ບ້ານດອກໄມ້ ຊາແດ໊ກ ໄດ້ຮັບການສ້າງຕັ້ງນັບແຕ່ຕົ້ນສະຕະວັດທີ 20, ໃນຄາວນັ້ນຢູ່ເຂດ ເຕິນກຸຍດົງ ມີບາງຄອບຄົວປູກດອກໄມ້ເພື່ອປະດັບປະດາໃນຍາມບຸນເຕັດເທົ່ານັ້ນ. ເຫັນວ່າດອກໄມ້ບານງາມຕາ, ຈຳນວນຄອບຄົວປູກດອກໄມ້ກໍ່ຄ່ອຍໆເພີ່ມຂຶ້ນ ແລະ ກຳນົດເປົ້າໝາຍແມ່ນດຳເນີນທຸລະກິດ. ປະຈຸບັນ, ບ້ານດອກໄມ້ ຊາແດ໊ກ ມີປະມານ 3.000 ຄອບຄົວ, ສ່ວນຫຼາຍເຂົ້າເຈົ້າມີຊີວິດດ້ວຍການປູກດອກໄມ້, ເນື້ອທີ່ປູກດອກໄມ້ຢູ່ບ້ານດອກໄມ້ ຊາແດ໊ກ ກວ້າງປະມານ 500 ເຮັກຕາ, ດ້ວຍດອກໄມ້ນັບຮ້ອຍຊະນິດ. ທ່ານ ກາວວັນຮາຍ, ເຈົ້າຂອງສວນດອກໄມ້ ຮາຍກາວ, ໃຫ້ຮູ້ວ່າ.

        “ຈຸດທີ່ເປັນເອກະລັກຂອງບ້ານດອກໄມ້ແມ່ນດອກໄມ້ປະດັບປູກໄດ້ຕະຫຼອດປີ ເພື່ອສະໜອງໃຫ້ທົ່ວປະເທດ ແລະ ສົ່ງອອກໄປຍັງຕ່າງປະເທດຄື: ກຳປູເຈຍ, ລາວ, ຈີນ, ໄຕ້ຫວັນ… ໃນມື້ທຳມະດາແມ່ນປູກດອກໄມ້ເພື່ອຮັບໃຊ້ບັນດາກິດຈະກຳ, ສ່ວນໃນຍາມບຸນເຕັດແມ່ນປູກດອກໄມ້ຫຼາຍຊະນິດ, ດອກໄມ້ຮັບໃຊ້ງານບຸນ, ຖະໜົນດອກໄມ້. ຄອບຄົວຂ້າພະເຈົ້າໄດ້ປູກດອກໄມ້ດ້ວຍເນື້ອທີ່ປະມານ 8.000 ຕາແມັດ. ການບົວລະບັດດອກກຸຫຼາບຊາແດ໊ກ ແມ່ນຍາກທີ່ສຸດ. ໃນບ້ານ, ມີສະໂມສອນເຕົ້າໂຮມບັນດານັກສິລະປະການ, ຜູ້ປູກດອກໄມ້ ເພື່ອແລກປ່ຽນເຕັກນິກໃນການປູກດອກໄມ້. ປະຈຸບັນສະໂມສອນມີສະມາຊິກທັງໝົດ 38 ຄົນ ແລະ ໄດ້ຈັດກອງປະຊຸມໃນແຕ່ລະເດືອນ”.

ຈຸດທີ່ແຕກຕ່າງກັນທີ່ເຫັນໄດ້ງ່າຍຂອງບ້ານດອກໄມ້ ຊາແດ໊ກ ເມື່ອທຽບໃສ່ບັນດາໝູ່ບ້ານດອກໄມ້ອື່ນໆແມ່ນ, ບັນດາໜານດອກໄມ້ໄດ້ເຮັດໃສ່ຄ້າງສູງ, ເທິງໜ້ານ້ຳ ແລະ ຜູ້ປູກດອກໄມ້ຕ້ອງໃສ່ເກີບໂບດ ຫຼື ຂີ່ເຮືອນ້ອຍເພື່ອບົວລະບັດ ຫຼື ເກັບດອກໄມ້. ຕາມບັນດາຜູ້ປູກດອກໄມ້ຢູ່ແຫ່ງນີ້ແລ້ວ, ເຮັດແບບນີ້ຈະປະຢັດໄດ້ລາຍຈ່າຍ ຍ້ອນວ່າດິນເພື່ອປູກດອກໄມ້ສ່ວນຫຼາຍແມ່ນດິນນາ, ຖືກນ້ຳຖ້ວມໄດ້ງ່າຍ.

