(vovworld) – ວັນທີ 4/11, ທີ່ສຳນັກງານປະເທດປະທານ, ທ່ານປະທານປະເທດ ຫວຽດນາມ ເຈືອງເຕີນຊາງ ໄດ້ໃຫ້ການຕ້ອນຮັບທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ Slovakia Miroslav Lajcak, ເນື່ອງໃນໂອກາດທ່ານຮອງນາຍົກລັດຖະມົນຕີ ມາຢ້ຽມຢາມ, ເຮັດວຽກຢູ່ ຫວຽດນາມ ແຕ່ວັນທີ 4 – 5/11. ກ່າວຄຳເຫັນທີ່ການຕ້ອນຮັບ, ທ່ານປະທານປະເທດ ຖືວ່າ: ວິວັດທະນາການເຈລະຈາສັນຍາການຄ້າເສລີ FTA ລະຫວ່າງ ຫວຽດນາມ ແລະ ສະຫະພາບ ເອີລົບ (ອີຢູ) ສຳເລັດຜົນ, ຈະເປີດອອກກາລະໂອກາດໃຫ້ບັນດາຝ່າຍ. Slovakia ຈະເຊື່ອມຊຶມເຂົ້າຕະຫຼາດ ອາຊຽນ ແລະ ກົງກັນຂ້າມ, ຫວຽດນາມ ຈະສຳພັດຕະຫຼາດ ອີຢູ ຜ່ານການພົວພັນເພື່ອນມິດທີ່ເປັນມູນເຊື້ອ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ Slovakia Miroslav Lajcak ເນັ້ນໜັກວ່າ: Slovakia ຖືເປັນສຳຄັນ ແລະ ຈະສືບຕໍ່ຜັນຂະຫຍາຍການພົວພັນທີ່ເປັນມູນເຊື້ອກັບ ຫວຽດນາມ. ທ່ານຮອງນາຍົກລັດຖະມົນຕີ ສະເໜີໃຫ້ 2 ປະເທດເພີ່ມທະວີການພົວພັນຂັ້ນສູງ, ຊຸກຍູ້ການພົວພັນທາງດ້ານການທູດປະຊາຊົນ, ຜັນຂະຫຍາຍການຮ່ວມມືກ່ຽວກັບດ້ານສຶກສາສິລະປະການສະແດງ. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ Slovakia Miroslav Lajcak ໃຫ້ຮູ້ວ່າ: ໃນຄະນະຜູ້ແທນມາຢ້ຽມຢາມ ຫວຽດນາມ ຄັ້ງນີ້ມີຫຼາຍວິສາຫະກິດ Slovakia ດ້ວຍຄວາມຫວັງຊອກຫາກາລະໂອກາດ ແລະ ຮ່ວມມືທາງດ້ານພະລັງງານນິວເຄຼຍ, ກະສິກຳ, ຄຸ້ມຄອງແຫຼ່ງນ້ຳ. ທ່ານຮອງນາຍົກລັດຖະມົນຕີ ຢືນຢັນ: Slovakia ພ້ອມແລ້ວທີ່ຈະແລກປ່ຽນບົດຮຽນກ່ຽວກັບການຫັນປ່ຽນເສດຖະກິດກັບ ຫວຽດນາມ ແລະ ຫວັງວ່າ 2 ປະເທດຈະສ້າງຕັ້ງການພົວພັນຄູ່ຮ່ວມມືຍຸດທະສາດ. Slovakia ສະໜັບສະໜູນວິວັດການເຈລະຈາຂອງ ຫວຽດນາມ ກັບ ອີຢູ ກ່ຽວກັບ FTA, ຍ້ອນສິ່ງດັ່ງກ່າວນຳມາເຊິ່ງຜົນປະໂຫຍດໃຫ້ແກ່ ຫວຽດນາມ, Slovakia ພ້ອມກັບບັນດາສະມາຊິກ ອີຢູ.
ແລະກໍ່ໃນວັນດຽວກັນຢູ່ຮ່າໂນ້ຍ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ Slovakia ໄດ້ເຂົ້າຮ່ວມເວທີປາໄສວິສາຫະກິດ ຫວຽດນາມ - Slovakia ໂດຍຫ້ອງການການຄ້າ ແລະ ອຸດສາຫະກຳ ຫວຽດນາມ (VCCI) ຈັດຕັ້ງ. ທີ່ເວທີປາໄສ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ Slovakia ໃຫ້ຮູ້ວ່າ: Slovakia ຍາມໃດກໍ່ສະໜັບສະໜູນ ບັນດາວິສາຫະກິດຂະຫນາດກາງ ແລະ ນ້ອຍ, ບັນດາວິສາຫະກິດບໍ່ອາດຂາດໄດ້ໃນການຊຸກຍູ້ການພັດທະນາຂອງພຶື້ນຖານເສດຖະກິດ ພ້ອມທັງເພີ່ມທະວີວົງເງິນສົ່ງອອກ - ນຳເຂົ້າ, ເງິນລົງທຶນໂດຍກົງຈາກຕ່າງປະເທດຂອງ 2 ປະເທດ. ທ່ານປະທານ VCCI ດ່ວານຢູຍເຄືອງ, ຮັບຮູ້ວ່າ: ບັນດາທ່າແຮງຄ້າຍຄືກັນກ່ຽວກັບກົນໄກເສດຖະກິດ, ສະຖຽນລະພາບດ້ານການເມືອງ, ແມ່ນຕະຫຼາດດຶງດູດ, ຂະຫຍັນຂັນເຄື່ອນໃນພາກພື້ນ ອາຊີ, ເອີລົບ, ຫວຽດນາມ ແລະ ສ. Slovakia ມີກາລະໂອກາດເພື່ອພັດທະນາການພົວພັນການຄ້າລະຫວ່າງ 2 ປະເທດຕາມລວງກ້ວາງ ແລະ ລວງເລິກ, ພິເສດແມ່ນການຮ່ວມມືລະຫວ່າງ ປະຊາຄົມວິສາຫະກິດ 2 ປະເທດ.
ໃນຂອບເຂດການຢ້ຽມຢາມ ຫວຽດນາມ ຄັ້ງນີ້, ຕອນຄ່ຳວັນທີ 4/11, ທ່ານລັດຖະມົນຕີການຕ່າງປະເທດ ສ. Slovakia ໄດ້ເຂົ້າຮ່ວມງານວາງສະແດງຮູບຖ່າຍ Slovakia – ຫວຽດນາມ ແລະ ໄດ້ຢ້ຽມຢາມສະຖານທີ່ວັດທະນະທຳບາງແຫ່ງຢູ່ ຮ່າໂນ້ຍ.