(vovworld) – ວັນທີ 31/8, ຢູ່ຄ້າຍຄຸ້ມຂັງ ຫວີງກວາງ (ຕາແສງ ດ້າວຈູ່, ເມືອງ ຕາມດ໋າວ, ແຂວງ ຫວີງຟຸກ), ນັກໂທດກ່ວາ 290 ຄົນໄດ້ຮັບໃບຕົກລົງອະໄພຍະໂທດຈາກປະທານປະເທດເນື່ອງໃນໂອກາດວັນຊາດ 2/9. ພັນເອກ ເຈີ່ນຮູ່ງ, ກຳມະການຄ້າຍຄຸ້ມຂັງ ຫວີງກວາງ ໃຫ້ຮູ້ວ່າ: ວິວັດການພິຈາລະນາອະໄພຍະໂທດຄັ້ງນີ້ຖືກດຳເນີຍໄປຢ່າງປະຊາທິປະໄຕ, ເປີດເຜີຍ, ກະຈ່າງແຈ້ງ, ຖືກກັບຂໍ້ກຳນົດຂອງກົດໝາຍ ແລະ ໄດ້ຮັບຄວາມເຫັນດີເຫັນພ້ອມ, ສະໜັບສະໜູນຈາກນັກໂທດ.
ແລະກໍ່ໃນວັນດຽວກັນ, ຢູ່ແຂວງ ຮືງອຽນ, ໄດ້ດຳເນີນພິທີປະກາດຂໍ້ຕົກລົງອະໄພຍະໂທດປີ 2013 ຂອງປະທານປະເທດ, ປ່ອຍຕົວກ່ອນກຳນົດເວລາໃຫ້ນັກໂທດ 22 ຄົນຢູ່ຄ້າຍຄຸ້ມຂັງຊົ່ວຍາມຂອງຕຳຫຼວດແຂວງ. ເພື່ອສ້າງເງື່ອນໄຂໃຫ້ບັນດາຜູ້ໄດ້ຮັບອະໄພຍະໂທດ ເຊື່ອມຕົວເຂົ້າກັບວົງຄະນະຍາດໂດຍໄວ, ການນຳແຂວງ ຮືງອຽນ ໄດ້ຊີ້ນຳອຳນາດການປົກຄອງ, ອົງການຈັດຕັ້ງມະຫາຊົນທຸກຂັ້ນຈັດຕັ້ງການຕ້ອນຮັບ, ຊ່ວຍເຫຼືອບັນດາຜູ້ໄດ້ຮັບອະໄພຍະໂທດ, ປ່ອຍຕົວເມື່ອເຂົາເຈົ້າກັບຄືນທ້ອງຖີ່ນເຊື່ອມຕົວເຂົ້າກັບວົງຄະນະຍາດ, ມີວຽກເຮັດງານທຳເປັນປົກກະຕິ, ກາຍເປັນພົນລະເມືອງທີ່ດີ, ມີຜົນປະໂຫຍດໃຫ້ແກ່ສັງຄົມ ແລະ ບໍ່ລະເມີດກົດໝາຍອີກ.
ຂໍ້ຕົກລົງອະໄພຍະໂທດປີ 2013 ສະແດງໃຫ້ເຫັນນະໂຍບາຍອະນຸໂລມຂອງພັກ, ລັດ ແລະ ມູນເຊື້ອມະນຸດສະທຳຂອງຊາດ ຫວຽດນາມ, ສ້າງເງື່ອນໄຂໃຫ້ບັນດານັກໂທດມີຄວາມພະຍາຍາມໃນວິວັດການດັດສ້າງຕົນເອງ ແລະ ມີເງື່ອນໄຂໄດ້ຮັບອະໄພຍະໂທດຕາມຂໍ້ຕົກລົງຂອງກົດໝາຍຢ່າງຄົບຖ້ວຍ ໄດ້ກັບຄືນເຊື່ອມຕົວເຂົ້າກັບວົງຄະນະຍາດ, ສ້າງອະນາຄົດອັນດີງາມ.