គំរូសត្វនាគមួយគូនៅក្លោងទ្វារផ្លូវផ្កា Nguyen Hue។

ពីក្លោងទ្វារចូល ផ្លូវផ្កាបានទាក់ទាញ និងបង្កើតការចាប់អារម្មណ៍យ៉ាងខ្លាំង ចំពោះអ្នកទស្សនា ជាមួយនឹងគំរូសត្វនាគមួយគូ - ដែលជាសត្វស័ក្តិ សិទ្ធិនៃឆ្នាំ ២០២៤។ គំរូនាគមួយគូនេះមានទំហំកំណត់ត្រាដោយប្រវែងជាង ១០០ ម៉ែត្រ និងទំហំក្បាលជាង ២ ម៉ែត្រ មាត់កាន់គុជ ក្បាលអាចធ្វើចលនារួមជាមួយសំឡេងគ្រហឹម។ លោកស្រី Phan Thi Diem Trang ពលរដ្ឋនៅសង្កាត់លេខ១ បាន ចែករំលែកថា៖ “មកដល់ផ្លូវផ្កាឆ្នាំនេះ ខ្ញុំមានអារម្មណ៍សប្បាយរីករាយណាស់។ ខ្ញុំមិននឹកស្មានថា មនុស្សមកយ៉ាងច្រើនសន្ធឹកសន្ធាប់យ៉ាងដូច្នេះទេ។ ខ្ញុំគិតថា ផ្លូវផ្កាឆ្នាំនេះស្រស់ស្អាតម៉ែនទែន ដោយមាននាគមួយគូអណ្ដែតលើអាកាស ខុសពីឆ្នាំមុនៗ។ ខ្ញុំសង្ឃឹមថាប្រទេសយើងក៏នឹងមានការអភិវឌ្ឍដូចនិមិត្តសញ្ញាសត្វនាគដែលកំពុងហោះហើរឡើងដែរ”។

ផ្លូវផ្កា Nguyen Hue ឆ្នាំនេះប្រើប្រាស់ពណ៌ស្នូលចំនួន ៣ គឺក្រហម លឿងទុំ និងលឿង ពីផ្កា ៩៩ ប្រភេទ ជាមួយនឹងកន្ត្រកផ្កាជាង ៩ ម៉ឺនដែលត្រូវបានប្រើប្រាស់។

ក្នុងពេលជាមួយគ្នានោះ ពិធីបុណ្យផ្លូវសៀវភៅបុណ្យតេតឆ្នាំនេះ ប្រព្រឹត្តទៅ ចាប់ពីថ្ងៃទី ៧ ខែកុម្ភៈ ដល់ដំណាច់ថ្ងៃទី ១៤ ខែកុម្ភៈ (ថ្ងៃទី ៥ នៃបុណ្យតេត) នៅតាម វិថី Le Loi សង្កាត់លេខ ១ ទីក្រុងហូជីមិញ។ នេះជាឆ្នាំដំបូងដែលពិធីបុណ្យផ្លូវ សៀវភៅបុណ្យតេតនៃ ទីក្រុងហូជីមិញ រៀបចំការជូនអាំងប៉ាវជាសៀវភៅ ចាប់ពីថ្ងៃទី ១ នៃបុណ្យតេត ជាមួយសារ “បើកទំព័រសៀវភៅថ្មី អបអរឆ្នាំថ្មី”។ មានសៀវភៅ ប្រហែល ១៦ ពាន់ក្បាល នឹងត្រូវបានជូនដល់ប្រជាជនអំឡុងពេលបុណ្យតេត ខាងមុខនេះ៕