ທ່ານເລຂາທິການໃຫຍ່ ຫງວຽນຟູ໋ຈ້ອງ ຕ້ອນຮັບທ່ານລັດຖະມົນຕີ Ashton Carter
(ພາບ: chinhphu.vn)
|
(vovworld) – ຕອນບ່າຍວັນທີ 1/6, ທີ່ສຳນັກງານສູນກາງພັກ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຕ້ອນຮັບຄະນະຜູ້ແທນກະຊວງປ້ອງກັນປະເທດ ອາເມລິກາ ໂດຍທ່ານລັດຖະມົນຕີ Ashton Carter ນຳໜ້າພວມຢູ່ຢ້ຽມຢາມ ຫວຽດນາມ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຢັ້ງຢືນແຜນນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດ ຫວຽດນາມ ຖືເປັນສຳຄັນການພົວພັນ ຫວຽດນາມ - ອາເມລິກາ. ທ່ານເລຂາທິການໃຫຍ່ ຮັບຮູ້ການຮ່ວມມືຂອງອຳນາດການປົກຄອງ, ສະພາແຫ່ງຊາດ ແລະ ອົງການຕ່າງໆ, ສ່ວນບຸກຄົນ ອາເມລິກາ ເວົ້າລວມໃນການເຂົ້າຮ່ວມແກ້ໄຂຜົນຮ້າຍຢ້ອນຫຼັງຈາກສົງຄາມ, ພ້ອມທັງຊົມເຊີຍການຮ່ວມມືຂອງກະຊວງປ້ອງກັນປະເທດ ອາເມລິກາ ກັບກະຊວງປ້ອງກັນປະເທດ ຫວຽດນາມ ໃນການເກັບກູ້ລະເບີດ, ກຳຈັດສິ່ງແວດລ້ອມ…
ສ່ວນທ່ານລັດຖະມົນຕີວ່າການກະຊວງປ້ອງກັນປະເທດ ອາເມລິກາ Ashton Carter ຢັ້ງຢືນວ່າ: ອາເມລິກາ ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນຫຼາຍດ້ານກັບ ຫວຽດນາມ ກ່ວາອີກ. ທ່ານລັດຖະມົນຕີ ເຫັນດີເຫັນພ້ອມຕໍ່ຄວາມຈຳເປັນເພີ່ມທະວີການແລກປ່ຽນຄະນະຜູ້ແທນຂັ້ນສູງລະຫວ່າງ 2 ປະເທດ, ໃນນັ້ນເນັ້ນໜັກເຖິງຄວາມສຳຄັນ ແລະ ຄວາມໝາຍປະຫວັດສາດຂອງການຢ້ຽມຢາມ ອາເມລິກາ ໃນໄລຍະຈະມາເຖິງຂອງທ່ານເລຂາທິການໃຫຍ່ ຫງວຽນຟູ໋ຈ້ອງ. ກ່ຽວຂ້ອງເຖິງບັນຫາຄວາມສະຫງົບ, ປອດໄພ ແລະ ຄວາມເສລີໃນການເດີນທະເລ, ການບິນໃນພາກພື້ນ ແລະ ບັນດາການຜັນແປມໍ່ໆມານີ້ຢູ່ທະເລຕາເວັນອອກ, ທ່ານ ລັດຖະມົນຕີ Ashton Carter ຢັ້ງຢືນຄືນໃໝ່ທັດສະນະສະໜັບສະໜູນເລື່ອງແກ້ໄຂບັນດາຄວາມຂັດແຍ້ງກັນດ້ວຍວິທີການທູດ ແລະ ບົນພື້ນຖານເຄົາລົບກົດໝາຍສາກົນ.
ແລະກໍ່ໃນວັນດຽວກັນ, ທີ່ສຳນັກງານປະທານປະເທດ, ທ່ານປະທານປະເທດ ເຈືອງເຕີນຊາງ ໄດ້ໃຫ້ການຕ້ອນຮັບທ່ານ Ashton Carter, ລັດຖະມົນຕີວ່າການກະຊວງປ້ອງກັນປະເທດ ອາເມລິກາ. ທີ່ການຕ້ອນຮັບ, ທ່ານປະທານປະເທດ ເຈືອງເຕີນຊາງ ຖືວ່າ: ຖະແຫຼງການກ່ຽວກັບວິໄສທັດລວມທີ່ກະຊວງປ້ອງກັນປະເທດ 2 ປະເທດຫາກໍ່ລົງນາມນັ້ນແມ່ນພື້ນຖານສຳຄັນເພື່ອໃຫ້ບັນດາຂໍ້ຕົກລົງຮ່ວມມືໃນຂົງເຂດນີ້ກ້າວເຂົ້າສູ່ລວງເລິກ.
ເມື່ອແລກປ່ຽນກ່ຽວກັບບັນຫາທະເລຕາເວັນອອກ, ທ່ານປະທານປະເທດ ເຈືອງເຕີນຊາງ ເນັ້ນໜັກຫຼັກໝັ້ນສະເໝີຕົ້ນສະເໝີປາຍຂອງ ຫວຽດນາມ ແມ່ນຍາມໃດກໍ່ປະຕິບັດນະໂຍບາຍສ້າງສາປະເທດວັດທະນາຖາວອນ, ເອກະລາດ, ອະທິປະໄຕ, ປາດຖະໜາຢາກຮ່ວມມືກັບທຸກໆປະເທດບົນພື້ນຖານຄວາມສາມັກຄີ ແລະ ມິດຕະພາບ. ບັນດາຄວາມຂັດແຍ້ງກັນຢູ່ທະເລຕາເວັນອອກ ຕ້ອງໄດ້ຮັບການແກ້ໄຂບົນພື້ນຖານການໂອ້ລົມສົນທະນາສັນຕິພາບ, ເຄົາລົບກົດໝາຍສາກົນ, ພິເສດແມ່ນສົນທິສັນຍາກ່ຽວກັບກົດໝາຍວ່າດ້ວຍທະເລປີ 1982 ຂອງ ສປຊ, ປະຕິບັດ DOC ຢ່າງເຂັ້ມງວດ ແລະ ມຸ່ງໄປເຖິງ COC ໂດຍໄວ. ທ່ານປະທານປະເທດ ເນັ້ນໜັກວ່າ: ປະຕິກິລິຍາຂອງ ຫວຽດນາມ ແມ່ນຈະແຈ້ງ, ຄັດຄ້ານບັນດາການກະທຳເຮັດໃຫ້ສະພາບເດີມປ່ຽນແປງ, ລະເມີດກົດໝາຍສາກົນຢ່າງແຮງ. ທ່ານປະທານປະເທດ ຢັ້ງຢືນວ່າ: ຄວາມໄຮ້ເຫດຜົນຂອງເສັ້ນລີ້ນງົວ 9 ຕອນ ພວມເຮັດໃຫ້ສະພາບການສັບສົນຂຶ້ນຕື່ມ. ທ່ານລັດຖະມົນຕີ Ashton Carter ໃຫ້ຮູ້ວ່າ: ຫວຽດນາມ ແລະ ອາເມລິກາ ມີທັດສະນະຄ້າຍຄືກັນທີ່ກ່ຽວຂ້ອງເຖິງສັນຕິພາບ, ຄວາມສະຫງົບ, ຄວາມປອດໄພໃນການເດີນທະເລຢູ່ທະເລຕາເວັນອອກ ແລະ ຫວັງວ່າ 2 ຝ່າຍສືບຕໍ່ຮ່ວມມືຢ່າງແໜ້ນກ່ຽວກັບບັນຫານີ້.