(vovworld) - “ເປັນດວງດາວເຍືອງທາງຕະຫຼອດໄປ” ແມ່ນຫົວຂໍ້ບົດຂຽນຂອງທ່ານປະທານປະເທດ ເຈືອງເຕີນຊາງ ທີ່ລົງພິມໃນໜັງສືພິມ ກວນໂດ້ຍຢືນເຢີນ (ສຽງຂອງກອງທັບປະຊາຊົນຫວຽດນາມ) ສະບັບອອກວັນທີ 14/12, ເນື່ອງໃນໂອກາດສະເຫຼີມສະຫຼອງ 68 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ຄືວັນທີ 22/12. ບົດຂຽນໄດ້ເຕືອງເຖິງສະພາບການປະເທດຊາດໃນປະຈຸບັນ ທີ່ກ່ຽວຂ້ອງເຖິງ 2 ໜ້າທີ່ຍຸດທະສາດນັ້ນແມ່ນປົກປັກຮັກສາ ແລະ ສ້າງສາປະເທດຊາດ. ໃນບົດຂຽນ, ທ່ານປະທານປະເທດ ເຈືອງເຕີນຊາງ ໄດ້ຢືນຢັນວ່າ ພັກ, ລັດ ເດັດດຽວບໍ່ຂາຍປະເທດຊາດໃຫ້ບັນດາກຳລັງທີ່ເປັນປໍລະປັກຄືດັ່ງຄຳຕູ່ຫາຂອງພວກບໍ່ດີ. ທ່າທີ່ອັນຈຳເປັນໃນປະຈຸບັນນັ້ນແມ່ນປະຊາຊົນ, ທຸກໆຊັ້ນວັນນະໃນສັງຄົມ, ເຄື່ອນໄຫວເພື່ອຜົນປະໂຫຍດຂອງປະເທດຊາດ, ເພື່ອຄວາມສະຖຽນລະພາບດ້ານການເມືອງ, ເພື່ອຄວາມສະຫງົບສຸກຂອງສັງຄົມ, ຕ້ອງຍູ້ແຮງຂະບວນວິວັດແຫ່ງຄວາມມະຫາສາມັກຄີ, ປ່ອງດອງຊາດກວ່າອີກ. ນອກຈາກນັ້ນແລ້ວ, ການເສື່ອມທາດເສຍຄຸນຕ້ອງໄດ້ຮັບການສະກັດກັ້ນ. ການສໍ້ລາດບັງຫຼວງ, ສິ່ງທີ່ຫຍໍ້ທໍ້ຕ້ອງຖືກລົບລ້າງ, ສ້າງການຫັນປ່ຽນໃໝ່ໃນວິວັດການພັດທະນາປະເທດຊາດ. ຖ້າເຮັດໄດ້ຄືແນວນັ້ນ, ກຳລັງແຮງຂອງປະເທດຊາດຈະເພີ່ມຂຶ້ນທົບຫຼາຍເທົ່າ, ໃນນັ້ນມີກຳລັງແຮງດ້ານການປ້ອງກັນຊາດປ້ອງກັນຄວາມສະຫງົບ.
ເພື່ອປະຕິບັດຈຸດໝາຍປົກປັກຮັກສາ ແລະ ສ້າງສາປະເທດຊາດໃນຈຸດເວລານີ້ຢ່າງມີປະສິດທິຜົນ, ຕ້ອງມີຄວາມສຸດຄິດສຸດໃຈ, ຄວາມເຊື່ອໝັ້ນ ແລະ ການຮ່ວມແຮງຮ່ວມໃຈ ການປະກອບເຫື່ອແຮງຂອງທົ່ວທັງຊາດ. ໃນນັ້ນມີກອງທັບ ແລະ ບັນດາກຳລັງປະກອບອາວຸດ, ບໍ່ສະເພາະແຕ່ເຮັດໜ້າທີ່ປ້ອງກັນຊາດປ້ອງກັນຄວາມສະຫງົບເທົ່ານັ້ນ, ຫາກເຂົ້າຮ່ວມບັນຫາທີ່ມີຄວາມສຳຄັນໃນການປັບປຸງພັດທະນາປະເທດຊາດ ແລະ ຍົກສູງລະດັບຄອງຊີບຂອງປະຊາຊົນ
ໃນສະພາບການທ່ີໂລກ ແລະ ພາກພື້ນ ພວມມີການຜັນແປໄປຢ່າງສັບສົນ, ຕາມທ່ານປະທານປະເທດແລ້ວ, ທາດແທ້ ແລະ ກຳລັງໜູນພັດທະນາຂອງຫວຽດນາມ ບໍ່ອີ່ງໃສ່ບັນດາປັດໃຈໃຊ້ຄວາມຮຸນແຮງ, ຫາກຮຽກຮ້ອງໃຫ້ ພັກ ແລະ ລັດ ຕ້ອງມີການນຳພາທີ່ສະຫຼາດສ່ອງໄສ, ອ່ອນໄຫວ. ແຕ່ວ່າ, ເມື່ອມີພວກສັດຕູຮຸກຮານປະເທດຊາດ, ຫວຽດນາມ ຈະລະດົມທຸກແຫຼ່ງກຳລັງເພື່ອປ້ອງກັນຕົວ ແລະ ຍາດໄດ້ໄຊຊະນະ.