        ບ້ານດອກໄມ້ ຊາແດ໊ກ ໄດ້ປູກດອກໄມ້ຫຼາຍຊະນິດຄື: ດອກເບັນຈະມາດຫຼາຍພັນ, ດອກຈຳປີ, ດອກຫອນໄກ… ພິເສດ, ມີຕົ້ນດອກກຸຫຼາບເກືອບ 50 ຊະນິດປູກສະເພາະໃຫ້ແກ່ການສົ່ງອອກ. ດອກໄມ້ຢູ່ທີ່ນີ້ມີສີງາມດີ ສະນັ້ນຈຶງຂາຍໄດ້ດີ. ອ້າຍຮີ່ນບ໊າເຫງ້ຍ, ຜູ້ດຳເນີນທຸລະກິດຢູ່ນະຄອນໂຮ່ຈີມິນ, ມາຊື້ດອກໄມ້ຢູ່ບ້ານດອກໄມ້ຊາແດ໊ກ, ໃຫ້ຮູ້ວ່າ.

        “ເປັນຄັ້ງທຳອິດທີ່ຂ້າພະເຈົ້າມາບ້ານດອກໄມ້ຊາແດ໊ກ. ຂ້າພະເຈົ້າໄດ້ໄປສຳຫຼວດ, ເລືອກເອົາດອກໄມ້ບາງຊະນິດຢູ່ແຫ່ງນີ້ເພື່ອເອົາເມືອວາງສະແດງ ແລະ ຂາຍຢູ່ນະຄອນໂຮ່ຈີມິນ. ດອກໄມ້ ຊາແດ໊ກ ແມ່ນງາມກວ່າໝູ່ໝົດຢູ່ເຂດທົ່ງພຽງແມ່ນ້ຳຂອງທາງພາກໃຕ້ຫວຽດນາມ. ຢູ່ແຫ່ງນີ້ຢູ່ບ່ອນໃດກໍ່ເຫັນແຕ່ດອກໄມ້ ແລະ ມີຫຼາຍຊະນິດ, ຂ້າພະເຈົ້າມັກຫຼາຍ.”

        ໃນຊຸມປີມໍ່ໆມານີ້, ປະຊາຊົນຢູ່ບ້ານດອກໄມ້ ຊາແດ໊ກ, ບໍ່ພຽງແຕ່ປູກດອກໄມ້ເພື່ອເອົາມາຂາຍເທົ່ານັ້ນ, ຫາກຍັງພັດທະນາໝູ່ບ້ານອາຊີບຕິດພັນກັບການທ່ອງທ່ຽວອີກດ້ວຍ. ຄາດວ່າ, ແຕ່ລະປີມີນັກທ່ອງທ່ຽວເກືອບ 1 ລ້ານຄົນມາຢ້ຽມຢາມ, ຫຼາຍກວ່າໝູ່ແມ່ນໃນໂອກາດບຸນເຕັດ. ສວນປູກຕົ້ນໄມ້ປະດັບກໍ່ໄດ້ຮັບການປະດັບປະດາຢ່າງສວຍງາມທີ່ສຸດເພື່ອຕ້ອນຮັບນັກທ່ອງທ່ຽວ. ມີບາງຄອບຄົວໄດ້ສ້າງສວນດອກໄມ້ຂອງຕົນເປັນສະຖານທີ່ທ່ອງທ່ຽວ Homestay ທີ່ດູດດື່ມຄື: ເຮືອນດອກໄມ້ ເອັກ, ຟອງລາ Vent… ເອື້ອຍ ເລທູຮັ່ງ, ຜູ້ຄຸ້ມຄອງເຂດສວນ Happy Land ຮຸ່ງທີ, ຢູ່ບ້ານດອກໄມ້ ຊາແດ໊ກ, ໃຫ້ຮູ້ວ່າ.

