![ທ່ານປະທານປະເທດເຈືອງເຕີນຊາງເຈລະຈາກັບປະທານາທິບໍດີອິນໂດເນເຊຍ Susilo Bambang - ảnh 1](https://image.vovworld.vn/w500/uploaded/vovworld/bcgmbuiq/2013_06_27/sang_copy.jpg)
ທ່ານປະທານປະເທດ ເຈືອງເຕີນຊາງ ແລະ ທ່ານ ປະທານາທິບໍດີ
ອິນໂດເນເຊຍ Susilo Bambang Yudhoyono
ພາບ:hanoimoi.com.vn
|
(vovworld)- ໂດຍໄດ້ຮັບຄຳເຊື້ອເຊີນຂອງທ່ານປະທານາທິບໍດີ ອິນໂດເນເຊຍ Susilo Bambang Yudhoyonoຕອນບ່າຍວັນທີ 27/6, ທ່ານປະທານປະເທດ ຫວຽດນາມ ເຈືອງເຕີນຊາງ ແລະ ພັນທະຍາ ພ້ອມກັບຄະນະຜູ້ແທນຂັ້ນສູງ ຫວຽດນາມ ໄດ້ເດີນທາງຮອດນະຄອນຫລວງ ຢາກາກຕາ ເລີ່ມຕົ້ນການຢ້ຽມຢາມທາງລັດຖະກິດ ອິນໂດເນເຊຍ ແຕ່ວັນທີ 27 ຫາ 28/6. ຕ້ອນຮັບທ່ານປະທານປະເທດເຈືອງເຕີນຊາງຢູ່ສະຫນາມບິນ ມີທ່ານລັດຖະມົນຕີການຕ່າງປະເທດ ອິນໂດເນເຊຍ Marty Natalegawa, ທ່ານ Civip Soetardjo ລັດຖະມົນຕີກະຊວງຮັບຜິດຊອບບັນຫາທະເລ ແລະ ອາຊີບຫາປາ, ເອກອັກຄະລັດຖະທູດຫວຽດນາມປະຈຳອິນໂດເນເຊຍ ທ່ານ ຫງວຽນຊວນຖຸຍ ພ້ອມດ້ວຍພະນັກງານສະຖານທູດ, ຜູ້ຕາງຫນ້າຊາວຫວຽດນາມ ແລະ ນັກສຶກສາຫວຽດນາມ ຢູ່ອິນໂດເນເຊຍ. ພິທີຕ້ອນຮັບດຳເນີນໄປຕາມພິທີການສູງສຸດສະຫງວນໃຫ້ແກ່ປະມຸກລັດ. ພາຍຫລັງພິທີຕ້ອນຮັບ, ທ່ານປະທານປະເທດຫວຽດນາມ ເຈືອງເຕີນຊາງ ແລະ ປະທານາທິບໍດີ ອິນໂດເນເຊຍ Susilo Bambang Yudhoyono ໄດ້ດຳເນີນການເຈລະຈາ. ນະທີ່ນີ້, ການນຳສອງທ່ານໄດ້ປະກາດຖະແຫລງການຍົກການພົວພັນລະຫວ່າງຫວຽດນາມ ແລະ ອິນໂດເນເຊຍ ກາຍເປັນຄູ່ຮ່ວມມືຍຸດທະສາດເພື່ອນຳການພົວພັນລະຫວ່າງສອງປະເທດຂຶ້ນສູ່ລະດັບສູງໃຫມ່. ການນຳສອງທ່ານເຫັນດີ ສືບຕໍ່ເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ໄວ້ເນື້ອເຊື່ອໃຈບົນພື້ນຖານແລກປ່ຽນຄະນະຜູ້ແທນ ແລະ ພົບປະຂັ້ນສູງກໍຄືທຸກຂັ້ນເປັນປະຈຳ; ສືບຕໍ່ຜັນຂະຫຍາຍບັນດາກົນໄກຮ່ວມມືທີ່ມີຢູ່ແລ້ວຢ່າງມີປະສິດທິຜົນ. ອິນໂດເນເຊຍ ເຫັນດີ ສ້າງຕັ້ງສະມາຄົມມິດຕະພາບ ອິນໂດເນເຊຍ - ຫວຽດນາມ ໂດຍໄວ. ການນຳສອງທ່ານເຫັນດີ ສູ້ຊົນນຳວົງເງິນການຄ້າສອງສົ້ນລື່ນກາຍ 5 ຕື້ USD ກ່ອນປີ 2015 ແລະ ບັນລຸ 10 ຕື້ USD ໃນປີ 2018. ການນຳສອງທ່ານເຫັນດີຍູ້ແຮງການຮ່ວມມືໃນບັນຫາຄ້ຳປະກັນສະບຽງອາຫານ, ຜັນຂະຫຍາຍບັນດາໂຄງການຮ່ວມມືນ້ຳມັນອາຍແກສ, ຊື້ຂາຍຖ່ານຫີນ ແລະ ຂຸດຄົ້ນແຮ່ທາດ, ເພີ່ມທະວີການຜັນຂະຫຍາຍບົດບັນທຶກຊ່ວຍຈຳການຮ່ວມມືອາຊີບຫາປາ ແລະ ບັນຫາທະເລ. ການນຳສອງທ່ານເຫັນດີຊຸກຍູ້ການເຈລະຈາ, ເຊັນຂໍ້ກຳນົດກ່ຽວກັບການລາດຕະເວນລະຫວ່າງກອງທັບເຮືອສອງປະເທດໂດຍໄວ ພ້ອມທັງຄົ້ນຄ້ວາສ້າງຕັ້ງກົນໄກພົບປະສົນທະນານະໂຍບາຍກ່ຽວກັບການປ້ອງກັນຊາດປ້ອງກັນຄວາມສະຫງົບໃຫ້ເໝາະສົມ. ສອງຝ່າຍກໍຢືນຢັນຄວາມສຳຄັນຂອງການເພີ່ມທະວີການຮ່ວມມືໃນຂົງເຂດອຸດສາຫະກຳປ້ອງກັນຊາດ, ຕ້ານການກໍ່ການຮ້າຍ, ຮັບມືກັບສິ່ງທ້າທາຍອາດຊະຍາກຳຂ້າມຊາດ.
