ນີ້ແມ່ນກອງປະຊຸມທຳອິດໃນປີເປັນປະທານອາຊຽນ 2020 ຂອງ ຫວຽດນາມ ດ້ວຍເປົ້າໝາຍສຳຫຼວດກວດຄືນບັນດາການເຄື່ອນໄຫວຮ່ວມມືໃນຂອບເຂດ EAS, ທ່ານເຈິ່ນດຶກບິ່ງ ເອກອັກຄະລັດຖະທູດ ຫົວໜ້າຄະນະຜູ້ຕາງໜ້າຫວຽດນາມ ປະຈຳອາຊຽນ ເປັນປະທານກອງປະຊຸມ. ທີ່ກອງປະຊຸມ, ທ່ານເຈິ່ນດຶກບິ່ງ ໄດ້ແບ່ງປັນກັບບັນດາປະເທດເຂົ້າຮ່ວມ EAS  ກ່ຽວກັບຄວາມໝາຍຂອງ ຫົວຂໍ້ “ອາຊຽນສະໜິດຕິດພັນ ແລະ ເປັນເຈົ້າການຮັບມື" ແລະ ບັນດາບຸລິມະສິດຂອງ ຫວຽດນາມ ໃນປີ ເປັນປະທານອາຊຽນ 2020 ເພື່ອແນໃສ່ຊຸກຍູ້ການສ້າງປະຊາຄົມອາຊຽນ, ຍູ້ແຮງການພົວພັນກັບບັນດາຄູ່ຮ່ວມມືເພື່ອສັນຕິພາບ ແລະ ພັດທະນາແບບຍືນຍົງ, ເສີມຂະຫຍາຍບົດບາດປະກອບສ່ວນຂອງ ອາຊຽນໃນປະຊາຄົມສາກົນ, ເປີດກ້ວາງແລະຍົກສູງການພົວພັນກັບຄູ່ຮ່ວມມື, ປະກອບສ່ວນເຂົ້າການປັບປຸງສັນຕິພາບ, ສະຖຽນລະພາບ, ຄວາມໝັ້ນຄົງ ແລະ ການພັດທະນາໃນພາກພື້ນ.

        ບັນດາປະເທດເຂົ້າຮ່ວມ EAS ໄດ້ຊົມເຊີຍຫົວຂໍ້ປີປະທານອາຊຽນຂອງ ຫວຽດນາມ ແລະ ຢັ້ງຢືນວ່າ ຈະສະໜັບສະໜູນບັນດາບຸລິມະສິດ ຂອງ ຫວຽດນາມ, ພ້ອມແລ້ວທີ່ຈະໜູນຊ່ວຍ ຫວຽດນາມ ແລະ ອາຊຽນໃນການຫັນບັນດາບຸລິມະສິດນີ້ໃຫ້ປະກົດຜົນເປັນຈິງ, ກໍ່ຄືບັນດາຂໍ້ລິ້ເລີ່ມ ແລະ ການເຄື່ອນໄຫວທີ່ຫວຽດນາມ ສະເໜີເນື່ອງໃນໂອກາດ ສະເຫຼີມສະຫຼອງ 15 ປີ ແຫ່ງວັນສ້າງຕັ້ງ EAS (2005 - 2020) ແລະ ກຳນົດທິດໃຫ້ແກ່ການພັດທະນາຂອງ EAS ໃນຊຸມທົດສະວັດຕໍ່ໄປບົນພື້ນຖານບັນດາຜົນງານທີ່ບັນລຸໄດ້ ໃນໄລຍະ 15 ປີຜ່ານມາ, ບັນດາຫຼັກການພື້ນຖານທີ່ໄດ້ຢັ້ງຢືນເຖິງຄຸນຄ່າ ແລະ ບົດບາດເປັນໃຈກາງຂອງ ອາຊຽນ, ສືບຕໍ່ປະກອບສ່ວນໃຫ້ແກ່ສັນຕິພາບ ຄວາມໝັ້ນຄົງ, ສະຖຽນລະພາບ ແລະ ການພັດທະນາໃນພາກພື້ນ.