(vovworld) – ວັນທີ 22/12, ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນຫວຽດນາມ ຄົບຮອບ 70 ປີ, ບັນດາໜັງສືພິມໃຫຍ່ຢູ່ ຫວຽດນາມ ໄດ້ລົງພິມບັນດາຂ່າວ, ບົດ ແລະ ຮູບພາບ ກ່ຽວກັບກອງທັບປະຊາຊົນ ຫວຽດນາມ. ບົດບັນນາທິການຂອງໜັງສືພິມ Quân Đội Nhân Dân ແປວ່າ: ກອງທັບປະຊາຊົນ ຢືນຢັນວ່າ: ກອງທັບປະຊາຊົນຫວຽດນາມ ແມ່ນກອງທັບວິລະຊົນຂອງຊາດຫວຽດນາມວິລະຊົນ. ໜັງສືພິມ Nhân Dân-ສຽງຂອງພັກກອມມູນິດ ຫວຽດນາມ ກໍ່ລົງພິມບົດບັນນາທິການ ຢືນຢັນວ່າ: ກອງທັບປະຊາຊົນຫວຽດນາມ ຈະສ້າງຜົນງານຕໍ່ໃນໄລຍະໃໝ່.
ເນື່ອງໃນໂອກາດນີ້, ຕອນເຊົ້າວັນທີ 22/12 ວິທະຍຸກະຈາຍສຽງຫວຽດນາມ ໄດ້ອອກອາກາດລາຍການກະຈາຍສຽງພິເສດ ດ້ວຍຫົວເລື່ອງວ່າ: “ກອງທັບວິລະຊົນຂອງຊາດຫວຽດນາມວິລະຊົນ”.
ເນື່ອງໃນໂອກາດສະເຫຼີມສະຫຼອງ 70 ປີ ແຫ່ງວັນສ້າງຕັ້ງກອງທັບປະຊາຊົນຫວຽດນາມ, ທ່ານພົນເອກ ຟຸ່ງກວາງແທງ, ກຳມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີວ່າການກະຊວງປ້ອງກັນປະເທດ, ໄດ້ໄປຢ້ຽມຢາມ ແລະ ອວຍພອນບັນດາທ່ານອະດີດການນຳພັກ, ລັດ ແລະ ກອງທັບ.
ແລະກໍ່ໃນວັນດຽວກັນ, ນະຄອນໂຮ່ຈິມິນ ໄດ້ຈັດຕັ້ງການພົບປະກັບບັນດານາຍພົນ, ພະນັກງານຂັ້ນສູງກອງທັບທີ່ໄດ້ພັກກິນເບ້ຍບຳນານໃນບໍລິເວນນະຄອນ, ເຊີດຊູບັນດານັກວິລະຊົນທີ່ໄດ້ອຸທິດຕະຫຼອດຊີວິດໃຫ້ແກ່ພາລະກິດປົດປ່ອຍຊາດ. ນັກວິລະຊົນກຳລັງປະກອບອາວຸດປະຊາຊົນ ຫງວຽນແທ່ງເງື້ອງ ເວົ້າວ່າ:
“ ການພົບປະຄັ້ງນີ້ແມ່ນໂອກາດເພື່ອໃຫ້ພວກຂ້າພະເຈົ້າທົບທວນຄືນມູນເຊື້ອຂອງກອງທັບ, ແມ່ນໂອກາດເພື່ອໃຫ້ພວກຂ້າພະເຈົ້ານັດພົບກັນໃໝ່. ໃນມື້ນີ້, ພວກຂ້າພະເຈົ້າຍັງຄົງຄິດເຖິງບັນດາເພື່ອນຮ່ວມກົມກອງທີ່ໄດ້ເສຍສະຫຼະຊິວິດຢູ່ບັນ ດາສະໜາມຮົບ”.
