បន្ទាប់ពីពិធីទទួលបដិសណ្ឋារកិច្ចជាផ្លូវការ លោកប្រធានរដ្ឋ លឿង គឿង និងលោកស្រីប្រធានាធិបតី Dina Ercilia Boluarte Zegarra បានមានជំនួបចង្អៀតមួយ ហើយបន្ទាប់មកបានដឹកនាំគណៈប្រតិភូជាន់ខ្ពស់នៃប្រទេសទាំងពីរធ្វើកិច្ចពិភាក្សា។
 ប្រធានាធិបតីប៉េរូ លោកស្រី Dina Ercilia Boluarte Zegarra និងប្រធានរដ្ឋវៀតណាម លោក លឿងគឿង។ រូបថត៖ VOV |
នៅក្នុងកិច្ចពិភាក្សានេះ ថ្នាក់ដឹកនាំទាំងពីររូបបានអះអាងនូវឆន្ទៈរបស់ប្រទេសទាំងពីរក្នុងការអភិវឌ្ឍន៍ទំនាក់ទំនងទ្វេភាគីឡើងដល់កម្ពស់ថ្មីមួយ ហើយបានឯកភាពបន្តផ្តោតលើការជំរុញកិច្ចសហប្រតិបត្តិការលើវិស័យដែលភាគីទាំងពីរមានប្រៀបខ្លាំងដូចជា៖ សេដ្ឋកិច្ច ពាណិជ្ជកម្ម វិនិយោគ រួមទាំងការបើកទូលាយទីផ្សាររបស់គ្នាទៅវិញទៅមកសម្រាប់ផលិតផលកសិកម្ម ធ្វើការចរចាយ៉ាងសកម្ម និងចុះហត្ថលេខាលើឯកសារសហប្រតិបត្តិការទ្វេភាគី សំដៅបំពេញក្របខ័ណ្ឌគតិយុត្តិសម្រាប់ទំនាក់ទំនងរវាងប្រទេសទាំងពីរអភិវឌ្ឍន៍ប្រកបដោយចីរភាព។ មេដឹកនាំទាំងពីរបានឯកភាពបង្កលក្ខណៈងាយស្រួលសម្រាប់សហគមន៍ធុរកិច្ចនៃប្រទេសទាំងពីរ ពង្រឹងការផ្លាស់ប្តូរនិងកិច្ចសហប្រតិបត្តិការអាជីវកម្ម ដើម្បីលើកកម្ពស់ទំហំពាណិជ្ជកម្មទ្វេភាគីឱ្យសមស្របនឹងសក្តានុពលនៃប្រទេសទាំងពីរ; ពង្រឹងការសម្របសម្រួល កិច្ចសហប្រតិបត្តិការ និងគាំទ្រគ្នាទៅវិញទៅមកនៅអង្គការអន្តរជាតិ វេទិកាពហុភាគី និងអន្តរតំបន់ រួមទាំងកិច្ចសហប្រតិបត្តិការរវាងប្រទេសប៉េរូនិងអាស៊ានផងដែរ។
លោកប្រធានរដ្ឋវៀតណាម លឿង គឿង បានសង្កត់ធ្ងន់ថា វៀតណាមយកចិត្តទុកដាក់យ៉ាងខ្លាំងចំពោះតួនាទី និងឋានៈរបស់ប៉េរូ និងមានបំណងចង់ធ្វើឱ្យស៊ីជម្រៅថែមទៀតនូវទំនាក់ទំនងរវាងប្រទេសទាំងពីរនាពេលខាងមុខ។ លោកប្រធានរដ្ឋ លឿង គឿង បានអបអរសាទរប្រទេសប៉េរូ ដែលបានធ្វើជាម្ចាស់ផ្ទះវេទិកាសហប្រតិបត្តិការសេដ្ឋកិច្ចអាស៊ី - ប៉ាស៊ីហ្វិក (APEC)ជាលើកទី៣ ដោយជឿជាក់ថា ជោគជ័យនៃកិច្ចប្រជុំកំពូល APEC នឹងរួមចំណែកដល់ការអភិវឌ្ឍ តភ្ជាប់ និងវិបុលភាពនៅតំបន់អាស៊ី - ប៉ាស៊ីហ្វិក ក៏ដូចជាបន្តលើកកម្ពស់តួនាទីនិងឋានៈរបស់ប៉េរូផងដែរ។ ក្នុងឱកាសនេះ ប្រធានាធិបតីប៉េរូបានសម្តែងគោលបំណងចង់ឲ្យវៀតណាមបើកស្ថាប័នតំណាងការទូតនៅទីក្រុងលីម៉ា នាពេលឆាប់ៗនេះ៕