នាយករដ្ឋមន្ត្រីវៀតណាម លោក Pham Minh Chinh ទទួលជួបជាមួយប្រធានរដ្ឋសភានៃសាធារណរដ្ឋ កូតឌីវ័រលោក Adama Bictogo។ (រូបថត៖ VGP)

នារសៀលថ្ងៃទី ១៤ មិថុនា នៅទីស្នាក់ការរដ្ឋាភិបាល នាយករដ្ឋមន្ត្រីវៀតណាម លោក Pham Minh Chinh បានទទួលជួបជាមួយប្រធានរដ្ឋសភានៃសាធារណរដ្ឋ កូតឌីវ័រលោក Adama Bictogo ដែលកំពុងអញ្ជើញបំពេញទស្សនកិច្ចជាផ្លូវការនៅ វៀតណាម តបតាមការអញ្ជើញរបស់ប្រធានរដ្ឋសភាលោក Vuong Dinh Hue។

នៅក្នុងជំនួបនេះ លោកនាយករដ្ឋមន្ត្រី Pham Minh Chinh បានអះអាងថា វៀត ណាមជានិច្ចកាលយកចិត្តទុកដាក់ដល់ការជំរុញទំនាក់ទំនងសហប្រតិបត្តិការមិត្តភាពជាមួយកូតឌីវ័រ ដោយចាត់ទុកកូតឌីវ័រជាដៃគូសំខាន់មួយរបស់វៀតណាមនៅអាហ្វ្រិក។ រីឯខ្លួនវិញ ប្រធានរដ្ឋសភា
កូតឌីវ័រ លោក Adama Bictogo ក៏បានអះអាងដែរថា កូតឌីវ័រ ចាត់ទុកវៀតណាមជាដៃគូសំខាន់មួយនៅអាស៊ីអាគ្នេយ៍ ហើយមានបំណងចង់ពង្រឹង កិច្ចសហប្រតិបត្តិការជាមួយវៀតណាម ដើម្បីពង្រីកសក្តានុពលដ៏ធំធេងរវាងប្រទេសទាំងពីរ។

មេដឹកនាំទាំងពីរបានឯកភាពលើវិធានការនានាដើម្បីនាំទំនាក់ទំនងទ្វេភាគីឱ្យ កាន់តែស៊ីជម្រៅថែមទៀត ក្នុងនោះសង្កត់ធ្ងន់លើសារៈសំខាន់នៃការបង្កើនសកម្មភាព ផ្លាស់ប្តូរគណៈ
ប្រតិភូ សំដៅបង្កើនទំនុកចិត្តផ្នែកនយោបាយ បង្កើតមូលដ្ឋានគ្រឹះដ៏ រឹងមាំសម្រាប់ជំរុញកិច្ចសហប្រតិបត្តិការលើគ្រប់វិស័យ ជាពិសេសសេដ្ឋកិច្ច; ប្តេជ្ញាបង្កើនទំហំពាណិជ្ជកម្មទ្វេភាគីបន្ថែមទៀត ព្រមទាំង បង្កើតលក្ខខណ្ឌអំណោយផល សម្រាប់ការពង្រីកទីផ្សារនៅក្នុងប្រទេសនីមួយៗ ក៏ដូចជានៅអាហ្វ្រិក និងអាស៊ី ផងដែរ។ ប្រធានរដ្ឋសភាកូតឌីវ័របានសន្យាថា នឹងពង្រីកតួនាទីរបស់ស្ថាប័ននីតិប្បញ្ញត្តិ ដើម្បីគាំទ្រ និងជួយសម្រួលដល់ការជំរុញកិច្ចសហប្រតិបត្តិការរវាងរដ្ឋាភិបាលទាំងពីរ; មានបំណងថា វៀតណាមនឹងចែករំលែកបទពិសោធន៍ក្នុងការអភិវឌ្ឍន៍; ស្នើឲ្យពង្រឹងកិច្ចសហប្រតិបត្តិការកសិកម្មជាមួយវៀតណាមដើម្បីរួមចំណែកធានាសន្តិសុខស្បៀង អាហារប្រកបដោយចីរភាពសម្រាប់កូតឌីវ័រ។

ប្រធានរដ្ឋសភាកូតឌីវ័រ លោក Adama Bictogo បានស្នើឲ្យសហគ្រាសវៀតណាមបង្កើនការវិនិយោគ និងផលិតកម្មនៅ កូតឌីវ័រ; ត្រៀមខ្លួនជាស្រេចដើម្បីស្រាវជ្រាវ ជំរុញកិច្ចសហប្រតិបត្តិការលើវិស័យអប់រំ-បណ្តុះបណ្តាល សុខាភិបាល ការជួបប្រាស្រ័យរវាងប្រជាជននិងប្រជាជន៕