 រដ្ឋអ៊ីស្រាអែលបានគ្រប់គ្រង Golan Heights កាលពីឆ្នាំ១៩៦៧ សំដៅការពារខ្លួនពីការគំរាមកំហែងពីខាងក្រៅ (រូបថត៖ VOV) |
នាថ្ងៃទី ២៥ ខែមិនា មុនពេលចាប់ផ្ដើមជំនួបជាមួយនាយករដ្ឋមន្រ្តីអ៊ីស្រាអែល លោក Benjamin Netanyahu នៅសេតវិមាននោះ ប្រធានាធិបតីអាមេរិក លោក Donald Trump បានចុះហត្ថលេខាលើក្រឹត្យមួយ ដោយទទួលស្គាល់អធិបតេយ្យភាពរបស់អ៊ីស្រាអែលចំពោះ Golan Heights។ ក្រឹត្យនេះបានអនុវត្តន៍ជាក់ស្ដែងសេចក្ដីប្រកាសរបស់ លោក Donald Trump កាលពីថ្ងៃទី ២១ ខែមិនា ដោយទទួលស្គាល់យ៉ាងពេញលេញនូវអធិបតេយ្យភាពរបស់អ៊ីស្រាអែលចំពោះ Golan Heights។
ថ្លែងនៅក្នុងសន្និសីទសារព័ត៌មានរួមនៅសេតវិមានជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu នោះ ប្រធានាធិបតីអាមេរិកលោក Donald Trump បានឲ្យដឹងថា៖
“ខ្ញុំនឹងចុះហត្ថលេខាលើក្រឹត្យមួយដោយទទួលស្គាល់ អធិបតេយ្យភាពរបស់ អ៊ីសាអែលចំពោះGolan Heights។ រដ្ឋអ៊ីស្រាអែលបានគ្រប់គ្រង Golan Heights កាលពីឆ្នាំ១៩៦៧ សំដៅការពារខ្លួនពីការគំរាមកំហែងពីខាងក្រៅ។ នាបច្ចុប្បន្ននេះ រាល់សកម្មភាពបង្ករឿងហេតុរបស់អ៊ីរ៉ង់ និងក្រុមភេរវករនានាបានប្រែក្លាយ Golan Heights ទៅជាកន្លែងបំផុសការវាយប្រហារប្រឆាំងនឹងអ៊ីស្រាអែល។ រាល់ការព្រមព្រៀងសន្តិភាពនាពេលខាងមុខនៅតំនប់នេះនឹងត្រូវពិចារណាអំពី
តម្រូវការស្វ័យការពាររបស់អ៊ីស្រាអែល ចំពោះ ស៊ីរីនិងការគំរាមកំហែងផ្សេងៗទៀតក្នុងតំបន់។ នៅក្រោមរដ្ឋអំណាចរបស់ខ្ញុំ ទំនាក់ទំនងសម្ព័ន្ធភាពដ៏រឹងមាំរវាងអាមេរិក និងអ៊ីស្រាអែលគឺកាន់តែខ្លាំងក្លាថែមទៀត”។
ប្រតិកម្មចំពោះការដែលអាមេរិកទទួលស្គាល់អធិបតេយ្យភាពរបស់អ៊ីស្រាអែលចំពោះ Golan Heightsនោះ អ្នកនាំពាក្យរបស់លោក អគ្គលេខាធិការអង្គការសហប្រជាជាតិ Antonio Guterres បានឲ្យដឹងថា៖"គោលនយោបាយរបស់អង្គការសហប្រជាជាតិអំពី Golan Heights ត្រូវបានចែងក្នុងសេចក្ដីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ ហើយគោលនយោបាយទាំងនេះមិនផ្លាស់ប្តូរឡើយ។
ស៊ីរីនិងបណ្តាប្រទេសអារ៉ាប់បានថ្កោលទោសយ៉ាងខ្លាំងក្លា ដោយចាត់ទុកថា នេះគឺជាការរំលោភបំពានលើច្បាប់អន្តរជាតិ ហើយសកម្មភាពបង្ករឿងហេតុនេះបាន ធ្វើឱ្យអស្ថិរភាពនៅមជ្ឈឹមបូព៌ា។ ក្រសួងការបរទេសស៊ីរីបានប្រកាសថាការសម្រេចរបស់ប្រធានាធិបតីអាមេរិក អំពីអធិបតេយ្យភាពរបស់អ៊ីស្រាអែលចំពោះ Golan Heights បានរំលោភបំពានទាំងកំរោលលើអធិបតេយ្យភាព និងការបូរណភាពដែនដីរបស់អ៊ីស្រាអែល។ ការសម្រេចនេះគឺជាទង្វើបង្ករឿងហេតុចំពោះបណ្ដាប្រទេស អារ៉ាប់។ ប្រជាជនស៊ីរីនៅគ្រប់ទីកន្លែងបានដើរតាមដងវិថីធ្វើបាតុកម្មថ្កោលទោសប្រធានាធិបតីអាមេរិក លោក Donald Trump ហើយអំពាវនាវដល់សហគមន៍អន្តរជាតិនិងក្រុមប្រឹក្សាសន្តិសុខចេញសេចក្ដី
សម្រេចរាំងខ្ទប់សកម្មភាពទាំងនេះរបស់អាមេរិក។
នាថ្ងៃដដែល សម្ព័ន្ធអារ៉ាប់ (AL) និង ប្រធានគណៈកម្មការឌូម៉ាជាតិ (សភាជាន់ទាបរុស្ស៊ី) ទទួលបន្ទុកបញ្ហាអន្តរជាតិ លោក Leonid Slutsky ក៏បានថ្កោលទោសយ៉ាងខ្លាំងក្លាចំពោះការសម្រេចពោលខាងលើរបស់ប្រធានាធិបតីអាមេរិក លោក Donald Trump ផងដែរ៕