រោងចក្រផលិតគំនរបេតុងរបស់ក្រុមហ៊ុន  GS Vietnam Industry Limited Liability Company (VGSI) នៅមណ្ឌលឧស្សាហកម្មពិសេស Phu My ៣ (រូបភាព៖ Hong Dat/TTXVN)

នាយកដ្ឋានវិនិយោគបរទេស (ក្រសួងផែនការ និងវិនិយោគ) បានឲ្យដឹងថា គិតត្រឹមថ្ងៃទី២០ ខែតុលា ដើមទុនវិនិយោគផ្ទាល់ពីបរទេស (FDI) ដែលបានចុះបញ្ជីសម្រាប់ការចេញថ្មី ការកែតម្រូវ និងវិភាគទានដើមទុន ការទិញភាគហ៊ុន ការទិញមូលធនចូលវៀតណាម សម្រេចបានជាង ២៥,៧៦ពាន់លានដុល្លារអាមេរិក កើនឡើង ១៤,៧% បើប្រៀបនឹងរយៈពេលដូចគ្នាកាលពីឆ្នាំមុន។ ក្នុងចំណោមគម្រោងទាំងនេះ មានគម្រោងថ្មីជាង ២.៦០០ ត្រូវបានផ្តល់វិញ្ញាបនបត្រចុះបញ្ជីការវិនិយោគ ដែលកើនឡើងជាង ៦៦% ធៀបនឹងរយៈពេលដូចគ្នាកាលពីឆ្នាំមុន។

បើនិយាយពីដៃគូវិនិយោគវិញ ក្នុងរយៈពេល ១០ ខែដើមឆ្នាំនេះ មានប្រទេស និងដែនដីចំនួន ១០៨ បានវិនិយោគនៅវៀតណាម។ ក្នុងចំណោមនោះ សិង្ហបុរីនាំមុខក្នុងទុនវិនិយោគសរុបជិត ៤,៦៥ ពាន់លានដុល្លារ។ កូរ៉េខាងត្បូងជាប់ចំណាត់ថ្នាក់លេខ២; ហុងកុង (ចិន) ចំណាត់ថ្នាក់លេខ៣; តាមពីក្រោយគឺចិន ជប៉ុន តៃវ៉ាន់ (ចិន)...។

តាមតំបន់វិនិយោគ អ្នកវិនិយោគបរទេសបានមកបណ្តាក់ទុនក្នុងខេត្តក្រុងចំនួន ៥៥។ ខេត្ត Quang Ninh បានឈានមុខគេក្នុងការទាក់ទាញទុនវិនិយោគជាមួយការចេញគម្រោងវិនិយោគធំថ្មីចំនួន ២ ក្នុងខែតុលា ជាមួយនឹងទុនវិនិយោគចុះបញ្ជីសរុបជាង ៣ ពាន់លានដុល្លារអាមេរិក។ ទីក្រុង Hai Phong ជាប់ចំណាត់ថ្នាក់លេខ២ តាមពីក្រោយគឺទីក្រុងហាណូយ ទីក្រុងហូជីមិញ ខេត្ត Bac Giang...។ គួរឱ្យកត់សម្គាល់គឺគម្រោងវិនិយោគថ្មីៗ នៅតែផ្តោតលើខេត្ត ក្រុងដែលមានគុណសម្បត្តិជាច្រើនក្នុងការទាក់ទាញ FDI (ហេដ្ឋារចនាសម្ព័ន្ធល្អ ធនធានមនុស្សមានស្ថិរភាព កិច្ចខិតខំប្រឹងប្រែងដើម្បីកែទម្រង់បែបបទរដ្ឋបាល និងថាមវន្តក្នុងការជំរុញការវិនិយោគ...) ដូចជា៖ ខេត្ត Quang Ninh ទីក្រុង Hai Phong ទីក្រុងហាណូយ ទីក្រុងហូជីមិញ និងខេត្ត Bac Giang ជាដើម៕