បងប៉ូលីស សួរសុខទុក្ខគ្រួសាររបស់លោក Ro Chom Brong (រូបថត៖ Ngoc Anh)

ឃុំ Ia Bang មានប្រជាជនចំនួន ៧០ នាក់ដែលបានបញ្ចប់ការជាប់ពន្ធនាគារ  ហើយក្នុងចំណោមអ្នកទាំងនោះ ពេលត្រូវបានដោះលែងពីពន្ធនាគារ វិលត្រឡប់ទៅមូលដ្ឋានវិញ ពួកគេបានចូលរួមក្លឹប “មិត្តជួយមិត្ត” ដោយស្ម័គ្រចិត្ត។ នៅពេលដែលទើបត្រូវបានបង្កើតឡើងដំបូង ក្លឹប “មិត្តជួយមិត្ត” មានសមាជិកត្រឹមតែ ២៨ នាក់ប៉ុណ្ណោះ ប៉ុន្តែឥឡូវនេះ មានសមាជិក ៣១ នាក់ហើយ។

នៅក្នុងការប្រជុំជីវភាពប្រចាំខែ កម្មាភិបាល ប៉ូលីសឃុំនិងតំណាងអាជ្ញាធរមូលដ្ឋាន បានធ្វើការឃោសនានិងផ្សព្វផ្សាយគោលនយោបាយនិងច្បាប់របស់រដ្ឋនិងលើកទឹកចិត្តប្រជាជនកុំអោយរំលោភច្បាប់ ជួយគ្នាជំនះការលំបាកដើម្បីជីវភាពរស់នៅប្រចាំថ្ងៃ  ក៏ដូចជា ស្តាប់គំនិតនិងសេចក្តីប្រាថ្នារបស់សមាជិក ដើម្បីដោះស្រាយការលំបាកនិងស្ថេរភាពជីវភាពរស់នៅ។ វរសេនីយ៏ ឯក លោក  Hoang Van Huan អនុប្រធាននគរបាលស្រុក Dak Doa បានឲ្យដឹងថា៖ “ប៉ូលីសនៅស្រុក Dak Do បានប្រមូលអ្នកដែលធ្លាប់ដើរតាមផ្លូវខុស ដើម្បីចូលរួមក្នុងក្លឹប “មិត្តជួយមិត្ត” ក្នុងគោលបំណងផ្លាស់ប្តូរបទពិសោធន៍អាជីវកម្មនាំមកនូវជីវភាពកាន់តែប្រសើរឡើង។ បច្ចុប្បន្ន ក្លឹបបានជួយឲ្យសមាជិកចំនួន ២៥ នាក់ឱ្យខ្ចីប្រាក់ពីធនាគារសម្រាប់ការអភិវឌ្ឍសេដ្ឋកិច្ចដោយមានប្រាក់កម្ចីចំនួន ៤៥០ លានដុង ហើយទន្ទឹមនឹងនេះ ជួយឲ្យសមាជិកដទៃទៀតស្វែងរកការងារធ្វើនិងចិញ្ចឹមសត្វ។ ប៉ូលីសស្រុក Dak Doa ក៏ធ្វើការជាមួយអង្គភាពអាជីវកម្មនៅតំបន់នោះដើម្បីដាក់ពាក្យសុំការងារសម្រាប់ពួកគេដែរ ដោយដោះស្រាយការងារប្រកបដោយចីរភាពសម្រាប់សមាជិកមួយចំនួន។ ចំពោះអ្នកដែលចង់រកការងារធ្វើនៅក្រៅខេត្ត Gia Lai យើងក៏បង្កើតលក្ខខណ្ឌល្អបំផុតអំពីបែបបទឯកសារ។  ឧទាហរណ៍លុបចោលកំណត់ត្រាព្រហ្មទណ្ឌសម្រាប់អ្នកទោសដើម្បីឱ្យអ្នកមានកំណត់ត្រាល្អ ធ្វើឲ្យអាជីវកម្មមានការជឿជាក់ នៅពេលជ្រើសរើសអ្នកចូលធ្វើការ”។

