(vovworld) – ຕອນເຊົ້າວັນທີ 8/6, ທີ່ເຂດທ່ອງທ່ຽວທະເລທິ້ງລອງ, ແຂວງ ນາມດິ້ງ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເຂົ້າຮ່ວມພິທີໂຮມຊຸມນຸມມິດຕິງຕອບສະໜອງສັບປະດາທະເລ ແລະ ໝູ່ເກາະ ຫວຽດນາມ ແລະ ສະເຫຼີມສະຫຼອງວັນມະຫາສະມຸດໂລກ (8/6). ສັບປະດາທະເລ ແລະ ໝູ່ເກາະ ຫວຽດນາມ ປີ 2016 ມີຫົວຂໍ້ວ່າ “ເພື່ອໜ່ວຍໂລກຂຽວ”. ວັນມະຫາສະມຸດໂລກປີນີ້ມີຫົວຂໍ້ວ່າ “ມະຫາສະມຸດຍືນຍົງ, ໜ່ວຍພິພົບປອດໄສ”.
ທ່ານ ຫງວຽນຊວນຟຸກກ່າວຄຳເຫັນທີ່ພິທີ
ສັບປະດາທະເລ ແລະ ໝູ່ເກາະ ຫວຽດນາມ ໄດ້ຈັດຕັ້ງໃນລະຫວ່າງວັນທີ 1 – 8/6 ປະຈຳປີ, ໃນຂອບເຂດທົ່ວປະເທດ, ເພື່ອແນໃສ່ຍົກສູງສະຕິຄວາມຮັບຮູ້ຂອງປະຊາຊົນທຸກຊັ້ນວັນນະ, ບັນດາອົງການຄຸ້ມຄອງລັດ ແລະ ອຳນາດການປົກຄອງທ້ອງຖິ່ນກ່ຽວກັບບົດບາດ, ທີ່ຕັ້ງສຳຄັນຂອງທະເລ, ໝູ່ເກາະ ໃນພາລະກິດສ້າງສາ ແລະ ປົກປັກຮັກສາປະເທດຊາດ, ກໍ່ຄືເຊີດຊູບັນດາຄຸນຄ່າຂອງມະຫາສະມຸດສຳລັບການມີຊີວິດຂອງມະນຸດ.
ທີ່ພິທີໂຮມຊຸມນຸມມິງຕິງ, ທ່ານນາຍົກລັດຖະມົນຕີ ຫງວຽນຊວນຟຸກ ຮຽກຮ້ອງຕ້ອງເສີມຂະຫຍາຍປະສິດທິຜົນແຫຼ່ງຊັບພະຍາກອນທະເລໃຫ້ແກ່ການພັດທະນາເສດຖະກິດ - ສັງຄົມ. ຈຸດໝາຍຮອດປີ 2020, ເສດຖະກິດທະເລ ແລະ ແຄມທະເລປະກອບສ່ວນແຕ່ 53 – 55% GDP ຂອງທົ່ວປະເທດ. ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ:
“ການປົກປັກຮັກສາສິ່ງແວດລ້ອມທະເລແມ່ນໜ້າທີ່ສຳຄັນພິເສດ, ເປັນປະຈຳ, ຍາວນານ. ເພີ່ມທະວີວຽກງານປົກປັກຮັກສາສິ່ງແວດລ້ອມ, ພິເສດແມ່ນເຂດແຄມທະເລ, ຮັບມືກັບບັນດາເຫດການທີ່ເກີດຂຶ້ນຕໍ່ສິ່ງແວດລ້ອມຢ່າງທັນການ. ຮຽກຮ້ອງໃຫ້ກະຊວງຊັບພະຍາກອນ ແລະ ສິ່ງແວດລ້ອມເປັນເຈົ້າການພ້ອມກັບບັນດາກະຊວງ, ຂະແໜງການທີ່ກ່ຽວຂ້ອງ ແລະ ບັນດາທ້ອງຖິ່ນກວດກາໂດຍກົງບັນດາໂຄງການລະບາຍນຳ້ອອກສູ່ທະເລ, ຮັບປະກັນຕ້ອງປະຕິບັດຢ່າງເຂັ້ມງວດ, ມີປະສິດທິຜົນບັນດາຂໍ້ກຳນົດຂອງກົດໝາຍກ່ຽວກັບການປົກປັກຮັກສາສິ່ງແວດລ້ອມ, ເດັດດ່ຽວຕັດສິນລົງໂທດບໍ່ວ່າບຸກຄົນ, ອົງການໃດທີ່ມີການກະທຳລະເມີດ.”
ທ່ານນາຍົກລັດຖະມົນຕີ ຫງວຽນຊວນຟຸກ ຢັ້ງຢືນວ່າ: ຫວຽດນາມ ສະໜັບສະໜູນບັນດາປະເທດມີຜົນປະໂຫຍດຢູ່ທະເລຕາເວັນອອກທີ່ມີບັນດາການກະທຳຢ່າງແທດຈິງ, ປະກອບສ່ວນຮັບປະກັນສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນເຮືອ, ການບິນ ແລະ ປົກປັກຮັກສາສິ່ງແວດລ້ອມທະເລ.