ສ່ວນບັນດາໜັງສືພິມຕ່າງໆຂອງລາວຄື: ປະຊາຊົນ, ສຽງຂອງສູນກາງພັກປະຊາຊົນປະຕິວັດລາວ, ປະເທດລາວ ແລະ ລາວພັດທະນາໃນຊຸມວັນຜ່ານມາ ໄດ້ລົງພິມບົດ, ຮູບຫຼວງຫຼາຍ ເພື່ອຍ້ອງຍໍສັນລະເສີນກອງທັບປະຊາຊົນຫວຽດນາມ. ບັນດາບົດໄດ້ຍົກໃຫ້ເຫັນບັນດາຜົນງານ ເຊິ່ງກອງທັບ ປະຊາຊົນຫວຽດນາມ ຍາດມາໄດ້ໃນຕະຫຼອດ 70 ປີແຫ່ງວັນກໍ່ສ້າງ, ເຕີບໃຫຍ່, ໃນນັ້ນມີການປະຕິບັດໜ້າທີ່ສາກົນຢູ່ລາວ. ບັນດາບົດໜັງສືພິມລ້ວນແຕ່ຢືນຢັນວ່າ: ລາວ ຈະເຮັດຈົນສຸດຄວາມສາມາດຂອງຕົນພ້ອມກັບ ຫວຽດນາມ ຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ ລາວ-ຫວຽດນາມ ເພື່ອຄວາມວັດທະນາຖາວອນຂອງ 2 ປະເທດ, ເພື່ອພາລະກິດສັນຕິພາບ, ຮ່ວມມືພ້ອມກັນພັດທະນາຢູ່ພາກພື້ນ ແລະ ໂລກ.
ພາບປະກອບ
ຕອນເຊົ້າວັນທີ 22/12 ຢູ່ນະຄອນຫຼວງ ວຽງຈັນ, ກະຊວງປ້ອງກັນປະເທດ ລາວ ໄດ້ຈັດຕັ້ງງານໂຮມຊຸມນຸມມິດຕິງສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ. ກ່າວຄຳເຫັນທີ່ພິທີ, ພົນໂທ ແສງນວນ ໄຊຍາລາດ, ລັດຖະມົນຕີກະຊວງປ້ອງກັນປະເທດ ລາວ, ຕີລາຄາສູງເລື່ອງກອງທັບປະຊາຊົນ ຫວຽດນາມ ໄດ້ປະຕິບັດໜ້າທີ່ສາກົນອັນສູງສົງສຳລັບການປະຕິວັດ ລາວ ແລະ ປະຕິວັດ ກຳປູເຈຍ ຢ່າງດີເດັ່ນ. ທ່ານລັດຖະມົນຕີກະຊວງປ້ອງກັນປະເທດ ລາວ ຢືນຢັນວ່າ: ກອງທັບປະຊາຊົນ ຫວຽດນາມ ຍາມໃດກໍ່ແມ່ນແບບຢ່າງທີ່ດີເດັ່ນເພື່ອໃຫ້ກອງທັບປະຊາຊົນປະຕິວັດລາວນັບມື້ນັບທັນສະໄໝ, ເປັນກອງທັບຫຼວງ ແລະ ຍອດຢ້ຽມຕອບສະໜອງຄວາມຮຽກຮ້ອງຕ້ອງການການປະຕິວັດໃນສະພາບການໃໝ່.
ແລະກໍ່ໃນຕອນເຊົ້າວັນທີ 22/12, ສະຖານທູດ ຫວຽດນາມ ປະຈຳ ລາຊະອານາຈັກ ກຳປູເຈຍ ຈັດຕັ້ງພິທີຖະຫວາຍດອກໄມ້, ຕອບບຸນແທນຄູນບັນດານັກວິລະຊົນເສຍສະຫຼະຊີວິດເພື່ອຊາດຢູ່ອະນຸສາວະລີທະຫານອາສາສະໝັກ ຫວຽດນາມ ຢູ່ນະຄອນຫຼວງ ພະນົມເປັນ. ພິທີສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນ ຫວຽດນາມ ແລະ 25 ປີແຫ່ງວັນທົ່ວປວງຊົນປ້ອງກັນຊາດໄດ້ຮັບການຈັດຕັ້ງຢ່າງສົມກຽດໃນຕອນບ່າຍວັນທີ 22/12, ຢູ່ ພະນົມເປັນດ້ວຍການເຂົ້າຮ່ວມຂອງທ່ານຮອງນາຍົກລັດຖະມົນຕີ ທັງເປັນລັດຖະມົນຕີກະຊວງປ້ອງກັນປະເທດ ກຳປູເຈຍ Tia Banh.