លោក Tran Chau Ho កំពុងបំពេញបែបបទខ្ចីប្រាក់កម្ចីពីធនាគារគោលនយោបាយសង្គមនៃស្រុក Dak Doa (រូបថត៖ Ngoc Anh)

លោក Ro Chom Brong ជនជាតិ Jrai  នៅភូមិ O Dat ឃុំ Ia Bang ដែលត្រូវបានកាត់ទោសឱ្យជាប់ពន្ធនាគាររយៈពេល ៩ ឆ្នាំពីបទឆ្លងដែនខុសច្បាប់ នៅពេលគាត់វិលត្រឡប់មកស្រុកកំណើតវិញ លោកបានចូលរួមជាមួយក្លឹប “មិត្តជួយមិត្ត” ចាប់តាំងពីថ្ងៃដំបូងដែលក្លឹបត្រូវបានបង្កើត។ លោក Ro Chom Brong បានចែករំលែកថា៖ “កាលពីមុន ពេលខ្ញុំរំលោភច្បាប់ខ្ញុំត្រូវបានរដ្ឋស្តារនីតិសម្បទាឡើងវិញ។ ពេលខ្ញុំវិលត្រឡប់មកផ្ទះវិញ ខ្ញុំបានចូលក្នុងក្លឹបមិត្តជួយមិត្តបានជិតមួយឆ្នាំហើយ។ រដ្ឋជួយយើងសាងសង់ផ្ទះថ្មី និងឲ្យគោមួយក្បាលសម្រាប់ប្រកបរបររកស៊ី។ បច្ចុប្បន្នផ្ទះខ្ញុំកំពុងដាំកាហ្វេចំនួន ៨ អារ និងដើមម្រេចចំនួន ៣០ ដើម។ ពីមុនលំបាកមែន ប៉ុន្តែឥឡូវខ្ញុំសប្បាយចិត្តណាស់ រកលុយបានគ្រប់គ្រាន់។ កាលពីឆ្នាំមុន ប្រាក់ចំណូលមានចំនួន ២៧ លានដុង”។

យ៉ាងណាមិញ អាជ្ញាធរមូលដ្ឋានតែងតែចុះសួរសុខទុក្ខលើកទឹកចិត្តនិងយកចិត្តទុកដាក់ចំពោះអ្នកដែលធ្លាប់ដើរតាមផ្លូវខុសដូចរូបលោក Ro Chom Brong ហើយបានបន្ទន់ចិត្តេពួកគេ។ លោកអនុសេនីយ៍ឯក Le The Nong នាយរងប៉ុស្តិ៍នគរបាលឃុំ Ia Bang បានឲ្យដឹងថា៖ “លោក Brong បានវិលត្រឡប់មកមូលដ្ឋានវិញក្នុងឆ្នាំ ២០១៧។ ចាប់តាំងពីវិលត្រឡប់មកមូលដ្ឋានវិញ លោកបានផ្តោតទៅលើការរកស៊ី នឹងនរចិត្តមើលថែរក្សាជីវភាពគ្រួសារ។ លោកក៏ជួយដល់ប៉ូលីសឃុំដើម្បីធានាសណ្តាប់ធ្នាប់និងសន្តិសុខនៅក្នុងតំបន់។ នៅក្នុងភូមិដែលមានក្រុមយុវជនអុកឡុក ចោលលួច ដែលរំខានដល់អ្នកភូមិ លោកបានផ្លាស់ប្តូរព័ត៌មានហើយរាយការណ៍ទៅប៉ូលីស។ លោក Brong ត្រូវបានផ្តល់ប្រាក់កម្ចីពីធនាគារគោលនយោបាយនៃស្រុក Dak Doa មុនពេលចូលរួមជាមួយក្លឹប “មិត្តជួយមិត្ត”។ ក្លឹបនេះចង់អោយអ្នកដែលធ្លាប់ដើរតាមផ្លូវខុស ផ្សាភ្ជាប់ជាមួយគ្នា បង្កើតការងារធ្វើសម្រាប់ជួយគ្នាទៅវិញទៅមក។ ឧទាហរណ៍ អ្នកដែលដាំដើមកាហ្វេច្រើនរហូតដល់រដូវប្រមូលផល គាត់បានហៅអ្នកផ្សេងឱ្យមកជួយធ្វើការវិញ”។

