ប្រធានាធិបតីបារាំងលោក Emmanuel Macron បាននិយាយថា អាចជំរុញជំនួប ចរចារវាងរុស្ស៊ីនិងអ៊ុយក្រែនក៏ដូចជា “ដំណោះស្រាយដ៏ជាក់ស្ដែងនិងពិតប្រាកដ” សំដៅ បញ្ចុះកំដៅភាពតានតឹងរវាងរដ្ឋអំណាចម៉ូស្គូនិងលោកខាងលិច។ សេចក្ដីប្រកាសខាង លើត្រូវបានលោក Macron ធ្វើឡើងនៅក្នុងសន្និសីទសារព័ត៌មានកាលពីថ្ងៃទី៨ ខែកុម្ភៈ បន្ទាប់ពីជំនួបចរចាជាមួយប្រធានាធិបតីអ៊ុយក្រែនលោក Volodymyr Zelensky នៅ ទីក្រុងគៀវ។

ប្រធានាធិបតីបារាំងលោក Emmanuel Macron ជួបជាមួយប្រធានាធិបតីអ៊ុយក្រែន លោក Volodymyr Zelensky នៅទីក្រុងគៀវកាលពីថ្ងៃទី៨ កុម្ភៈ។ (រូបថត៖ AFP/TTXVN)

លោកប្រធានាធិបតី Macron បានវាយតម្លៃថា ជំនួបរវាងលោកនិងសមភាគី អ៊ុយក្រែនលោក Zelensky និងជំនួបជាមួយលោកប្រធានាធិបតីរុស្ស៊ី Vladimir Putin កាលពីមួយថ្ងៃមុននោះ បានបង្កើតឡើងវឌ្ឍនភាពក្នុងកិច្ចខិតខំប្រឹងប្រែងធ្វើឲ្យមាន ស្ថិរភាពក្នុងតំបន់ ទោះបីជាលោកក៏បាននិយាយផងដែរថា កិច្ចខិតខំប្រឹងប្រែងនេះ នឹងចំណាយពេលជាច្រើនខែទៀត។ លោកប្រធានាធិបតី Macron មានប្រសាសន៍ថា ថ្នាក់ដឹកនាំរុស្ស៊ីនិងអ៊ុយក្រែនសុទ្ធតែគោរពកិច្ចព្រមព្រៀងក្រុង Minsk ក្នុងការដោះស្រាយ ភាពតានតឹងនាបច្ចុប្បន្ន។ លោកក៏បានឲ្យដឹងថែមទៀតថា ក្នុងជំនួបនៅទីក្រុងម៉ូស្គូ កាលពីថ្ងៃទី៧ ខែកុម្ភៈ លោកប្រធានាធិបតី Putin បានបញ្ជាក់ថា មិនឈរនៅពីក្រោយ សកម្មភាពណាមួយដែលបណ្ដាលឲ្យភាពតានតឹងកើនឡើងនៅក្នុងតំបន់នោះឡើយ។

នៅសន្និសីទសារព័ត៌មាននេះដែរ ប្រធានាធិបតីអ៊ុយក្រែនលោក Volodymyr Zelenskiy បានសម្ដែងក្ដីសង្ឃឹមពីការរៀបចំកិច្ចប្រជុំកំពូលមួយក្នុងពេលឆាប់ៗជាមួយ ថ្នាក់ដឹកនាំរបស់រុស្ស៊ី បារាំងនិងអាល្លឺម៉ង់នៅក្នុងក្របខ័ណ្ឌក្រុមប្រទេសទាំង៤ Normandy។

នាថ្ងៃដដែល លោកប្រធានាធិបតីបារាំង Emmanuel Macron បានទៅកាន់ អាល្លឺម៉ង់ហើយមានជំនួបជាមួយលោកអធិការបតី Olaf Scholz និងលោកប្រធានាធិបតី ប៉ូឡួញ Andrzej Duda។ តាមលោក Macron ថា អឺរ៉ុបចាំបាច់ត្រូវរួមគ្នាស្វែងរកមាគ៌ានិង វិធានការដើម្បីរៀបចំជំនួបសន្ទនាដ៏ចាំបាច់និងសំខាន់ជាមួយរុស្ស៊ី ជាពិសេសគឺជំនួប ចតុភាគីនៃក្រុម Normandy ឬនៅក្នុងក្របខ័ណ្ឌអង្គការសន្តិសុខនិងកិច្ចសហប្រតិបត្តិ ការអឺរ៉ុប (OSCE) ដើម្បីរក្សាសន្តិភាពនិងស្ថិរភាពនៃអឺរ៉ុប។ ក្នុងពេលជាមួយគ្នានោះ អធិការបតីអាល្លឺម៉ង់លោក Olaf Scholz ក៏បានចាត់ទុកថា ការរក្សាសន្តិភាពគួរតែត្រូវ បានអនុវត្តន៍តាមផ្លូវការទូតនិងសារដ៏ច្បាស់លាស់ក៏ដូចជាការប្ដេជ្ញាចិត្តធ្វើសកម្មភាព រួមគ្នាផងដែរ៕