គណៈប្រតិភូវិទ្យុសម្លេងវៀតណាម (VOV) បានចូលរួមមហាសន្និបាត ABU លើកទី៦១ លោកស្រី Nguyen Thuy Hoa ប្រធានគណៈកម្មការសហប្រតិបត្តិការអន្តរជាតិ (អង្គុយនៅខាងឆ្វេង) និងអ្នកកាសែត Nguyen Xuan Hung នៃគណៈកម្មការកិច្ចការបរទេស (VOV5) (អាវសអង្គុយនៅកណ្តាល)  (រូបថត៖ VOV)

នាយប់ថ្ងៃទី ២២ ខែតុលា នៅទីក្រុងអ៊ីស្តង់ប៊ុល ប្រទេសទួរគី សហភាពផ្សាយសម្លេង-ទូរទស្សន៍អាស៊ី-ប៉ាស៊ីហ្វិក (ABU) បានរៀបចំពិធីប្រគល់ពានរង្វាន់ ABU ២០២៤ ដែលជាពានរង្វាន់ប្រចាំឆ្នាំរបស់ ABU ដើម្បីលើកតម្កើងដល់ស្នាដៃរវិទ្យុ ទូរទស្សន៍ និងមាតិកាឌីជីថលដ៏ល្អៗ របស់ស្ថានីយ៍សមាជិក ABU ទៅចូលរួមពានរង្វាន់។  ឆ្នាំនេះ វិទ្យុសម្លេង វៀតណាមមានកិត្តិយសក្នុងការឈ្នះពានរង្វាន់ឆ្នើមផ្នែកវិទ្យុ ប្រភេទរាយការណ៍ព័ត៌មាន ជាមួយនឹងស្នាដៃ "ផ្លូវវិលមកផ្ទះ - រឿងរបស់ណា"។

ស្នាដៃដែលផលិតដោយក្រុមអ្នកសារព័ត៌មាន និងអ្នកកែសម្រួលនៃគណៈកម្មការកិច្ចការបរទេសនៃវិទ្យុសម្លេងវៀតណាម បានវ៉ាដាច់ស្នាដៃចូលរួមជាច្រើនទៀត ដើម្បីឈ្នះពានរង្វាន់ឆ្នើមប្រភេទវិទ្យុ ជាប្រភេទរបាយការណ៍ព័ត៌មាន។ ថ្លែងមតិនៅពេលទទួលរង្វាន់ អ្នកកាសែត Nguyen Xuan Hung តំណាងក្រុមអ្នកនិពន្ធបានមានឲ្យដឹងថា៖ “ខ្ញុំមានសំណាងណាស់ដែលបានឈរជើងនៅទីនេះ ក្នុងទីក្រុងអ៊ីស្តង់ប៊ុលដ៏ស្រស់ស្អាតនេះ តំណាងឱ្យប្រទេសរបស់ខ្ញុំ សហការីរបស់ខ្ញុំនៅវិទ្យុសម្លេងវៀត ណាម ពីព្រោះពួកគេទាំងអស់គ្នា សមនឹងឈរនៅទីនេះនៅថ្ងៃនេះ ដើម្បីទទួលបានកិត្តិយសនេះ។ និយាយអីញ្ចឹងខ្ញុំក៏ចង់ទុកពាក្យសន្យាមួយដែរដែរ គឺឆ្លៀតយកលាភសំណាង ចំណេះដឹងរបស់ខ្ញុំ រួមទាំងអ្វីៗទាំងអស់ដែលខ្ញុំបានរៀនពី ABU និងពីអ្នកទាំងអស់គ្នាដែលមានវត្តមាននៅទីនេះនៅថ្ងៃនេះ ដើម្បីអាចបន្តធ្វើបានល្អថែមទៀត អ្វីដែលខ្ញុំបានធ្វើ និងអាចធ្វើបាន”។

“ផ្លូវវិលមកផ្ទះ - រឿងរបស់ណា” រៀបរាប់អំពីដំណើរទៅជួយសង្គ្រោះខ្លាឃ្មុំមួយក្បាល បន្ទាប់ពីជាប់ឃុំចិញ្ចឹមអស់រយៈពេល ២០ ឆ្នាំ។ នេះជាលទ្ធផលនៃកិច្ចខិតខំប្រឹងប្រែងដោយមិនចេះនឿយហត់របស់ក្រុមវេជ្ជបណ្ឌិតនិងអ្នកជួយសង្គ្រោះ Four Paws International ជាអង្គការអន្តរជាតិដែលការពារសុខុមាលភាពសត្វ។ សត្វខ្លាឃ្មុំដែលបានជួយសង្គ្រោះនីមួយៗត្រូវបានអ្នកជួយសង្គ្រោះដាក់ឈ្មោះមួយ ដែលជានិមិត្តរូបនៃជីវិតថ្មី និងគ្រួសារថ្មី។ ខ្លាឃ្មុំនៅក្នុងរបាយការណ៍នេះ ត្រូវបានគេដាក់ឈ្មោះថា ណា (Na) បន្ទាប់ពីត្រូវបានគ្រូពេទ្យមើលថែរួចមក ណាបានធូរស្រាលខ្លះ ហើយអាចផ្លាស់ទីដោយសេរី និងលេងជាមួយសមាជិកដទៃទៀតនៅកន្លែងអភិរក្ស។

នៅឆ្នាំនេះមានស្នាដៃសរុបចំនួន ៣៤២ ដែលប្រកួតប្រជែងសម្រាប់ពានរង្វាន់ ABU ដែលក្នុងនោះមានស្នាដៃទូរទស្សន៍ចំនួន ១៨២ ស្នាដៃវិទ្យុចំនួន ១១០ និងស្នាដៃឌីជីថលចំនួន ៥០។ នេះក៏ជាឆ្នាំទីមួយដែល ABU បានប្រគល់ពានរង្វាន់សម្រាប់ប្រភេទ Podcast៕