 ທ່ານຮອງນາຍົກລັດຖະມົນຕີ ຫວຽດນາມ ເວືອງດິ່ງເຫວ້ ທີ່ກອງປະຊຸມ (ພາບ: baodautu.vn) |
ຕອນບ່າຍວັນທີ 14 ກຸມພາ ຢູ່ແຂວງບິ່ງເຢືອງ ຂອງຫວຽດນາມ, ກະຊວງແຜນການ ແລະ ການລົງທຶນຫວຽດນາມ ສົມທົບກັບ ຄະນະກໍາມະການແຂວງບິ່ງເຢືອງ ຈັດຕັ້ງ “ກອງປະຊຸມປຶກສາຫາລືການກໍານົດທິດສ້າງລະບອບລະບຽບການກ່ຽວກັບການລົງທຶນຕ່າງປະເທດໃນສະພາບການໃໝ່”. ທີ່ກອງປະຊຸມ, ບັນດາຜູ້ແທນໄດ້ສຸມໃສ່ຕີລາຄາ, ຮັບຮູ້ບັນດາຜົນສໍາເລັດໃນເບື້ອງຕົ້ນຂອງຫວຽດນາມ ໃນຮອບເວລາ 30 ປີ ແຫ່ງການປະຕິບັດການດຶງດູດ ແລະ ນໍາໃຊ້ເງິນລົງທຶນຈາກຕ່າງປະເທດ; ປະສິດທິຜົນກ່ຽວກັບລະບອບລະບຽບການ, ນະໂຍບາຍໃນການປະຕິບັດຂອງບັນດາກະຊວງ, ຂະແໜງການ, ທ້ອງຖິ່ນ... ພ້ອມທັງ ຍົກອອກບັນດາຂໍ້ຄົງຄ້າງ, ຂໍ້ຈໍາກັດ ແລະ ທິດທາງການແກ້ໄຂໃນໄລຍະຈະມາເຖິງ, ໂດຍສະເພາະແມ່ນປັງປຸງ, ສ້າງກົດໝາຍວ່່າດ້ວຍການລົງທຶນ ແລະ ກົດໝາຍວ່າດ້ວຍວິສາຫະກິດ ໃຫ້ສົມບູນແບບ ເພື່ອສືບຕໍ່ດຶງດູດແຫຼ່ງເງິນລົງທຶນຈາກຕ່າງປະເທດ.
ກ່າວຄໍາເຫັນທີ່ກອງປະຊຸມ, ທ່ານຮອງນາຍົກລັດຖະມົນຕີຫວຽດນາມ ເວືອງດິ່ງເຫວ້ ຖືວ່າ ເລື່ອງປະກອບຄໍາຄິດຄໍາເຫັນຂອງບັນດາກະຊວງ, ຂະແໜງການ, ທ້ອງຖິ່ນຕ່າງໆ, ໂດຍສະເພາະແມ່ນສະຫະສະມາຄົມວິສາຫະກິດຂອງ ຍີ່ປຸ່ນ, ສ.ເກົາຫຼີ ... ຈະຊ່ວຍລັດຖະບານສ້າງສໍາເລັດລະບົບ, ລະບອບລະບຽບການ ແລະ ນະໂຍບາຍໃນເລື່ອງດຶງດູດ ແລະ ນໍາໃຊ້ເງິນລົງທຶນຈາກຕ່າງປະເທດ ໃນຍຸດທະສາດພັດທະນາເສດຖະກິດ - ສັງຄົມ ຮອດປີ 2030 ແລະ ວິໄສທັດ ຮອດປີ 2045.