ພາບປະກອບ:  wikimedia commons

ວັນທີ 13 ພະຈິກ, ບັນດາເຈົ້າໜ້າທີ່ ອາເມລິກາ ໄດ້ແນະນຳແຜນການທີ່ກ້າຫານ ເພື່ອແນໃສ່ເພີ່ມທົບ 3 ເທົ່າສະມັດຕະພາບພະລັງງານນິວເຄຼຍນີ້ຮອດປີ 2050, ດ້ວຍຄວາມຫວັງແຜນການນີ້ອາດສາມາດໄດ້ຮັບການຮັກສາໃນທຸກອຳນາດການປົກຄອງ, ນັບແຕ່ພາຍໃຕ້ການຊີ້ນຳນຳພາຂອງ ທ່ານ ປະທານາທິບໍດີຄົນໃໝ່ Donald Trump. ທຳນຽບຂາວ ໄດ້ປະກາດແຜນການຊຸກຍູ້ພະລັງງານນິວເຄຼຍໃໝ່, ປະຕິບັດຄຳໝັ້ນສັນຍາທີ່ໄດ້ຍົກອອກມາໃນປີ 2023. ນີ້ໄດ້ຮັບຖືວ່າແມ່ນໜຶ່ງໃນບັນດາຄວາມມານະພະຍາຍາມສຸດທ້າຍຂອງທ່ານປະທານາທິບໍດີ Joe Biden ເພື່ອຜັນຂະຫຍາຍນະໂຍບາຍຫັນປ່ຽນພະລັງງານກ່ອນທີ່ຈະສິ້ນສຸດອາຍຸການການປະຕິບັດໜ້າທີ່ໃນຕົ້ນປີ 2025. ເລື່ອງທ່ານ Trump ໄດ້ຮັບການເລືອກຕັ້ງດຳລົງຕຳແໜ່ງປະທານາທາບໍດີ ຄົນໃໝ່ ດ້ວຍບັນດາທັດສະນະທີ່ສົງໄສກ່ຽວກັບການປ່ຽນແປງຂອງດິນຟ້າອາກາດ ແລະ ບັນດາການຖະແຫຼງກ່ຽວກັບການຖອນອາເມລິກາ ອອກຈາກສົນທິສັນຍາ ປາຣີ ກ່ຽວກັບການປ່ຽນແປງຂອງດິນຟ້າອາກາດ ໄດ້ກໍ່ຄວາມສັບສົນປົນເປໃນການເຈລະຈາຕ່າງໆຢູ່ກອງປະຊຸມຄັ້ງທີ 29 ຂອງບັນດາຝ່າຍເຂົ້າຮ່ວມກອບສົນທິສັນຍາຂອງ ສປຊ ກ່ຽວກັບການປ່ຽນແປງຂອງດິນຟ້າອາກາດ (COP 29) ທີ່ພວມດຳເນີນຢູ່ ອາແຊັກໄບຊານ. ເຖິງຢ່າງໃດກໍຕາມ, ບັນດາເຈົ້າໜ້າທີ່ ອາເມລິກາ ທີ່ເຂົ້າຮ່ວມກອງປະຊຸມຢູ່ Baku ກໍ່ໄດ້ຊອກຫາວິທີການເຮັດໃຫ້ບັນດາຄູ່ຮ່ວມມືສາກົນອຸ່ນອ່ຽນໃຈວ່າ ນະໂຍບາຍກ່ຽວກັບດິນຟ້າອາກາດຂອງ ອາເມລິກາຈະບໍ່ຖືກຂາດວັກຂາດຕອນ.