នាយករដ្ឋមន្ត្រីវៀតណាម លោក Pham Minh Chinh បានទទួលជួបឯកអគ្គរាជទូតកម្ពុជាប្រចាំនៅវៀតណាម លោកស្រី ជា គឹមថា

នៅក្នុងជំនួបជាមួយឯកអគ្គរាជទូតកម្ពុជាប្រចាំនៅវៀតណាម លោកស្រី ជា គឹមថាលោកនាយករដ្ឋមន្ត្រី Pham Minh Chinh បានអបអរសាទរចំពោះលោកស្រី ជា គឹមថា ដែលត្រូវបានតែងតាំងជាឯកអគ្គរាជទូតស្ត្រីដំបូងរបស់កម្ពុជាប្រចាំនៅវៀតណាម។ លោកបានអបអរសាទរកម្ពុជាចំពោះសមិទ្ធិផលដ៏ធំធេងអំពីកិច្ចការផ្ទៃក្នុង និងកិច្ចការបរទេស ដែលកម្ពុជាសម្រេចបានក្នុងរយៈពេលកន្លងទៅ ជាពិសេសគឺទទួលបានជោគជ័យក្នុងតួនាទីជាប្រធានអាស៊ានឆ្នាំ២០២២។ លោកនាយករដ្ឋមន្ត្រីជឿជាក់ថា កម្ពុជានឹងរៀបចំការបោះឆ្នោតសកលនីតិកាលទី ៧ និងការប្រកួតកីឡាអាស៊ីអាគ្នេយ៍លើកទី ៣២ ប្រកបដោយជោគជ័យ។ លោកបានអះអាងថា វៀតណាមត្រៀមខ្លួនជាស្រេចគាំទ្រ និងចែករំលែកបទពិសោធន៍សម្រាប់កម្ពុជារៀបចំព្រឹត្តិការណ៍កីឡាដ៏សំខាន់ក្នុងតំបន់នេះប្រកបដោយជោគជ័យ។

លោកស្រីឯកអគ្គរាជទូត ជា គឹមថា បានថ្លែងអំណរគុណដលជំនួយឧបត្ថម្ភដែលវៀតណាមផ្ដល់ជូនកម្ពុជាក្នុងការប្រយុទ្ធប្រឆាំងជំងឺរាតត្បាតកូវីដ ១៩ និងរៀបចំកិច្ចប្រជុំកំពូលអាស៊ាន ឆ្នាំ ២០២២ ប្រកបដោយជោគជ័យ។ លោកស្រីឯកអគ្គរាជទូតបានថ្លែងអំណរគុណដល់វៀតណាមដែលបានជួយសម្រួលដល់ការរៀបចំពិធីដង្ហែភ្លើងគប់ស៊ីហ្គេមនារយៈពេលកន្លងទៅ ដោយមានការចូលរួមរបស់មនុស្សប្រមាណ ៤០០ នាក់។ លោកស្រីបានសម្ដែងបំណងថា វៀតណាមនឹងបន្តគាំទ្រ និងចែករំលែកបទពិសោធន៍សម្រាប់កម្ពុជា ដើម្បីរៀបចំការប្រកួតកីឡាស៊ីហ្គេមលើកទី ៣២ ប្រកបដោយជោគជ័យនាពេលខាងមុខ។ លោកស្រីបានអះអាងថានឹងខិតខំប្រឹងប្រែងឱ្យអស់ពីសមត្ថភាព ដើម្បីរួមចំណែកលើកកម្ពស់ទំនាក់ទំនងរវាងប្រទេសទាំងពីរឱ្យកាន់តែជិតស្និទ្ធ ប្រកបដោយប្រសិទ្ធភាព រួមចំណែកដល់ការអភិវឌ្ឍន៍ និងវិបុលភាពរួមនៃប្រទេសទាំងពីរ។

នាយករដ្ឋមន្ត្រីវៀតណាម លោក Pham Minh Chinh ទទួលជួបឯកអគ្គរដ្ឋទូតម៉ាឡេស៊ីប្រចាំនៅវៀតណាមលោក Data Tan Yang Thai

ក្នុងជំនួបជាមួយឯកអគ្គរដ្ឋទូតម៉ាឡេស៊ីប្រចាំនៅវៀតណាម លោក Dato Tan Yang Thai នាយករដ្ឋមន្ត្រីលោក Pham Minh Chinh បានអះអាងថា វៀតណាមជានិច្ចកាលយកចិត្តទុកដាក់ចំពោះទំនាក់ទំនងមិត្តភាព និងដៃគូយុទ្ធសាស្ត្រជាមួយម៉ាឡេស៊ី។ លោកមានគោលបំណងថា ក្នុងអាណត្តិរបស់ខ្លួន លោកឯកអគ្គរដ្ឋទូតនឹងជំរុញយ៉ាងសកម្មនូវតួនាទីជាស្ពានដ៏សំខាន់ដើម្បីជំរុញទំនាក់ទំនងនេះឱ្យបន្តអភិវឌ្ឍកាន់តែស៊ីជម្រៅ និងប្រកបដោយប្រសិទ្ធភាពផងដែរ៕