        “ພວກຂ້າພະເຈົ້າໄດ້ສ້າງບັນດາຮູບແບບນ້ອຍໆ 2 ແບບເພື່ອໃຫ້ນັກທ່ອງທ່ຽວມາລະຫຼີ້ນ, ຖ່າຍຮູບຄື: ຮູບຫົວໃຈ, ໜ່ວຍໂລກ, ໂຕນົກ… ຍັງມີເຂດຈັດຕັ້ງການລະຫຼີ້ນ ພື້ນເມືອງຕື່ມອີກ. ຢູ່ທີ່ນີ້, ແຂກມາຢ້ຽມຢາມຫຼາຍທີ່ສຸດແມ່ນວັນເສົາ, ວັນອາທິດ ມີປະມານ 100 ຄົນ, ມີແຂກທ່ອງທ່ຽວຕ່າງປະເທດຫຼາຍຄະນະທີ່ມາຈາກການາດາ, ອາເມລິກາ, ອົດສະຕາລີ… ກໍ່ໄດ້ມາທ່ຽວຢູ່ທີ່ນີ້”.

        ມາຢ້ຽມຢາມບ້ານດອກໄມ້ ຊາແດ໊ກ ເຖິງວ່າຢູ່ເດືອນໃດໃນປີເພື່ອນກໍ່ສາມາດມາຢ້ຽມຊົມ, ຖ່າຍຮູບໄດ້ສະບາຍໃນຕະຫຼອດປີ. ເຂດນີ້ຍັງດຶງດູດນັກທ່ອງທ່ຽວດ້ວຍບັນດາຮ້ານຂາຍກາເຟ ທີ່ກວ້າງໃຫຍ່, ໄດ້ຮັບການປະດັບປະດາດ້ວຍບັນດາເຮືອນ້ອຍ, ຂົວໄມ້ລຳດຽວ, ຕູບ… ທີ່ເຕັມໄປດ້ວຍດອກໄມ້. ອ້າຍ ຫວູກວາງຢຸງ, ນັກທ່ອງທ່ຽວມາຈາກແຂວງ ໄຕນິງ, ແບ່ງປັນວ່າ.

        “ເປັນຄັ້ງທຳອິດທີ່ຂ້າພະເຈົ້າມາຢ້ຽມຢາມບ້ານດອກໄມ້ຊາແດ໊ກ. ຂ້າພະເຈົ້າມີຄວາມປະທັບໃຈ ແລະ ເພິ່ງພໍໃຈສຳລັບບ້ານດອກໄມ້ ຊາແດ໊ກ ນີ້ຫຼາຍ. ດອກໄມ້ຢູ່ແຫ່ງນີ້ແມ່ນມີຫຼາຍຊະນິດທີ່ສຸດ. ຄະນະນັກທ່ອງທ່ຽວພວກຂ້າພະເຈົ້າໄດ້ພາກັນຖ່າຍຮູບຫຼາຍທ່າທີ່ສຸດ, ເມື່ອກັບເມືອຈະເອົາລົງ Facebook ເພື່ອອວດໃຫ້ທຸກຄົນເບິ່ງ. ໃນອະນາຄົດ, ຖ້າມີໂອກາດຂ້າພະເຈົ້າຈະສືບຕໍ່ມາຢ້ຽມຢາມບ້ານດອກໄມ້ນີ້ອີກ, ແຕ່ຕ້ອງມາຢ້ຽມຢາມຕອນລະດູບານໃໝ່ ເພາະວ່າ ດອກໄມ້ຈະບານຫຼາຍກວ່າ ແລະ ງາມທີ່ສຸດ”.

        ມາຢ້ຽມຢາມບ້ານດອກໄມ້ຊາແດ໊ກ ໃນຍາມດອກໄມ້ບານ, ເພື່ອນຈະໄດ້ເຫັນດອກໄມ້ຫຼາຍສີ, ຫຼາຍຊະນິດຢູ່ທົ່ວບ້ານແຫ່ງນີ້. ບ້ານດອກໄມ້ຊາແດ໊ກ ແມ່ນຈຸດນັດພົບທີ່ດູດດື່ມສຳລັບນັກທ່ອງທ່ຽວເມື່ອມານະຄອນຊາແດ໊ກ, ແຂວງດົ່ງທາບ.