(vovworld) - ຕອນບ່າຍວັນທີ 19/8, ຢູ່ແຂວງ ຮ່າຕີ້ງ, ກະຊວງວັດທະນະທຳ, ກິລາ ແລະ ການທ່ອງທ່ຽວຫວຽດນາມ ສົມທົບກັບຄະນະກຳມະການປະຊາຊົນແຂວງ ຮ່າຕີ້ງ ຈັດຕັ້ງການມອບລາງວັນ “ພົບປະແລກປ່ຽນວັດທະນະທຳ, ກິລາ, ການທ່ອງທ່ຽວເຂດຊາຍແດນຫວຽດນາມ - ລາວ 2012”. ລາຍການພົບປະແລກປ່ຽນວັດທະນະທຳ, ກິລາ, ການທ່ອງທ່ຽວເຂດຊາຍແດນຫວຽດນາມ - ລາວ ຖືກຈັດຂຶ້ນໃນລະຫວ່າງວັນທີ 17 – 19/8 ຢູ່ ແຂວງຮ່າຕີ້ງດ້ວຍບັນດາການເຄື່ອນໄຫວວັດທະນະທຳ, ກິລາທີ່ຟົດຟື້ນລະຫວ່າງບັນດາແຂວງຊາຍແດນຄື: ເງ້ອານ, ຮ່າຕີ້ງ, ກວາງບິນ (ຫວຽດນາມ) ແລະ ຊຽງແຂວງ, ບໍລິຄຳໄຊ, ຄຳມ່ວນ (ຂອງລາວ). ການເຄື່ອນໄຫວແຂ່ງຂັນກິລາມີການເຂົ້າຮ່ວມຂອງນັກກິລາທັງໝົດ 100 ຄົນຊຶ່ງໄດ້ພ້ອມກັນແຂ່ງຂັນໃນກິລາ 4 ປະເພດຄື: ຕີດອກປີກໄກ, ປິ່ງປ່ອງ, ດຶງເຊືອກ, ຊັດໄມ້ຄອນ ຄະນະຈັດຕັ້ງໄດ້ມອບຫຼຽນ 15 ຊຸດໃຫ້ແກ່ບັນດານັກກິລາ. ການເຄື່ອນໄຫວວັດທະນະທຳທີ່ພົ້ນເດັ່ນແມ່ນ ງານວາງສະແດງຮູບຖ່າຍ “ວັດທະນະທຳທີ່ເປັນເອກະລັກສະເພາະຂອງບັນດາແຂວງເຂດຊາຍແດນຫວຽດນາມ - ລາວ” ໄດ້ວາງສະແດງຮູບຖ່າຍກ່ວາ 100 ແຜ່ນ ແລະ ວັດຖຸພັນທີ່ມີລ້ຳຄ່າ 300 ຢ່າງ, ພ້ອມກັບແຜ່ນຊີດີ, ສິ່ງພິມວັດທະນະທຳທີ່ດີເດັ່ນສຳລັບພື້ນຖານວັດທະນະທຳຊົນເຜົ່າຂອງບັນດາເຜົ່າເຂດຊາຍແດນຫວຽດນາມ - ລາວ ທີ່ໄດ້ຮັບເລືອກເຟັ້ນນຳມາວາງສະແດງໃນງານຄັ້ງນີ້. ກ່ຽວກັບການທ່ອງທ່ຽວມີກອງປະຊຸມສຳມະນາ “ການທ່ອງທ່ຽວກັບການພັດທະນາເສດຖະກິດ ວັດທະນະທຳເຂດຊາຍແດນຫວຽດນາມ - ລາວ” ເພື່ອຊອກຫາມາດຕະການຊຸກຍູ້ການພັດທະນາການທ່ອງທ່ຽວເຂດຊາຍແດນຫວຽດນາມ - ລາວ ຕາມທິດຍືນຍົງ ແລະ ມີປະສິດທິຜົນ. ຄະນະຈັດຕັ້ງໄດ້ມອບໃບຍ້ອງຍໍຂອງກະຊວງວັດທະນະທຳ - ກິລາ ແລະ ການທ່ອງທ່ຽວຫວຽດນາມ, ໃບຍ້ອງຍໍຂອງກະຊວງຖະແຫຼງຂ່າວ ວັດທະນະທຳ ແລະ ການທ່ອງທ່ຽວ ລາວ ໃຫ້ 7 ໝູ່ຄະນະທີ່ມີຜົນງານດີເດັ່ນໃນລາຍການພົບປະແລກປ່ຽນ. ພາຍຫຼັງການຈັດງານຢູ່ແຂວງ ຮ່າຕີ້ງ, ລາຍການພົບປະແລກປ່ຽນວັດທະນະທຳ, ກິລາ ແລະ ການທ່ອງທ່ຽວເຂດຊາຍແດນຫວຽດນາມ - ລາວ ຈະສືບຕໍ່ຖືກຈັດຕັ້ງຂຶ້ນຢູ່ບັນດາແຂວງມີຊາຍແດນຮ່ວມກັບລາວ ເຊິ່ງລວມມີ: ແຂວງ ດ້ຽນບຽນ ແຕ່ວັນທີ 20 – 23/8, ເຊີນລາ 29/8 – 1/9, ແທງຮ໋ວາ, ກວາງຈີ້, ເທື່ອທຽນເຫ້ວ, ກວາງນາມ ໃນທ້າຍເດືອນ 9 ແລະ ແຂວງ ກອນຕຸມ ໃນຕົ້ນເດືອນ 10/2012. ພິທີອັດງານພົບປະແລກປ່ຽນຈະດຳເນີນໃນເດືອນ 12/2012.