄດ້.