ក្លឹប “មិត្តជួយមិត្ត” គ្រោងនឹងសម្របសម្រួលជាមួយមជ្ឈមណ្ឌលណែនាំការងារខេត្ត Gia Lai ដើម្បីបណ្តុះបណ្តាលនិងបង្រៀនវិជ្ជាជីវៈសម្រាប់សមាជិកក្លឹបនិងសាច់ញាតិរបស់ពួកគេ។ ធនាគារគោលនយោបាយសង្គមនៃស្រុក Dak Doa បានជួយសមាជិកក្លឹប “មិត្តជួយមិត្ត” ខ្ចីដើមទុនដើម្បីវិនិយោគក្នុងផលិតកម្មនិងអាជីវកម្ម។ ដោយហេតុនេះ សមាជិកទាំងអស់ក្នុងក្លឹបមានជីវភាពរស់នៅស្ថិរភាព។ លោក Tran Thanh Ho អ្នកភូមិ ៥ ឃុំ Ia Bang គឺជាឧទាហរណ៍នៅពេលលោកបានចូលរួមក្នុងក្លឹប “មិត្តជួយមិត្ត” ពីរបីខែប៉ុណ្ណោះ។

“កាលពីមុន ខ្ញុំបានរំលោភច្បាប់ ប្លន់ទ្រព្យសម្បត្តិនិងបានទទួលការអប់រំឡើងវិញនៅពន្ធនាគារ Gia Trung អស់រយៈពេល ៤ ឆ្នាំហើយ។ វិលត្រឡប់មកមូលដ្ឋានវិញ ប៉ូលីសឃុំបានណែនាំឲ្យខ្ញុំស្គាល់ពីក្លឹប “មិត្តជួយមិត្ត”។ ដោយបងប៉ូលីសបានណែនាំខ្ញុំទើបបានដឹងថា ធនាគារគោលនយោបាយសង្គមកំពុងជួយប្រាក់កម្ចី។ ខ្ញុំបានខ្ចីប្រាក់ ៥០ លានដុង ហើយធនាគារគាំទ្រអត្រាការប្រាក់ទាបបំផុតគឺ ០,៦%/ឆ្នាំ។ ជាមួយនឹងប្រាក់កម្ចី ៥០ លានដុង ខ្ញុំបានទិញឡានដឹកទំនិញ និងមាស៊ីនភ្ជួរដីដើម្បីដឹកដំឡូងនិងធ្វើស្រែ។ គំរូក្លឹបមិត្តជួយមិត្តល្អណាស់។ យើងត្រូវបានផ្តល់ឱកាសឱ្យជួយនិងរៀនសូត្រពីគ្នាទៅវិញទៅមក យើងពិតជាត្រេកអរណាស់”។ នេះបើយោងតាមលោក Tran Thanh Ho។

ចាប់តាំងពីការបង្កើតក្លឹប “មិត្តជួយមិត្ត” មក គ្មាននរណាម្នាក់រំលោភច្បាប់ម្តងទៀតឡើយ។ សមាជិកក្លឹបក៏ជាអ្នកឃោសនាដែលប្រមូលផ្តុំប្រជាជនក្នុងមូលដ្ឋានយ៉ាងសកម្មដើម្បីគោរពគោលការណ៍ណែនាំនិងគោលនយោបាយរបស់រដ្ឋខិតខំធ្វើការនិងកែជីវភាពរស់នៅផងដែរ។

គំរូនៃក្លឹប “មិត្តជួយមិត្ត” ក្នុងឃុំ Ia Bang គឺជាទីបង្អែកដ៏រឹងមាំដើម្បីជួយអ្នកដែលធ្លាប់ដើរតាមផ្លូវខុស បានវិលត្រឡប់ទៅរកផ្លូវល្អវិញ។  ពីប្រសិទ្ធភាពនៃគំរូនេះ ស្រុក Dak Doa គ្រោងនឹងបង្កើតក្លឹប “មិត្តជួយមិត្ត” ចំនួន ២ បន្ថែមទៀតនៅឃុំផ្សេងៗផងដែរ៕