ເມື່ອແລກປ່ຽນບັນດາບັນຫາສາກົນ ແລະ ພາກພື້ນ, ທ່ານປະທານປະເທດເຈືອງເຕີນຊາງ ແລະ ປະທານາທິບໍດີອິນໂດເນເຊຍ Susilo Bambang Yudhoyono ຢືນຢັນວ່າ ສອງປະເທດຈະສືບຕໍ່ເພີ່ມທະວີການທາບທາມຄຳເຫັນ ແລະ ສົມທົບຫລັກໝັ້ນອັນແໜ້ນແຟ້ນທີ່ບັນດາເວທີປາໄສສາກົນ ແລະ ພາກພື້ນ, ພິເສດແມ່ນໃນອາຊຽນ ແລະ ສປຊ; ເຫັນດີເປັນເອກະສັນຈະສົມທົບກັບບັນດາປະເທດສະມາຊິກອາຊຽນອື່ນ ມານະພະຍາຍາມປະຕິບັດຈຸດໝາຍສ້າງປະຊາຄົມອາຊຽນ ສຳເລັດໃນປີ 2015. ຫວຽດນາມ ຢືນຢັນສືບຕໍ່ສະໜັບສະໜູນອິນໂດເນເຊຍໃນບົດບາດເປັນປະທານອາເປກ 2013. ກ່ຽວກັບບັນຫາທະເລຕາເວັນອອກ, ການນຳສອງທ່ານຢືນຢັນຄືນໃໝ່ ຕໍ່ຄວາມສຳຄັນຂອງສັນຕິພາບ, ສະຖຽນລະພາບ, ຄວາມສະຫງົບປອດໄພ ແລະ ຄວາມເສລີໃນການເດີນທະເລ, ແກ້ໄຂການພິພາດໂດຍສັນຕິວິທີ, ລະງັບໃຈ, ບໍ່ນຳໃຊ້ ຫລືນາບຂູ່ນຳໃຊ້ກຳລັງອາວຸດ, ເຄົາລົບກົດໝາຍສາກົນ. ສອງຝ່າຍສະແດງການສະໜັບສະໜູນຕໍ່ຖະແຫລງການ 6 ຂໍ້ຂອງອາຊຽນກ່ຽວກັບບັນຫາທະເລຕາເວັນອອກ ແລະ ຊົມເຊີຍຖະແຫລງການຮ່ວມຂອງກອງປະຊຸມສຸດຍອດອາຊຽນ-ຈີນ ຄັ້ງທີ 15 ກ່ຽວກັບການສະເຫຼີມສະຫຼອງ 10 ປີແຫ່ງການສ້າງຕັ້ງຖະແຫລງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ກໍ່ຄືບາດກ້າວຜັນຂະຫຍາຍລະອຽດຕໍ່ໄປຂອງຖະແຫລງການີ້.
ສິ້ນສຸດການເຈລະຈາ, ທ່ານປະທານປະເທດເຈືອງເຕີນຊາງ ແລະ ປະທານາ ທິບໍດີອິນໂດເນເຊຍ Susilo Bambang Yudhoyono ເປັນສັກຂີພິຍານພິທີລົງນາມສັນຍາໜູນຊ່ວຍຕຸລາການດ້ານອາຍາ, ສັນຍາກ່ຽວກັບການສົ່ງຜູ້ຮ້າຍຂ້າມແດນ ແລະ ບົດບັນທຶກຊ່ວຍຈຳກ່ຽວກັບການຮ່ວມມືດ້ານຜະລິດຕະພັນກະເສດລະຫວ່າງສອງປະເທດ. ໃນໂອກາດນີ້, ສອງຝ່າຍກໍ່ໄດ້ລົງນາມໃນບັນດາບົດບັນທຶກຊ່ວຍຈຳກ່ຽວກັບການຮ່ວມມືດ້ານການເງິນ ແລະ ບົດບັນທຶກຊ່ວຍຈຳກ່ຽວກັບການຮ່ວມມືດ້ານພະລັງງານ-ຊັບພະຍາກອນໂລຫະ.
ພາຍຫລັງການເຈລະຈາ, ທ່ານປະທານປະເທດເຈືອງເຕີນຊາງ ແລະ ປະທານາທິບໍດີອິນໂດເນເຊຍ Susilo Bambang Yudhoyono ໄດ້ຈັດການປະຊຸມຂ່າວຮ່ວມ. ຫລັງຈາກນັ້ນ, ປະທານາທິບໍດີອິນໂດເນເຊຍ Susilo Bambang Yudhoyono ໄດ້ຈັດງານລ້ຽງຮັບຮອງທ່ານປະທານປະເທດເຈືອງເຕີນຊາງ ແລະ ຄະນະຜູ້ແທນຂັ້ນສູງລັດຫວຽດນາມ ຢ່າງສົມກຽດ./.