 ກອງປະຊຸມສຳມະນາສົ່ງເສີມການລົງທຶນ ຫວຽດນາມ ຢູ່ ໂຕກຽວ ປີ 2024 |
ຕອນບ່າຍວັນທີ 18 ພະຈິກ, ຢູ່ ໂຕກຽວ, ໄດ້ດຳເນີນກອງປະຊຸມສຳມະນາສົ່ງເສີມການລົງທຶນ ຫວຽດນາມ ຢູ່ ໂຕກຽວ ປີ 2024. ເຫດການດັ່ງກ່າວດຶງດູດຄວາມສົນໃຈຂອງນັບຮ້ອຍວິສາຫະກິດ ຍີ່ປຸ່ນ ທີ່ພວມມີແຜນການລົງທຶນເຂົ້າ ຫວຽດນາມ. ກ່າວຄຳເຫັນທີ່ກອງປະຊຸມສໍາມະນາ, ທ່ານ ຫງວຽນດຶກມິງ ອັກຄະລັດຖະທູດ ຫວຽດນາມ ປະຈຳ ຍີ່ປຸ່ນ ໄດ້ເນັ້ນໜັກເຖິງຄວາມສຳຄັນ ແລະ ປະສິດທິຜົນຂອງການຮ່ວມມືເສດຖະກິດ ຫວຽດນາມ - ຍີ່ປຸ່ນ, ພ້ອມທັງຕີລາຄາສູງການປະກອບສ່ວນຢ່າງໃຫຍ່ຫຼວງຂອງບັນດານັກລົງທຶນ ຍີ່ປຸ່ນ ໃຫ້ແກ່ພາລະກິດພັດທະນາຂອງ ຫວຽດນາມ. ທ່ານ ຫງວຽນດຶກມິງ ກໍໄດ້ຍົກອອກບັນດາຂະແໜງ, ຂົງເຂດ ທີ່ ຫວຽດນາມ ມີຄວາມບົ່ມຊ້ອນ ແລະ ຍີ່ປຸ່ນ ມີທ່າແຮງຄື: ວິທະຍາສາດ, ເຕັກໂນໂລຢີ, ນະວັດຕະກຳ, ຊີ້ນສ່ວນເຄື່ອງເອເລັກໂຕນິກ…. ເຊິ່ງເປັນໂອກາດຮ່ວມມືຍືນຍົງລະຫວ່າງສອງປະເທດໃນໄລຍະຈະມາເຖິງ.
ໃນກອງປະຊຸມສຳມະນາ, ທ່ານ Imano Hiroshi, ຮອງປະທານບໍລິສັດ THK, ເຊິ່ງເປັນວິສາຫະກິດແຖວໜ້າໃນຂົງເຂດຜະລິດບັນດາຊີ້ນສ່ວນເຄື່ອງກົນຈັກວັດແທກຄວາມຊັດເຈນຂອງ ຍີ່ປຸ່ນ ໃຫ້ຮູ້ວ່າ:
“ປັດໄຈທຳອິດດຶງດູດບັນດາວິສາຫະກິດຕ່າງປະເທດແມ່ນເລື່ອງ ຫວຽດນາມ ມີກຳລັງພັດທະນາຢ່າງໃຫຍ່ຫຼວງ. ແຕ່ 10 ປີກ່ອນ, ເມື່ອພວກຂ້າພະເຈົ້າເລີ່ມລົງທຶນເຂົ້າ ຫວຽດນາມ, ພວກຂ້າພະເຈົ້າກໍຄ່ອຍໆເຫັນໄດ້ກຳລັງດຶງດູດຂອງ ຫວຽດນາມ. ພິເສດ, ໃນຊຸມປີມໍ່ໆມານີ້, ມີຫຼາຍວິສາຫະກິດຈາກ ຈີນ, ສ.ເກົາຫຼີ, ຍີປຸ່ນ… ໄດ້ລົງທຶນເຂົ້າ ຮ່າໂນ້ຍ ເປັນຈຳນວນຫຼາຍ. ຖ້າເວົ້າກ່ຽວກັບກຳລັງບົ່ມຊ້ອນພັດທະນາ, ຫວຽດນາມ ມີທ່າໄດ້ປຽບໃຫຍ່ກວ່າຫຼາຍ ເມື່ອທຽບໃສ່ບັນດາປະເທດໃນພາກພື້ນ. ດັ່ງນັ້ນ, ພວກຂ້າພະເຈົ້າໄດ້ຕັດສິນໃຈຈະລົງທຶນເຂົ້າໂຄງການນີ້ຕໍ່”.
ນັກຂ່າວ VOV ປະຈຳ ຍີ່ປຸ່ນ