ບັນດາເຈົ້າໜ້າທີ່ ອາຊຽນ ແລະ ຈີນ
(ພາບ: ສຳນັກຂ່າວສານຊິນຮວາ/ສຳນັກຂ່າວສານ ຫວຽດນາມ)
(vovworld) – ບັນດາເຈົ້າໜ້າທີ່ຂັ້ນສູງຂອງ ຈີນ ແລະ ອາຊຽນ ໄດ້ຢັ້ງຢືນແຜນການແກ້ໄຂການຂັດແຍ້ງກັນຢູ່ທະເລຕາເວັນອອກ ຜ່ານການເຈລະຈາ ແລະ ນຳໃຊ້ຂອບຫຼັກການຂອງພາກພື້ນ. ຖະແຫຼງການດັ່ງກ່າວໄດ້ຍົກອອກມາທີ່ກອງປະຊຸມບັນດາເຈົ້າໜ້າທີ່ຂັ້ນສູງລະຫວ່າງ 2 ຝ່າຍກ່ຽວກັບການປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC), ຈັດຕັ້ງໃນວັນທີ 15 – 16/8 ຢູ່ ໝານເຈົາຫຼີ, ເຊິ່ງແມ່ນນະຄອນທ່າກ່ຳປັ່ນຢູ່ພາກເໜືອ ຈີນ. ທີ່ການພົບປະຄັ້ງນີ້, 2 ຝ່າຍໄດ້ເຫັນດີເປັນເອກະສັນສືບຕໍ່ປະຕິບັດ DOC ແລະ ຢັ້ງຢືນຄືນໃໝ່ບັນດາແຜນການ, ແກ້ໄຂການຂັດແຍ້ງກັນຜ່ານການເຈລະຈາ, ຄຸ້ມຄອງຄວາມບໍ່ລົງລອຍກັນໃນຂອບຫຼັກການຂອງພາກພື້ນ, ເພີ່ມທະວີການຮ່ວມມືທາງທະເລ, ແລະ ມຸ່ງໄປເຖິງການເຈລະຈາກ່ຽວກັບກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ເພື່ອແນໃສ່ຮັບປະກັນສັນຕິພາບ ແລະ ສະຖຽນລະພາບໃນພາກພື້ນ. 2 ຝ່າຍເຫັນດີເປັນເອກະສັນກ່ຽວກັບຄວາມສຳຄັນຂອງໂທລະສັບສາຍດ່ວນການທູດຂັ້ນສູງລະຫວ່າງ ຈີນ ແລະ ອາຊຽນ ເພື່ອແກ້ໄຂບັນດາກໍລະນີຮີບດ່ວນບົນທະເລ ແລະ ຖະແຫຼງການຮ່ວມກ່ຽວກັບການນຳໃຊ້ບັນດາຂໍ້ກຳນົດກ່ຽວຂ້ອງເຖິງບັນດາເຫດການບັງເອີນລະຫວ່າງ ຈີນ ແລະ ອາຊຽນ ຢູ່ທະເລຕາເວັນອອກ. 2 ຝ່າຍກໍ່ໄດ້ແລກປ່ຽນທັດສະນະກ່ຽວກັບວິທີເພີ່ມທະວີການຮ່ວມມືທາງທະເລ ແລະ ການເຈລະຈາກ່ຽວກັບ COC.